އެންޓި ކޮރަޕްޝަން ކޮމިޝަން (އޭސީސީ)ގެ މެންބަރުން ވަކިކުރުމުގެ މައްސަލަ އެޖެންޑާކޮށް އެކަމާމެދު ގޮތެއް ނިންމުމަށް ރައްޔިތުންގެ މަޖިލީހުގެ ދައުރުން ބޭރު ޖަލްސާއެއް ބޭއްވުމަށް ވެރިކަން ކުރާ ކޯލިޝަނުގެ މައި ޕާޓީ އެމްޑީޕީން ހުށަހަޅައިފި އެވެ.
މަޖިލީހުގެ ސުޕަ މެޖޯރިޓީ އޮންނަ އެމްޑީޕީގެ ޕީޖީ ގުރޫޕްގެ ލީޑަރު އާދަމް އާޒިމް ވިދާޅުވި ގޮތުގައި މަޖިލީހުގެ ގަވައިދުގެ ދަށުން އެމްޑީޕީގެ ޕީޖީ ގުރޫޕުން ދައުރުން ބޭރު ޖަލްސާއެއް އެޖެންޑާކޮށްދިނުމަށް މަޖިލީހުގައި އެދިފައިވަނީ އެ ޕާޓީ ތަމްސީލް ކުރާ 65 މެމްބަރުންގެ ތެރެއިން 31 މެމްބަރުންގެ ސޮއިއާއެކު އެވެ.
އެކަމާ ގުޅިގެން މަޖިލީހުގެ ކޮމިޔުނިކޭޝަންސް ޑިރެކްޓަރު ހަސަން ޒިޔާއު "އަދަދު"އަށް ވިދާޅުވީ ދައުރުން ބޭރުން ޖަލްސާއެއް ބާއްވައި ދިނުމަށް އެދި އެމްޑީޕީން މިއަދު ހުށަހަޅާފައިވާ ކަމަށެވެ.
"އެ އެދުމާ ގުޅިގެން ޖަލްސާއެއް ބޭއްވުމުގެ މަސައްކަތް މަޖިލީހުގެ ރައީސް އަންނަނީ ކުރައްވަމުން. އެ ޖަލްސާ ތާވަލުކުރާނީ މާދަމާ ނޫނީ ހޯމަ ދުވަހަށްތޯ އަދި ނުނިންމަވާ،" ޒިޔާއު ވިދާޅުވި އެވެ.
އޭސީސީގެ މެމްބަރުން ވަކިކުރަނީ ކީއްވެ؟
އޭސީސީގެ ފަސް މެންބަރުން ވެސް ވަކިކުރުމުގެ މަސައްކަތް ފެށުމަށް މިދިޔަ ބުރާސްފަތި ދުވަހު މަޖިލީހުގެ މިނިވަން މުއައްސަސާތަކާ ބެހޭ ކޮމިޓީން ވަނީ ނިންމާފަ އެވެ.
މަޖިލީހުގެ މިނިވަން މުއައްސަސާތަކާ ބެހޭ ކޮމެޓީގެ ފަރާތުން ކޮރަޕްޝަންގެ މައްސަލަތައް ބަލާ ކޮމިޝަނުގެ ފަސް މެމްބަރުން ވަކި ކުރުމަށް ނިންމީ އޮޑިޓް އޮފީސް މެދުވެރިކޮށް އޭސީސީގެ ޕާފޯމަންސް އޮޑިޓެއް ހެދުމަށްފަހު އެވެ.
އޭސީސީގެ މެމްބަރުން މަގާމުން ވަކި ކުރުމަށް ފާސްކޮށްފައި ވަނީ ވެރިކަން ހިންގާ އެމްޑީޕީގެ އަގުލަބިއްޔަތު އޮންނަ ކޮމެޓީއަށް ހާޒިރުވި އަށް މެމްބަރުންގެ ތެރެއިން ހަތް މެމްބަރުންގެ ވޯޓުންނެވެ. މެމްބަރުން ވަކިކުރަން ނުފެންނަ ކަމަށް ވޯޓު ދެއްވީ ވިލިމާލޭ ދާއިރާގެ މެމްބަރު އަހުމަދު އުޝާމް އެކަންޏެވެ.
