މާލޭ ރައްޔިތުންނަށް ގޯތީ ދޭނެ ކަމަށް އެމްޑީޕީން ވި ވައުދު ފުއްދައި ދެއްވާނެ ކަމަށާއި ފްލެޓު އެޅުމަށް ވުރެ ދައުލަތުގެ މާލިއްޔަތަށް ވެސް ރަނގަޅު ގޮތަކީ ގޯތި ދިނުން ކަމަށް، ކުރީގެ ރައީސް މުހައްމަދު ނަޝީދު މިއަދު ވިދާޅުވެއްޖެ އެވެ.
މާލޭގެ ރައްޔިތުންނަށް ގެދޮރުވެރިކަން ފޯރުކޮށްދޭނެ ކަމަށް ވައުދުވަމުން އަންނަތާ ތިރީހަކަށް އަހަރު ވެއްޖެ ކަމަށާއި އެކަން ނުކުރެވި ދިގުލައި ދާތީވެ، އެއީ ނުވާނެ ކަމެއް ކަމަށް އެމްޑީޕީގެ ބައެއް ސަޕޯޓަރުން ވެސް ގަބޫލުކޮށް އެ ވާހަކަ ދައްކާ ކަމަށް ނަޝީދު ފާހަގަ ކުރެއްވެވި އެވެ.
އެ މަނިކުފާނު ވިދާޅުވީ އެ ވައުދު ފުއްދުމުގެ މަސައްކަތް ހުއްޓާ ނުލައްވައި ކުރިއަށް ގެންދަވާނެ ކަމަށާއި ބޯހިޔާވަހި ކަމަށް ގޯތި ފިޔަވައި އިތުރު ވާހަކައެއް ނެތް ކަމަށެވެ.
"ކަނޑާފައި، ކަޑަ ޖަހާފައި މާލޭ ރައްޔިތުންނަށް ގޯތި... އިތުރު ވާހަކައެއް ވެސް ނޫން،" އެމްޑީޕީގެ މާލޭ ދާއިރާތަކުގެ ރައީސުންނާއެކު ސަލްޓަން ޕާކުގައި ބޭއްވި ބައްދަލުވުމުގައި ނަޝީދު ވިދާޅުވި އެވެ.
ގޯތި ހުޅުމާލެއިން ލިބެން ޖެހޭނެ އޭ. އަދި ތިޔަ ގުޅީފަޅުގައި ތަނެއް ހިއްކިޔަސް ވެސް އަދި ގިރާވަރާ ހަމައަށް ގެންގޮސް ކަޅިއާ ހަމައަށް ހިއްކިޔަސް ވެސް، މި މާލޭގެ ރައްޔިތުންނަށް އުޅެވޭނެ ގޮތަށް މިރަށުގެ މީހުންނަށް ވެސް ބޯހިޔާވަހިކަމެއް ފޯރުކޮށް ދިނުމަކީ އަޅުގަނޑުމެން އަބަދުވެސް ވަމުން އަންނަ ވައުދެއް. އެ ވައުދު ފުއްދުން ހުއްޓައެއް ނުލާނަން."
ނަޝީދު ވިދާޅުވީ ފްލެޓު އެޅުމުގެ ސިޔާސަތުތަކުން ސާފުވި ހަގީގަތަކީ އިންތިހާބީ ފަސް އަހަރު ތެރޭގައި އެ ފްލެޓު ބިނާކޮށް މީހުން ވެއްދުމަކީ ވާވަރުގެ ކަމެއް ނޫން ކަމަށެވެ. މިސާލެއްގެ ގޮތުގައި ވިދާޅުވީ، ރައީސް މައުމޫނުގެ ވެރިކަމުގައި އެޅި ފްލެޓުތައް ހަވާލުކުރީ އެމްޑީޕީގެ ވެރިކަމުގައި ކަމަށާއި، އެމްޑީޕީގެ ވެރިކަމުގައި އެޅި ފްލެޓުތައް ހަވާލުކުރީ ޖެހިގެން އައި ޕީޕީއެމްގެ ސަރުކާރުން ކަމަށެވެ. އަދި ޕީޕީއެމްގެ ސަރުކާރުން އެޅި ފްލެޓުތައް ހަވާލުކުރީ މި ސަރުކާރުންކަން އެ މަނިކުފާނު ވަނީ ފާހަގަ ކުރައްވައިފަ އެވެ.
ފްލެޓު އެޅުމަކީ ވެސް ދައުލަތުގެ ބަޖެޓަށް އިންތިހާއަށް ބުރަ ބޮޑުވެގެންދާ ކަމެއް ކަމަށާއި ގޯތި ކަނޑާފައި ދީފި ނަމަ، ދެ އަހަރު ދުވަހުގެ ތެރޭގައި ހަދައި، ޓެކްސް ލިބެން ފަށާނެ ކަމަށް ނަޝީދު ވިދާޅުވި އެވެ.
މިހާރު ވެސް އެޗްޑީސީގެ ދަރަންޏަކީ 1.2 ބިލިއަން ޑޮލަރު ކަމަށާއި ފްލެޓު އެޅުމަށާއި ޓޫރިޒަމް މަސައްކަތްތަކަށް ހުސްކޮށްފައި އޮންނަ ބިންތައް އާރާސްތު ނުކުރެވި ގިނަ ދުވަސް ފާއިތުވެ ދިޔުމަކީ ދަރަނި ބޮޑުވެގެންދާ ކަމެއް ކަމަށް ނަޝީދު ފާހަގަ ކުރެއްވި އެވެ. ގޯތި ދޫކޮށްފި ނަމަ ދަރަނި ކުޑަވެ، ޓެކްސް ވެސް ލިބޭނެ ކަމަށް އެ މަނިކުފާނު ވިދާޅުވި އެވެ.
