މިލާން (ޑިސެމްބަރު 20) - އިޓާލިއަން ލީގުގައި ރޭ އޭސީ މިލާން 1-0 އިން ބަލިކޮށް، ނަޕޯލީ ލީގުގެ ދެ ވަނަ މަގާމަށް ޖެހިލައިފި އެވެ.
މިއީ އެންމެ ފަހުން ކުޅުނު ހަތަރު މެޗުގެ ތެރެއިން ނަޕޯލީ އަށް ލިބުނު ފުރަތަމަ މޮޅެވެ. މި ތިން ޕޮއިންޓާ އެކު ނަޕޯލީ ދެ ވަނަ އަށް ޖެހިލީ ޕޮއިންޓުގެ ގޮތުން މިލާނާ އެއްވަރު ކޮށްގެންނެވެ. އެއް ވަނައިގައި އޮތް އިންޓަ މިލާނަށް 18 މެޗުން 43 ޕޮއިންޓް ލިބިފައިވާއިރު، ދެ ވަނައިގައި އޮތް ނަޕޯލީ އާއި ތިން ވަނައިގައި އޮތް މިލާނަށް ވަނީ 18 މެޗުން 39 ޕޮއިންޓް ލިބިފަ އެވެ.
މިލާން ދަނޑުގައި ރޭ ކުޅުނު މެޗުގައި ނަޕޯލީން މެޗުގެ ހަމައެކަނި ގޯލު ޖެހީ ފަސް ވަނަ މިނިޓްގަ އެވެ. ޕޮލެންޑްގެ މިޑްފީލްޑަރު ޕިއޮޓްރޭ ޒިއެލީންސްކީ ނެގި ކޯނަރަކުން އެލިފް އެލްމާސް މި ގޯލު ޖެހީ ބޮލުންނެވެ. ނޯތު މެސެޑޯނިއާގެ އެލްމާސް ބޮލުން ޖެހި ބޯޅަ ގޯލަށް ވަނީ މިލާން ގޯލުގައި ހުރި ފްރާންސް ކީޕަރު މައިކް މެނިއާން އަތްދަށުންނެވެ.
ފުރަތަމަ ހާފުގައި ނަތީޖާ ހަަމަހަމަ ކުރަން އޭރިއާތެރެއިން މިލާންގެ ޒްލަޓާން އިބްރަހިމޮވިޗް ބޮލުން ފޮނުވާލި ބޯޅަ ބޭރަށް ދިޔައިރު، އޭރިއާބޭރުން އަލެސަންދްރޯ ފްލޮރެންޒީ ޖެހި ޝޮޓް ވެސް ގޯލާ ސީދާވާގޮތެއް ނުވި އެވެ. ދެ ވަނަ ހާފްގައި އޭރިއާތެރެއިން އިބްރަހިމޮވިޗް ޖެހި ބޯޅައެއް ނަޕޯލީ ކީޕަރު ޑޭވިޑް އޮސްޕީނާ ވަނީ މަތަކޮށްފަ އެވެ.
މެޗުގެ އިތުރު ވަގުތުގައި މިލާންގެ ފްރޭންކް ކެސިއޭ ގޯލެއް ޖަހައި ނަތީޖާ ހަމަހަމަކުރި ނަމަވެސް ރެފްރީ ނިންމީ އެ ގޯލު ބަލައިނުގަންނާށެވެ. ވީޑިއޯ އެސިސްޓަންޓް ރެފްރީ (ވީއޭއާރް) މެދުވެރިކޮށް މި ގޯލު ނުލާން ނިންމީ މިލާންގެ އޮލީވިއޭ ޖިރޫޑް އޮފްސައިޑް މަގާމެއްގައި ހުރެ، ކުޅުމުގައި ބައިވެރިވުމުން ކަމަށް ބަލައިފަ އެވެ.
ލީގުގައި ރޭ ފިއޮރެންޓީނާ އިން ސަސުއޯލޯއާ 2-2 އިން އެއްވަރުކޮށް ހޯދި ޕޮއިންޓާ އެކު ވަނީ ހަ ވަނަ އަށް ޖެހިލައިފަ އެވެ. ހަތަރު ވަނައިގައި އޮތް އެޓަލަންޓާ އަށް 18 މެޗުން 37 ޕޮއިންޓް ލިބިފައިވާއިރު، ފަސް ވަނައިގައި އޮތް ރޯމާ އާއި ހަ ވަނައިގައި އޮތް ފިއޮރެންޓީނާ އަދި ހަތް ވަަނައިގައި އޮތް ޔުވެންޓަަސް އަށް ވަނީ 18 މެޗުން 31 ޕޮއިންޓް ލިބިފަ އެވެ.
