އަރަބިއްޔާ ސުކޫލުގެ ދަރިވަރުން ވަގުތީގޮތުން އިއްޒުއްދީން ސްކޫލަށް ބަދަލު ކުރުމަށް އެޑިއުކޭޝަން މިނިސްޓްރީން ނިންމާފައިވާ މައްސަލާގައި ބެލެނިވެރިންގެ މެދުގައި ހުރި ކަންބޮޑުވުންތަކަށް ހައްލެއް ހޯދުމަށް ރައީސް އިބްރާހީމް މުހައްމަދު ސޯލިހާ ބައްދަލުކުރަން ހަމަޖެހިއްޖެ އެވެ.
އެ ސްކޫލުގެ މައްސަލާގައި ބެލެނިވެރިން ވަނީ އިހްތިޖާޖުވެސް ކޮށްފަ އެވެ. އެ ސުކޫލްގެ ބެލެނިވެރިން ބުނެފައި ވަނީ އިއްޒުއްދީން ސްކޫލަށް ދަރިވަރުން ގެންގޮސްފި ނަމަ "ޅަދަރީންގެ އަރަބި އިސްލާމީ ތައުލީމު ފަނާވެ" ހިނގައިދާނެ ކަމަށެވެ.
އެ އިހްތިޖާޖުގެ ބައިވެރިން ތިބީ "ސޭވް އަރަބިއްޔާ" ފެހިކުލައިން ޖަހާފައިވާ ހުދު ޓީޝާޓު ލައިގެންނެވެ. އެ ޓީޝާޓުގަ "ދާއިމީ ހައްލެއް" އަދި "މުސްތަގުއްލު އިމާރާތެއް" މިފަދަ ޝުއޫރުތައް ލިޔެފައި ހުއްޓެވެ.
ރައީސް އޮފީހުގެ ތަރުޖަމާނު މަބްރޫކް އަޒީޒް ވަނީ ރައީސް، މިއަދު ބެލެނިވެރިންނާ ބައްދަލުކުރަން ނިންމާފައިވާ ކަން ކަށަވަރު ކޮށްދެއްވައިފަ އެވެ.
އެ ބައްދަލުވުން ބާއްވަން ނިންމާފައި ވަނީ މިއަދު ހެނދުނު 11 ޖަހާއިރު އެވެ.
ބެލެނިވެރިން ވަނީ އަރަބިއްޔާ ސްކޫލްގެ ދަރިވަރުން ވަގުތީ ގޮތުން އިއްޒުއްދީން ސްކޫލަށް ބަދަލު ކުރުމަށް އެޑިއުކޭޝަން މިނިސްޓްރީން ނިންމާފައިވާތީ އެކަމުގެ ކަންބޮޑުވުންތައް ހިއްސާ ކުރުމަށް އިސްލާމިކް މިނިސްޓަރު ޑރ. އަހުމަދު ޒާހިރުއާ ވެސް އިއްޔެ ބައްދަލުކޮށްފަ އެވެ.
އިއްޒުއްދީން ސްކޫލަށް އަރަބިއްޔާގެ ދަރިވަރުން ވަގުތީ ގޮތުން ބަދަލުކުރި ނަމަވެސް ހުޅުމާލޭގައި މިހާރު އިމާރާތްކުރާ ތިން ސްކޫލުގެ ތެރެއިން އެއް ސްކޫލް ހާއްސަ ކުރާނީ އެ ދަރިވަރުންނަށް ކަމަށް އެޑިއުކޭޝަން މިނިސްޓްރީން ބުނެ އެވެ.
ނަމަވެސް އަރަބިއްޔާ ސްކޫލްގެ ބެލެނިވެރިން ބޭނުންވަނީ ވަގުތީ އިމާރާތެއް ހަދައި އެތަނަށް ދަރިވަރުން ބަދަލު ކުރުމަށެވެ.
