ބެއިޖިން، ޗައިނާ (ޑިސެމްބަރު 20) - ޗައިނާގެ ކޮމިއުނިސްޓް ޕާޓީގެ އިސް ލީޑަރަކަށް ޖިންސީ ގޯނާގެ ތުހުމަތު ނުކުރާ ކަމަށް ޓެނިސް ތަރި ޕެންގް ޝުއާއީ ބުނެފި އެވެ.
ޕެންގްގެ ރައްކާތެރިކަމާ މެދު ބޭރުގެ ފަރާތްތަކުން ކަންބޮޑުވުން ފާޅުކުރަން ފެށި ފަހުން ދިން ފުރަތަމަ އިންޓަވިއުގައި އޭނާ ބުނީ އުޅެމުން ދަނީ މިނިވަންކަމާ އެކު ކަމަށެވެ.
ނަމަވެސް ވިމެންސް ޓެނިސް އެސޯސިއޭޝަން (ޑަބްލިއުޓީއޭ) އިން ބުނީ "ސެންސަރު ކުރުމެއް އަދި ޕްރެޝަރު ކުރުމެއް ނެތި ޕެންގް އަށް ވާހަކަދެއްކޭ ކަމާ މެދު ޝައްކު" ކުރާ ކަމަށެވެ.
ސިންގަޕޫރުގައި ޗައިނާ ބަހުން ނެރޭ ލިއަންހޭ ޒައޮބައޮ ނޫހަށް ދިން އިންޓަވިއުގައި ޕެންގް ބުނީ ޖިންސީ ގޯނާގެ އެއްވެސް ތުހުމަތެއް އޭނާ ނުކުރާ ކަމަށެވެ.
"ވަރަށް މުހިއްމު ނުކުތާއެއް ފާހަގަކުރަން އަޅުގަނޑު ބޭނުން. އަޅުގަނޑަށް އެއްވެސް މީހަކު ޖިންސީ ގޯނާ ކުރި ކަމަށް ތުހުމަތުކޮށް އެއްވެސް ވާހަކައެއް ދައްކާފައެއް ނުވާނެ އަދި އެފަދަ ވާހަކައެއް ލިޔެފައި ވެސް ނުވާނެ،" 35 އަހަރުގެ ޕެންގް ބުންޏެވެ.
"އެކަން ސާފުކޮށްދޭން އަޅުގަނޑު ބޭނުން."
އެހެން ނަމަވެސް މިދިޔަ ނޮވެމްބަރު މަހު ސޯޝަލް މީޑިއާ ވެއިބޯގައި ޕެންގް ބުނެފައި ވަނީ އުމުރުން 70 ގެ އަހަރުތައް ގުނަމުންދާ ކުރީގެ ވައިސް ޕްރިމިއާ ޒާންގް ގައޯލީ ވަނީ އެތައް އަހަރެއް ވަންދެން ގަދަކަމުން ޖިންސީ ގުޅުން ބާއްވަން އޭނާ އަށް މަޖުބޫރުކޮށްފައި ކަމަށެވެ.
ވެއިބޯގައި އެ ވާހަކަ ޕޯސްޓު ކުރުމަށް ފަހު ފަހުން ރިމޫވްކުރި އެވެ. އޭގެ ފަހުން އާއްމު ތަނަކުން ނުފެނުމުގެ އިތުރުން ޕެންގްގެ ހަބަރެއް ވީ ދެ ހަފުތާ ފަހުންނެވެ. ޕޯސްޓް ޑިލީޓް ކުރި ނަމަވެސް، އޭގެ ސްކްރީންޝޮޓުތައް ވަނީ އާއްމުވެފަ އެވެ.
ޕެންގްގެ ވީޑިއޯ އިންޓަވިއުގައި އެ ޕޯސްޓާ ގުޅޭ ގޮތުން ސުވާލު ކުރުމުން ބުނީ އެއީ "ޒާތީ މައްސަލައެއް" ކަމަށާއި އެކަމާ ގުޅޭ ގޮތުން މީހުންނަށް ވަރަށް ގިނަ ކަންކަން "އޮޅުންއަރާފައިވާ" ކަމަށެވެ.
ޑަބްލިއުޓީއޭ އިން ބުނީ ޕެންގްގެ ހާލަތާ މެދު އަދިވެސް ކަންބޮޑުވާ ކަމަށާއި ޖިންސީ ގޯނާގެ ތުހުމަތުތައް ތަހުގީގު ކުރަން ގޮވާލާ ކަމަށެވެ. ޕެންގްގެ މައްސަލަ ފެންމަތިވެ ޑަބްލިއުޓީއޭ އިން ނިންމީ ޗައިނާގައި އެއްވެސް މުބާރާތެއް ނުބޭއްވުމަށެވެ.
