އިސްލާމްއާބާދް، ޕާކިސްތާން (ޑިސެމްބަރު 19) - އަފްގާނިސްތާނަށް ދިމާވެފައިވާ އިންސާނީ ކާރިސާއިން އަރައިގަތުމަށް އެހީވާނެ ގޮތްތަކާ މެދު މަޝްވަރާ ކުރުމަށް 57 އިސްލާމީ ގައުމެއްގެ މަންދޫބުން ޕާކިސްތާނުގައި އާދީއްތަ ދުވަހު ބައްދަލުކުރަން ނިންމައިފި އެވެ.
އޯގަނައިޒޭޝަން އޮފް އިސްލާމިކް ކޯޕަރޭޝަން (އޯއައިސީ) ގެ މި ބައްދަލުވުމަކީ މިދިޔަ އޯގަސްޓު މަހު ގާނޫނީ ސަރުކާރުން ވައްޓާލުމަށް ފަހު ތާލިބާނުން އަފްގާނިސްތާނުގެ ވެރިކަމަށް އައުމަށް ފަހު، އެ ގައުމާ ގުޅޭ ގޮތުން ބާއްވާ އެންމެ ބޮޑު ކޮންފެރެންސެވެ.
ތާލިބާނުން ވެރިކަމާ ހަވާލުވުމުން ބޭރުގެ އެހީތައް ވަނީ ހިފަހައްޓާފަ އެވެ. އެހެންވެ، އަފްގާނިސްތާނަށް ވަނީ އިގްތިސާދީ އަދި އިންސާނީ ކާރިސާއެއް ދިމާވެފަ އެވެ. އޭގެ އިތުރުން އަފްގާނިސްތާނުގެ މަރުކަޒީ ބޭންކުގެ ބިލިއަނަކަށް ވުރެ ގިނަ ޑޮލަރު އެމެރިކާ އިން ވަނީ ހިފަހައްޓާފަ އެވެ.
އަފްގާނިސްތާނަށް އެހީވާނެ ގޮތްތަކާ ގުޅޭ ގޮތުން އޯއައިސީ އިން މަޝްވަރާ ކުރުމަށް ފަހު އާދީއްތަ ދުވަހުގެ ރޭ ނިންމުންތައް އިއުލާނު ކުރާނެ ކަމަށް ބެލެވެ އެވެ.
އޯއައިސީ މެމްބަރު ގައުމުތަކުގެ އިތުރުން ބައްދަލުވުމުގައި ބައިވެރިވާ ފަރާތްތަކުގެ ތެރޭގައި ހިމެނެނީ ތާލިބާން ފޮރިން މިނިސްޓަރު އާމިރް ހާން މުއްތަގީ އާއި އެމެރިކާ އާއި ޗައިނާ، ރަޝިއާ، އީޔޫ އަދި އދ. ގެ މަންދޫބުންނެވެ.
އެއްވެސް ގައުމަކުން މިހާތަނަށް ރަސްމީކޮށް ތާލިބާން ސަރުކާރު ބަލައިގެންފައެއް ނުވެ އެވެ. ޕާކިސްތާނުގެ ފޮރިން މިނިސްޓަރު ޝާހް މެހްމޫދް ގުރެއިޝީ ވިދާޅުވީ ބައްދަލުވުމުގައި ނިންމާނީ "ވަކި ގްރޫޕަކަށް" އެހީވުމުގެ ބަދަލުގައި "އަފްގާން ރައްޔިތުންނަށް" ކަންކަން ކޮށްދިނުމަށް ކަމަށެވެ.
މީގެ ކުރިން 1996 އިން 2001 އަށް ތާލިބާނުން ވެރިކަން ކުރިއިރު ތާލިބާނުންގެ ސަރުކާރު ބަލައިގަތީ ހަމައެކަނި ޕާކިސްތާނާއި ސައުދީ އަރަބިއްޔާ އަދި ޔޫއޭއީ އިންނެވެ.
އަފްގާނިސްތާނަށް އެހީވުމަށް ބާރު އަޅުއްވަމުން ގުރެއިޝީ ވިދާޅުވީ ތާލިބާން ސަރުކާރު ބަލައިގަތުމާއި އެ ސަރުކާރާ "އެންގޭޖުވެ" ގުޅިގެން މަސައްކަތް ކުރުމަކީ ތަފާތު ދެ ކަމެއް ކަމަށެވެ.
