ޕެރިސް (ޑިސެމްބަރު 13) - ފްރެންޗް ލީގުގައި ރޭ ކީލިއަން އެމްބާޕޭގެ ގޯލުތަކުން ޕީއެސްޖީން 2-0 އިން މޮނާކޯގެ މައްޗަށް ކުރިހޯދައި ލީގުގެ އެއް ވަނައިގައި 13 ޕޮއިންޓުގެ ލީޑެއް ނަގައިފި އެވެ.
ފްރެންްްޗް ލީގުގެ އެއް ވަނައިގައި ޕީއެސްޖީ އޮތީ 18 މެޗުން 45 ޕޮއިންޓާ އެކު އެވެ. ދެ ވަނައިގައި އޮތް މާސޭ އަށް 17 މެޗުން ލިބިފައިވަނީ 32 ޕޮއިންޓެވެ. ރޭ މާސޭ އިން ވަނީ ސްޓްރާސްބޯ ދަނޑުގައި 2-0 އިން މޮޅުވެފަ އެވެ. ރެނެސް ރޭ އަމިއްލަ ދަނޑުގައި 2-1 އިން ނީސް އަތުން ބަލިވެ، ތިން ވަނަ އަށް ވެއްޓުނީ އެވެ. ރެނެސް އަށް ލިބިފައިވަނީ 18 މެޗުން 31 ޕޮއިންޓެވެ.
ޕީއެސްޖީ ދަނޑުގައި ކުޅުނު ރޭގެ މެޗަށް އެ ޓީމުން ނުކުތީ ޖޯޒީގައި ރަން ކުލައިން ނަމްބަރާއި ނަން ޖަހައިގެންނެވެ. އެއީ ދާދި ފަހުން ހަތް ވަނަ ފަހަރަށް ބެލޮންޑިއޯ އެވޯޑް ހޯދި, ޕީއެސްޖީގެ ލިއޮނަލް މެސީގެ ކާމިޔާބަށް ހާއްސަ ކުރުމުގެ ގޮތުންނެވެ.
ރޭގެ މެޗު ފަށައިގެން 12 ވަނަ މިނިޓްގައި ޕީއެސްޖީ އަށް ލީޑުނަގައިދިނީ އެމްބާޕޭ އެވެ. ކުރިން މޮނާކޯ އަށް ކުޅުނު އެމްބާޕޭ އެ ޓީމު ކޮޅަށް ޕީއެސްޖީ އަށް ކުރިހޯދައިދިނީ ޕެނަލްޓީ އަކުންނެވެ. މިއީ މޮނާކޯގެ ޖިބްރީލް ސިޑީބޭ ޕީއެސްޖީގެ އެންހެލް ޑި މާރިއާ އަށް ކުރި ފައުލަކަށް ދިން ޕެނަލްޓީ އެކެވެ. ޕެނަލްޓީ ދޭން ނިންމީ ވީޑިއޯ އެސިސްޓަންޓް ރެފްރީ (ވީއޭއާރް) އިން ބެލުމަށް ފަހު އެވެ.
ފުރަތަމަ ހާފުގެ އިތުރު ވަގުތުގައި އެމްޕާބޭ ޕީއެސްޖީގެ ދެ ވަނަ ގޯލު ޖެހި އެވެ. މިއީ ކައުންޓަ އެޓޭކެއްގައި މެސީ ހަމަޖެހިލާފައި އެމްބާޕޭ އަށް ދިނުމުން އޭނާ ގޯލުގެ ދުރު ކަނަށް ބޯޅަ ފޮނުވާލައިގެން ޖެހި ގޯލެކެވެ. ރޭގެ މެޗުގައި ޖެހި ގޯލުތަކާ އެކު އެމްބާޕޭ ވަނީ ފްރެންޗް ލީގުގައި ޕީއެސްޖީ އަށް 100 ގޯލު ހަމަކޮށްފަ އެވެ.
އުމުރުން 22 އަހަރުގެ އެމްބާޕޭ އަކީ ފްރެންޗް ލީގުގެ ތާރީހުގައި އެއް ޓީމަކަށް 100 ގޯލު ޖެހި އެންމެ ޒުވާން ކުޅުންތެރިޔާ އެވެ. ޕީއެސްޖީއާ ގުޅުމުގެ ކުރިން ލީގުގައި އެމްބާޕޭ ވަނީ މޮނާކޯ އަށް 16 ގޯލު ޖަހައިދީފަ އެވެ.
