ލަންޑަން (ޑިސެމްބަރު 15) - ކޮވިޑް-19ގެ އޮމިކްރޮން ވޭރިއަންޓާ ގުޅިގެން އެ ބަލި ފެތުރުން އިތުރުވެފައިވާތީ، އިނގިރޭސި ޕްރިމިއާ ލީގުން ކޮވިޑް-19އާ ގުޅިގެން އަޅާފައިވާ ފިޔަވަޅުތައް ވަރުގަދަކޮށްފި އެވެ.
އޮމިކްރޮން ވޭރިއަންޓާ ގުޅިގެން ކޮވިޑް-19 ފެތުރޭ މިންވަރު އިތުރުވެފައިވާއިރު، ޕްރިމިއާ ލީގަށް ވެސް ވަނީ އޭގެ އަސަރުކޮށްފަ އެވެ. ފާއިތުވި ހަތް ދުވަހުގެ ތެރޭގައި ޕްރިމިއާ ލީގުގެ ކްލަބުތަކުން 42 މީހެއް ވަނީ ކޮވިޑަށް ޕޮޒިޓިވްވެފަ އެވެ. މިއީ ޕްރިމިއާ ލީގުން ކޮވިޑް ޓެސްޓްކުރަން ފެށި ފަހުން، ހަފުތާއެއްގެ މުއްދަތެއްގައި ތެރޭގައި ޕްރިމިއާ ލީގުން އެންމެ ގިނައިން މީހުން ޕޮޒިޓިވްވި ފަހަރެވެ.
މެންޗެސްޓާ ޔުނައިޓަޑާއި ޓޮޓެންހަމް ހޮޓްސްޕާ ޓީމުގެ ތެރޭގައި ކޮވިޑް ކޭސްތަކެއް ފެނި، އެ ދެ ކްލަބު ކުޅެން އޮތް މެޗުތަކެއް ވަނީ ފަސްކޮށްފަ އެވެ. މީގެ އިތުރުން ބްރައިޓަން، އެސްޓަން ވިލާ، ލެސްޓާ ސިޓީ އަދި ނޯވިޗްގެ ޓީމުން ވެސް ވަނީ ކޮވިޑްގެ ޕޮޒިޓިވް ކޭސްތައް ފެނިފަ އެވެ.
ޕްރިމިއާ ލީގުގެ ކްލަބުތަކުގައި ކޮވިޑް ފެތުރުން ހުއްޓުވުމުގެ ގޮތުން، ޕްރިމިއާ ލީގުން ވަނީ ފިޔަވަޅުތައް ވަރުގަދަކޮށްފަ އެވެ. އެގޮތުން އެޅި އެންމެ މުހިންމު ފިޔަވަޅަކީ ކްލަބުގެ ޓްރެއިނިންނަށް ވެސް ކުޅުންތެރިން އަންނައިރު ކުޅުންތެރިންނާއި އޮފިޝަލުން ވެސް ކޮވިޑް ޓެސްޓް ކުރުމެވެ. މީގެ އިތުރުން މާސް އެޅުމާއި، ގައިދުރުކުރުމުގެ ފިޔަވަޅުތައް ވެސް ވަނީ ހަރުކަށިކޮށްފަ އެވެ.
ކްރިސްމަސް ބަންދު ބޯމަތިވެފައިވާއިރު، މިއީ އާންމުކޮށް ޕްރިމިއާ ލީގުގެ މެޗުތައް ކައިރިކައިރީގައި ކުޅޭ ދުވަސްވަރެކެވެ. އެހެންކަމުން، މި ދުވަސްވަރު ކުޅެންޖެހޭ މެޗުތައް ފަސްވުމަކީ ކްލަބުތަކުން ބޭނުންވާ ގޮތެއް ނޫނެވެ.
އިންގްލެންޑުން ކޮވިޑް އެޅި ފިޔަވަޅުތައް ޖުލައި މަހު އުވާލުމާއެކު، ޕްރިމިއާ ލީގުގެ ކްލަބުތަކުން ވަނީ ދަނޑަށް މީހުން ވައްދަން ފަށައިފަ އެވެ. އެހެން ނަމަވެސް، އިނގިރޭސި ސަރުކާރުގެ ނިންމުމަކާ ގުޅިގެން، ބުދަ ދުވަހުން ފެށިގެން ޕްރިމިއާ ލީގުގެ މެޗުތަކަށް ވަދެވޭނީ ނެގަޓިވް ޕީސީއާރް ޓެސްޓެއް ނުވަތަ ވެކްސިންގެ ދެ ޑޯޒް ފުރިހަމަކުރިކަމުގެ ލިިޔުމަކާއެކު އެވެ. -- ބީބީސީ
