މިއީ ދެން ހަމައެކަނި ފިލްމުތަކުގައި ފެންނާނެ މަންޒަރެއް ނޫނެވެ. ނެދާލޭންޑްސްގެ ކުންފުންޏެއް ކަމަށްވާ ޕާލް-ވީން އިން އުދުހޭ ކާރުގެ ހުވަފެން މި ވަނީ ހަގީގަތަކަށް ބަދަލުކޮށްލައިފަ އެވެ.
އެއީ މީގެ ކުރިން ފިލްމުތަކާއި ވާހަކަތަކުގައި އެންމެ ފޯރިގަދަކޮށް ދެކެވުނު އެއް ވާހަކަ އެވެ. އުދުހޭ ކާރެއް ދުއްވާ މަންޒަރު ފިލްމުތަކުން ނޫނީ ނުފެންނާނެ ކަމަށް އޮތީ ހީކުރެވިފަ އެވެ. އެކަން ކުށްހީއަކަށް ބަދަލުވެ، އުދުހޭ ކާރު ބާޒާރަށް ނެރުމުގެ ވަގުތު ވަނީ ކައިރިވެފަ އެވެ.
ނެދާލޭންޑްސްގެ ކުންފުންޏެއް ކަމަށްވާ ޕާލް-ވީން އުފެއްދި އުދުހޭ ކާރު، ލިބަޓީ ވަނީ އެންމެ ފަހުން ބޭއްވި ގުޑް ވުޑްސް ފެސްޓިވަލް އޮފް ސްޕީޑްގައި ދައްކާލައިފަ އެވެ.
ކުންފުނިތަކުން އުފައްދާފައިވާ ކާރުތައް ދައްކާލުމަށް ބޭއްވާ މި ފެސްޓިވަލްގައި ދުނިޔޭގެ ބޮޑެތި އެތައް ކުންފުންޏެއްގެ ކާރު ޑިޒައިންތައް ދައްކާލަ އެވެ. މިފަހަރުގެ ފެސްޓިވަލްގައި އުދުހޭ ކާރު ވެގެންދިޔައީ އެެހެން ހުރިހާ ކާރުތަކުގެ ތެރެއިންވެސް އެންމެ ފާހަގަކޮށްލެވޭ ކާރަށެވެ.
ދެ މީހުންނަށް ތިބެވޭ ގޮތަށް ފަރުމާކޮށްފައިވާ އެ ކާރުގައި އުދުހިފައި 300 މޭލުގެ ދިގު ރާސްތާ އަކަށް ތިން ގަޑިއިރުގެ ތެރޭގައި ދެވެ އެވެ. އެއީ ޕެޓްރޯލް އަޅައިގެން ދުއްވާ ހަމަ ކާރެކެވެ. ނަމަވެސް އެންމެ ދިހަ މިނެޓުގެ ތެރޭގައި މަތިންދާ ބޯޓަކަށް ބަދަލުވެލުމުގެ ގާބިލްކަން ލިބިފައިވެ އެވެ.
ޓެސްޓުކުރުމުގެ މަރުހަލާތަކުގެ ތެރޭގައި މި ކާރު ވަނީ 142 ލޭންޑިން ކާމިޔާބުކަމާއެކު ފުރިހަމަކޮށްފަ އެވެ. މިހާރު ކުރިއަށް ދަނީ ބާޒާރަށް ނެރުމުގެ އެންމެ ފަހު މަސައްކަތްތަކެވެ.
މި ކާރުގެ އަގުގެ ގޮތުގައި ކަނޑައަޅާފައި ވަނީ 356،000 ޔޫއެއްސް ޑޮލަރެވެ. ފުރަތަމަ އުފައްދާ 350 ކާރު ވިއްކުމަށް ހަމަޖެހިފައިވަނީ 593،000 އެމެރިކާ ޑޮލަރަށެވެ.
