ކ. ގުރައިދޫގައި ސަރުކާރުން ހިންގާ މަރުކަޒު އޮތީ ވަރަށް ދަށް ހާލަތެއްގައިކަން ފާހަގަކޮށް، އެތަނަށް މުވައްޒަފުންނާއި ބަޖެޓާއި ސިއްހީ ހިދުމަތްދެވޭނެ ގޮތް ވީހާ ވެސް އަވަހަކަށް ހަމަޖެއްސުމަށް އދ. ގެ ވޯކިން ގްރޫޕް އޮން އާބިޓްރަރީ ޑިޓެންޝަނުން މިއަދު ގޮވާލައިފި އެވެ.
ސަރުކާރުގެ ދައުވަތަށް ރާއްޖެ އައިސް 10 ދުވަހުގެ ތަހުގީގަކަށްފަހު މިއަދު ބޭއްވި ނޫސްވެރިންގެ ބައްދަލުވުމެއްގައި ވޯކިން ގްރޫޕްގެ މެމްބަރު ޕްރިޔާ ގޮޕަލާން ވިދާޅުވީ މަރުކަޒުގައި ބަންދު ކުރާ މީހުންނަށް ފަރުވާ ދިނުމަށް ބޭނުންވާ މިންވަރާ ގާތް ކުރާ އަދަދަށް ވެސް އެތަނުގައި މުވައްޒަފުން ނެތް ކަމަށެވެ.
"މުވައްޒަފުން މަސައްކަތަށް ވަރަށް ޑެޑިކޭޓެޑް. އެމީހުންގެ މަސައްކަތް ފާހަގަކޮށް ތައުރީފް ކުރަންޖެހޭ. އެކަމަކު، ޑޮކްޓަރުންނާއި އިތުރު މުވައްޒަފުންނާއި ބަޖެޓު އެތަނަށް ބޭނުންވޭ،" އޭނާ ވިދާޅުވި އެވެ.
ގުރައިދޫ މަރުކަޒުގައި ތިބޭ މީހުންނާމެދު މުޖުތަމައިން ދެކޭ ގޮތް ވެސް ބަދަލު ކުރަންޖެހޭ ކަމަށް ޕްރިޔާ ވިދާޅުވި އެވެ.
"ފާހަގަ ކުރަންޖެހޭ ކަމަކީ ނުކުޅެދުންތެރިކަން ހުންނަ މީހުންނާމެދު މުޖްތަމައިން ދެކޭ ނުރަނގަޅު ގޮތް. މިއީ ވަރަށް ސީރިއަސް މައްސަލައެއް. ބައެއް މީހުން މަރުކަޒުން ދޫކޮށްލުމުން ވެސް ތިބެނީ އެތަނުގައި. ސަބަބަކީ އާއިލާއިން އެމީހުން ބަލައިނުގަތުން. އަދި މިފަދަ ހާލަތްތަކުގައި އެމީހުންދާނެ އިތުރު ތަނެއް ސަރުކާރަކުން ނުދައްކާ،" އޭނާ ވިދާޅުވި އެވެ.
އޭގެ އިތުރުން، އެ ބައްދަލުވުމުގައި ވޯކިން ގްރޫޕުގެ ޗެއާ ޑރ. އެލީނާ ސްޓެއިނާޓް ވިދާޅުވީ ސަރުކާރާއި ދިވެހި މުޖުތަމައިން ވެސް ނުކުޅެދުންތެރިކަން ހުންނަ މީހުންނާމެދު އިތުރަށް އަޅާލުންބަހައްޓަންޖެހޭ ކަމަށެވެ.
"ގުރައިދޫ ސެންޓަރަށް ސަރުކާރުގެ މާ ބޮޑު ސަމާލުކަމެއް ލިބޭކަން އަޅުގަނޑުމެންނަށް ފާހަގައެއް ނުކުރެވޭ. ދިވެހިން މުޖްތަމައިން ވެސް އެމީހުންނަށް އިތުރަށް އަޅާލައި، ނުކުޅެދުންތެރިކަން ހުންނަ، ސަޕޯޓާއި އަޅާލުން ބޭނުންވަ މީހުން ވެސް އުޅޭކަން ދަނެ، އެމީހުންގެ މަތިން ހަނދާންނައްތާނުލާ،" އޭނާ ވިދާޅުވި އެވެ.
ރާއްޖެއަށް ކުރި ދަތުރުގެ ރަސްމީ ރިޕޯޓެއް އަދި އދ. ގެ ވޯކިން ގްރޫޕުން އެކުލަވާލާނެ އެވެ. އަދި އެ ރިޕޯޓް އަންނަ އަހަރު އދ. ގެ ހިއުމަން ރައިޓްސް ކައުންސިލަށް ހުށަހަޅާނެ އެވެ.
