އަރަބިއްޔާ އެޅުމަށް ބާ ޖަމާލުއްދީން ބިން ދެއްވަން ރައީސް ނިންމަވައިފި

އަރަބިއްޔާ ސްކޫލު އެޅުމަށް ބާ ޖަމާލުއްދީން ބިން ދިނުމަށް ރައީސް އިބްރާހިމް މުހައްމަދު ސޯލިހް ނިންމަވައިފި އެވެ.

ސްޓަރަކްޗަރަށް ދިމާވެފައިވާ މައްސަލަތަކަަކާ ގުޅިގެން އަރަބިއްޔާ ސްކޫލު އިމާރާތުގައި މި ވަގުތު ހާލަތު ހުރި ގޮތުން އެތަނުގައި ކިޔަވައިދިނުން ރައްކާތެރި ނޫން ކަމަށް ނިންމާ ކުދިން ކިޔެވުން މެދުނުކެނޑި ކުރިޔަށް ގެންދަން އިއްޒުއްދީން ސްކޫލަށް ބަދަލުކުރަން އެޑިޔުކޭޝަން މިނިސްޓްރީން ނިންމި އެވެ.

ނަމަވެސް އެކަމާ އެ ސްކޫލުގެ ބެލެނިވެރިން ވަނީ އިހްތިޖާޖުވެސް ކޮށްފަ އެވެ. އެ ސުކޫލްގެ ބެލެނިވެރިން ބުނެފައި ވަނީ އިއްޒުއްދީން ސްކޫލަށް ދަރިވަރުން ގެންގޮސްފި ނަމަ "ޅަދަރީންގެ އަރަބި އިސްލާމީ ތައުލީމު ފަނާވެ" ހިނގައިދާނެ ކަމަށެވެ.

އެ އިހްތިޖާޖުގެ ބައިވެރިން ތިބީ "ސޭވް އަރަބިއްޔާ" ފެހިކުލައިން ޖަހާފައިވާ ހުދު ޓީޝާޓު ލައިގެންނެވެ. އެ ޓީޝާޓުގަ "ދާއިމީ ހައްލެއް" އަދި "މުސްތަގުއްލު އިމާރާތެއް" މިފަދަ ޝުއޫރުތައް ލިޔެފައި ހުއްޓެވެ.

އެކަމަށް ހައްލެއް ހޯދައިދެއްވުމަށް އެދި މިއަދު އެ ސްކޫކުގެ ބެލެނިވެރިން ރައީސާއެކު ބޭއްވި ބައްދަލުވުމުގައި ދެ ސްކޫލެއް އެއްކޮށްލައިގެން ކިޔަވައިދިނުމަކީ ހައްލެއް ނޫން ކަމަށް ރައީސް ވިދާޅުވި ކަމަށް ބެލެނިވެރިން ބުންޏެވެ.

ހައްލެއްގެ ގޮތުން މިހާރު އިލެކްޝަން ކޮމިޝަންގެ އޮޕަރޭޝަން ހިންގަމުންދާ އިމާރާތް (ކުރީގެ ޖަމާލުއްދީން ސްކޫލު) އަރަބިއްޔާ އެޅުމަށް ދޭން ނިންމާފައިވާ ކަމަށް ރައީސް ވިދާޅުވި އެވެ.

"ޝެއާ ކޮށްގެން އެގޮތަށް ގެންދިއުމަކީ ހައްލެއް ކަމަށް ރައިސް އަށްވެސް ގަބޫލުފުޅު ނުކުރެވޭ ކަމަށް ވިދާޅުވި. އެހެން ކަމުން އެހެން ހައްލެއް ހޯދުމަށް ޔަގީންކަން ދެއްވި ބާ ޖަމާލުއްދީން އަރަބިއްޔާ ސްކޫލު އެޅުމަށް ދޭނެ ކަމަށް،" ބައްދަލުވުމަށް ދިޔަ ބެލެނިވެރިޔަކު "އަދަދު" އަށް ވިދާޅުވި އެވެ.

އަރަބިއްޔާ ސްކޫލުގެ އާ އިމާރާތް، 29 މިލިއަން ރުފިޔާއަށް ހަދަން އެންމެ ފުރަތަމަ ހަވާލުކުރީ މާލޭ ހައި ރައިޒިން ކުންފުންޏާ އެވެ. އެއީ މާޗް 2، 2011 ގަ އެވެ. ނަމަވެސް މަސައްކަތް ނުގެންދާތީ ޖުލައި 20، 2011 ގައި އުވާލި އެވެ. އެއަށް ފަހު އޮގަސްޓް 25، 2011 ގައި ފަހުން ހައުސިން މިނިސްޓްރީން އެ އިމާރާތުގެ މަސައްކަތް ހަވާލުކުރީ އެލްއެފް ކޮންސްޓްރަކްޝަން އާ އެވެ.

ހަތް ބުރީގެ އެ އިމާރާތުގެ މަސައްކަތް އެކުންފުނިން ނިންމައި، އިމާރާތް ހުޅުވީ ސެޕްޓެމްބަރު 19، 2013 ގައެވެ. ހުޅުވިތާ އަށް އަހަރު ފަހުން އެ ސްކޫލުގެ ތަނބުތަކުގައި ބޮޑެތި ރެނދުތައް ލައި ވަރަށް ބޮޑަށް ވަނީ ހަލާކުވެފަ އެވެ.