ރާއްޖޭގެ ކޮންމެ ރަށެއްގައި ވެސް ދުއްވޭނެ ވެހިކަލްތަކުގެ ޖުމްލަ އަދަދު ކަނޑައެޅުމަށް ރަށު އަދި ސިޓީ ކައުންސިލްތަކަށް ގަވާއިދަކުން ޓްރާންސްޕޯޓް މިނިސްޓްރީން ލާޒިމްކޮށްފި އެވެ.
"އެއްގަމު އުޅަނދު ރަޖިސްޓަރީ ކޮށްދޭނެ އަދަދާއި އުޅަނދު ބޭނުންކުރެވޭނެ މުއްދަތު ކަނޑައެޅުމުގެ ގަވާއިދު" ބުރާސްފަތި ދުވަހު ގެޒެޓު ކުރި ނަމަވެސް އެއަށް އަމަލު ކުރަން ފަށަންޖެހެނީ ހަ މަސް ދުވަސް ފަހުން ޖޫން 16، 2021 ގަ އެވެ.
އެ ގަވާއިދުގެ މަގްސަދަކީ ރާއްޖޭގައި މީހުން ދިރިއުޅޭ ކޮންމެ ރަށެއް ބެސް އެއްގަމު އުޅަނދު ރަޖިސްޓްރީ ކޮށްދޭނެ އަދަދާއި އުޅަނދު ބޭނުންކުރެވޭނެ މުއްދަތު ކަނޑައެޅުން ކަމަށް ޓްރާންސްޕޯޓް މިނިސްޓްރީން ބުނެފައިވެ އެވެ.
އުޅަނދުތަކުގެ އަދަދު ކަނޑައަޅާނެ ގޮތާއި ބަލަން ޖެހޭނެ ކަންކަމުގެ އިތުރުން، އެ އަދަދު ކަނޑައެޅުމުގެ ކުރިން ކޮންމެ ރަށަކުން ވެސް ހަދަން ޖެހޭނެ އެސެސްމެންޓްގެ ތަފްސީލުވެސް މި ގަވާއިދުގައިވެ އެވެ.
އޭގެ އިތުރުން އުޅަނދުތަކުގެ އަދަދާއި ރަޖިސްޓްރީ ކޮށްދިނުމުގެ އުސޫލާއި އެ އެއްޗެހި ބޭނުންކުރެވޭނެ އެންމެ ދިގު މުއްދަތު ވެސް މި ގަވާއިދުގެ ދަށުން ކައުންސިލްތަކުން ކަނޑައަޅަންޖެހެ އެވެ.
ގަވާއިދުގައި ވާގޮތުން ކޮންމެ ރަށެއްގައި ވެސް ބޭނުންކުރެވޭނެ ޖުމްލަ އުޅަނދުގެ އަދަދު ކަނޑައެޅުމުގައި ރިޔާއަތް ކުރަން ޖެހޭނެ އަސާސީ ކަންކަމެއްވެ އެވެ. އެއީ:
- އެ ރަށެއްގެ އާބާދީ
- އެ ރަށެއްގައި ބޭނުން ކުރަމުންދާ އުޅަނދުތަކުގެ ޖުމްލަ އަދަދު
- އުޅަނދުތައް ދުއްވުމަށް ކަނޑައެޅިފައިވާ މަގުތަކާ ޕާކް ކުރުމަށް ކަނޑައަޅާ ސަރަހައްދުގެ ބޮޑުމިން
މިކަންކަމުގެ މައްޗަށް ތައްޔާރު ކުރޭ އެސެސްމެންޓްގައި އެންމެ ގިނައިން އެރަށުގައި ވެހިކަލް ދުއްވާ ގަޑި އާއި އާންމު ދަތުރު ފަތުރު ނިޒާމް ހަމަޖެހިފައިވާ މިންވަރާއި އާބާދީގެ ނިސްބަތުން އެއްގަމު އުޅަނދު ބޭނުންކުރާ މީހުންގެ އަދަދު ވެސް އެރަށެއްގެ ކައުންސިލުން ދަނެގަންނަން ޖެހެ އެވެ.
އޭގެ ތެރޭގައި ސަރުކާރުގެ ވުޒާރާތަކުގެ ނަމުގައި އެތެރެކުރެވޭނެ، ވެހިކަލް ތަކުގެ އަދަދު ވެސް ކަނޑައެޅިގެން ދާނެ އެވެ. ސިނާއީ ރަށްރަށުގައި ނުވަތަ ރިސޯޓްތަކުގައި ދުއްވޭނެ ވެހިކަލްތަކުގެ އަދަދު ފާސްކުރާނީ މިނިސްޓްރީ އިންނެވެ.
ޓްރާންސްޕޯޓް މިނިސްޓްރީގެ މި ގަވާއިދާއި އިރުޝާދުގެ މަތިން އުޅަނދުތައް ކަނޑައެޅުމަށް ކުރަން ޖެހޭ މަސައްކަތް ކުރަން ޖެހެނީ ކައުންސިލުންނެވެ. އެއަށްފަހު ހޯދާ ހުރިހާ މައުލޫމާތުގެ އަލީގައި ތައްޔާރު ކުރާ ރިޕޯޓާއި، އެސެސްމެންޓް މިނިސްޓްރީއަށް ހުށަހަޅަންޖެހެ އެވެ. އެ އެއްޗެހި ބެލުމަށްފަހު ކައުންސިލުން ކަނޑައަޅާފައިވާ އަދަދު މިނިސްޓްރީން އާންމު ކުރާނެ އެވެ.
އެ އަދަދު އާންމުކުރާތާ ހަ މަހުގެ ތެރޭގައި އެ ރަށެއްގެ ވެހިކަލްތައް އެ ގަވާއިދުގެ ތެރެއަށް ފެއްތުމަށް މިއަދު ގެޒެޓް ކުރި އުސޫލުން ލާޒިމް ކުރެ އެވެ.
