މޯލްޑިވްސް ޕޯސްޓް ލިމިޓެޓް (އެމްޕީއެލް)ގެ ބެލުމުގެ ދަށުގައި އޮތް ޓީޖެޓީ ހަވާލުކުރަން ދިން މުއްދަަތުގައި އެކަން ނުކޮށްފިނަމަ، "ގަދަކަމުންވެސް އެ ޖެޓީ އަތުލާނެ" ކަމުގެ އިންޒާރު ސިޓީ ކައުންސިލުން ދީފި އެވެ.
އިދިކޮޅު ޕީޕީއެމްގެ މެޖޯރިޓީ އޮންނަ މާލެ ސިޓީ ކައުންސިލުންގެ ހަތަރު ވަނަ ދައުރުގެ 30 ވަނަ ރަސްމީ ޖަލްސާގައި މިއަދު ފާސްކުރީ އެމްޕީއަލްއަށް ދީފައިވާ 90 ދުވަހުގެ މުއްދަތު ތެރޭގައި ޓީޖެޓީ، މާލެ ސިޓީ ކައުންސިލާ ހަވާލު ނުކޮށްފިނަމަ، އެ ޖެޓީ ހޯދުމަށް ކުރަން ޖެހޭ ހުރިހާ މަސައްކަތެއް ކުރުމަށެވެ.
އެ މުއްދަތު ހަމަވާނީ އަންނަ ހަފްތާގެ އާދީއްތަ ދުވަހަށެވެ.
މާލެ ސިޓީ ކައުންސިލްގެ ޑެޕިއުޓީ މޭޔަރު، އަހަމަދު ނަރީޝް މި ނޫހަށް ވިދާޅުވީ ޖެޓީ ހޯދަން ކޯޓަށް ދާން ޖެހެއްޖި ނަމަ އެކަން ވެސް ކުރާނެ ކަމަށެވެ.
"މިއީ އަސްލު ކޯޓަށް ދާންވެސް ޖެހޭ މައްސަލައެއް ނޫން. އެއީ ޕްލޭނިން މިނިސްޓްރީން އެމްޕީއެލްއަށް ޓީ ޖެޓީ ދިނީ ތިން އަހަރަށް، އެ މުއްދަތު ހަމަވެއްޖެ މިހާރު. އެހެންވީމަ މިހާރު އެއީ ސިޓީ ކައުންސިލްގެ ތަނެއް. އެހެންނަމަވެސް އެތަން އެމްޕީއެލަށް ދީފައިވާ މުއްދަތުގެ ތެރޭގައި ނުދީފިނަމަ، އަތުލަން ކުރަން ޖެހޭ ހުރިހާ ކަމެއް ކުރާނަން. ކޯޓަށްވެސް ދާނަން." ނަރީޝް ވިދާޅުވި އެވެ.
މި މައްސަލައާ ގުޅިގެން ދާދިފަހުން ބޭއްވި ނޫސްވެރިންގެ ބައްދަލުވުމެއްގައި މުއިއްޒު ވިދާޅުވީ މިހާރު އެމްޕީއެމްގެ ބެލުމުގެ ދަށުގައި އޮތް ޓީޖެޓީ, އަނެއްކާ ވެސް ސިޓީ ކައުންސިލާ ހަވާލުކޮށްދިނުމަށް ސަރުކާރުގައި ހަތަރު ފަހަރަށް އެދެފައިވާނެ ކަމަށެވެ. ނަމަވެސް އެތަން ދިނުމަށް ރައީސް އޮފީހުން އުޒުރުވެރިވި ކަމަށް މޭޔަރު ވިދާޅުވި އެވެ.
އޭނާ ވިދާޅުވި ގޮތުގައި ޓީޖެޓީ ބަލަހައްޓަން ސަރުކާރާއެކު އެމްޕީއެލުން ހަދައިފައިވާ އެގްރީމެންޓުގެ މުއްދަތު މިހާރު ވަނީ ހަމަވެފަ އެވެ. އެހެންކަމުން ގާނޫނީ ގޮތުން މިހާރު އެއީ ކައުންސިލްގެ ތަނެއް ނަމަވެސް، އެތަނުން އާމްދަނީ ހޯދުމުގެ ފުރުސަތު އެއްކޮށް ބަންދުވެފައިވާ ކަމަށް މުއިއްޒު ގަބޫލުކުރައްވަ އެވެ.
"އެމްޕީއެލާ ރައީސް އޮފީހުގަ އެދުނީ ޓީޖެޓީ އަލުން ކުރީގެ ގޮތަށް ސިޓީ ކައުންސިލަށް ހަވާލުކޮށްދިނުމަށް. އެއީ ރައްޔިތުންނަށް ބޭނުންވާ މުހިންމު ހިދުމަތްތައް ދިނުމަށް. އެތަނުން ލިބޭ އާމްދަނީން ސިޓީ ކައުންސިލުން ވަރަށް ގިނަ ކަންކަން ކުރެވޭނެ،" މުއިއްޒު ވިދާޅުވި އެވެ.
މާލެ ސިޓީގެ މޭޔަރު ޑރ. މުހައްމަދު މުއިއްޒު --
"ކޮންމެ މަހަކު ފުދޭވަރެއްގެ ބޮޑު އާމްދަނީއެއް ލިބޭ ތަނެއް އެއީ. އެ ހުރިހާ ފައިސާއެއް ލިބެނީ އެމްޕީއެލް އަށް. އެ ފައިސާ ލިބިއްޖެ ނަމަ ބޭނުން ކުރެވޭނެ ކުނި މެނޭޖު ކުރުން ފަދަ އާމްދަނީ އިތުރުކުރަން ބޭނުންވާ ކަންކަންކަށް،"
ސިޓީ ކައުންސިލަށް ނުދޭން ނިންމި ނިންމުމަކީ ލާމަރުކަޒީ ގާނޫނާ ހިލާފަށް މާލޭ ރައްޔިތުންގެ ލާބަޔާއި މަންފާއާ ދެކޮޅަށް ނިންމެވި ނިންމުމެއް ކަމަށް ސިފަކުރައްވައި މުއިއްޒު ވަނީ ސަރުކާރަށް ވަރަށް ބޮޑަށް ފާޑުވިދާޅުވެފަ އެވެ.