ވަކިކުރުމަށް ނިންމި އޭސީސީގެ ފަސް މެންބަރުންނަކީ މަރިޔަމް ޝިއުނާ (ރައީސް) އާއި ފާތުމަތު އަނޫލާ އާއި އިބްރާހިމް ޝަކީލާއި އައިޝަތު އަބްދުﷲ އަދި އަލީ އަޝްރަފެވެ. މީގެތެރެއިން އަލީ އަޝްރަފު ވަނީ މިދިޔަ ހަފުތާގެ ތެރޭ އިސްތިއުފާ ދެއްވާފަ އެވެ.
އޮޑިޓްގައި ފާހަގަކޮށްފައިވާ ގޮތުގައި އޭސީސީއަށް އެކަށީގެންވާ މިންވަރަކަށް މައްސަލަތައް ނުބެލެ އެވެ. ނުނިމި ގިނަ ދުވަސްވެފައިވާ މައްސަލަތައް ގިނަކަން ފާހަގަކޮށް އޭސީސީން ކޮމިޝަނަށް ލިބިފައިވާ ބާރުގެ ބޭނުން ނުކުރާކަން ވެސް ފާހަގަ ކޮށްފައިވެ އެވެ.
ވަކިކުރަން ނިންމި ދުވަހު އޭސީސީގެ ރައީސް ޝިއުނާ ވިދާޅުވި ގޮތުގައި ކޮރަޕްޝަން ހުއްޓުވައި މުއައްސަސާއެއްގެ މިނިވަން ކަމާއި މިނިވަންކަމާއެކު މަސައްކަތް ކުރުމުގެ ޖާގަ އޮތުމަކީ ވަރަށް މުހިންމު ކަމެކެވެ.
"އަޅުގަނޑުމެން މި މަސައްކަތް ކުރަނީ ވަރަށް ބައިވަރު ޗެލެންސްތަކާއެކު, އަޅުގަނޑުމެންނަށް މިނިވަންކަމާއެކު މަސައްކަތް ކުރަން ޖާގަ ދޭން ޖެހޭ," ޝިއުނާ ވިދާޅުވި އެވެ.
"އަޅުގަނޑު އަބަދުވެސް މި މަގާމުގައި މަސައްކަތް ކުރަނީ މާދަމާ ވެސް މި މަގާމުން ވަކިވެގެން ދާން ޖެހިދާނެ ކަމަށް, މިތަނަށް އަންނަ މެންބަރުންނަކީ ވަގުތީ މެންބަރުން, އެކަމަކު މުއައްސަސާއަކީ ދާއިމީ ތަނެއް, ކޮރަޕްޝަނާ ދެކޮޅަށް ކުރާ މަސައްކަތަކީ އަބަދުވެސް ކުރެވެމުންދާ ކަމެއް,"
ޝިއުނާ ވިދާޅުވީ, އޭނާ އެ މަގާމު ނެތި އެހެން ބަޔަކު މަގާމަށް އަޔަސް އޭސީސީއަށް އެކަށީގެންވާ ނަތީޖާ ނެރެވޭނީ މަސައްކަތް ކުރާނެ ޖާގަ ލިބި, ވަސީލަތްތައް ލިބި, ނިޒާމީ ބަދަލުތަކެއް އައިސްގެން ކަމަށެވެ.
"އެންމެ ބޮޑަށް ފާހަގަކޮށްލަން ބޭނުންވާ ކަމަކީ ޕޮލިޓިކަލް ވިލް, ސިޔާސީ ނިޔަތް އެ ގައުމެއްގައި އޮންނަން ޖެހޭ ކޮރަޕްޝަން ހުއްޓުވުމަށް," ޝިއުނާ ވިދާޅުވި އެވެ.
