ސައުދީ އަރަބިއްޔާގެ ނޫސްވެރިޔާ ޖަމާލް ހަޝޮގްޖީގެ މަރުގައި ބައިވެރިވުމެއްވާ ކަމަށް ތުހުމަތު ކުރެވޭ ސައުދީ މީހަކު ފްރާންސް އިން ހައްޔަރުކޮށްފި އެވެ.
ފްރާންސްގެ ފުލުހުން ބީބީސީ އަށް ކަށަވަރުކޮށްދިން ގޮތުގައި ހާލިދް އައިދް އަލޮތައިބީ ހައްޔަރު ކުރީ އަންގާރަ ދުވަހު ޕެރިހުގައި ހުންނަ ޗާލްސް ޑެ ގޯލް އެއާޕޯޓުންނެވެ.
ލަފާކުރެވޭ ގޮތުގައި އޭނާ އަކީ ހަޝޮގްޖީގެ މަރާ ގުޅިގެން ތުރުކީ އިން ހޯދަމުންދާ ސައުދީގެ 26 މީހުންގެ ތެރެއިން އެކެކެވެ.
ސައުދީ އޮފިޝަލަކު ބުނީ އޭނާ ހައްޔަރު ކުރީ އޮޅިގެން ކަމަށާއި ހަޝޮގްޖީ މަރާލުމުގައި ބައިވެރިވި އެންމެންނަށް ސައުދީ އަރަބިއްޔާގައި ކުށް ސާބިތުވެފައިވާ ކަމަށެވެ.
އުމުރުން 33 އަހަރުގެ އަލޮތައިބީ އަކީ ކުރިން ސައުދީގެ ޝާހީ ގާޑެކެވެ. އޭނާ މި ވަގުތު ހުރީ ކޯޓު މެދުވެރިކޮށް ބަންދުކޮށްފައި ކަމަށް އާރްޓީއެލް ރޭޑިއޯ އިން ބުންޏެވެ.
ސައުދީ ސަރުކާރަށް ވަރަށް ބޮޑަށް ފާޑުކިޔަމުން ދިޔަ ހަޝޮގްޖީ މަރާލީ އިސްތަންބޫލްގައި ހުންނަ ސައުދީ ކޮންޒިއުލޭޓް ތެރޭގައި 2018 ވަނަ އަހަރު އެވެ.
ތުރުކީ އިން ތުހުމަތު ކުރާ ގޮތުގައި އޭނާ މަރާލީ ސައުދީ ސަރުކާރުގެ އެންމެ އިސްވެރިންގެ އެންގުމަކަށެވެ. ނަމަވެސް ސައުދީ އިން އެކަން ދޮގުކުރެ އެވެ.
ހަޝޮގްޖީގެ މަރަށް ފަހު އެންމެ ބޮޑު ފާޑުކިޔުމެއް އަމާޒުވީ ސައުދީ ވަލީ އަހުދު މުހައްމަދު ބިން ސަލްމާން އަށެވެ. ނަމަވެސް އެމަނިކުފާނު ވަނީ ތުހުމަތުތައް ދޮގުކުރައްވާފަ އެވެ.
ސައުދީގެ ކޯޓަކުން 2019 ވަނަ އަހަރު ޝަރީއަތް ކުރުމަށް ފަހު ނަން ހާމަނުކުރާ އަށް މީހެއްގެ މައްޗަށް ހަޝޮގްޖީ މަރާލި ކަމަށް ސާބިތުވި އެވެ.
އޭގެ ތެރެއިން ފަސް މީހުންނަކީ ހަޝޮގްޖީ މަރާލުމުގައި ސީދާ ބައިވެރިވި މީހުންނެވެ. އެ މީހުންނަށް އިއްވި މަރުގެ ހުކުމް ފަހުން ވަނީ 20 އަހަރުގެ ޖަލު ހުކުމަށް ބަދަލުކޮށްފަ އެވެ.
އިތުރު ތިން މީހުންގެ މައްޗަށް ސާބިތުވީ އެ ހާދިސާ ސިއްރު ކުރި ކަމަށެވެ. އެ މީހުންނަށް އިއްވީ ހަތް އަހަރާއި 10 އަހަރާ ދެމެދުގެ ޖަލު ހުކުމްތަކެވެ.
ހަޝޮގްޖީ އަކީ އަމިއްލަ އަށް ގައުމުން އަރުވާލެވިގެން އެމެރިކާގައި ދިރިއުޅެމުން ދިޔަ ސައުދީ ނޫސްވެރިއެކެވެ. އޭނާ ވަނީ ސައުދީ ވަލީ އަހުދަށް ވަރަށް ބޮޑަށް ފާޑުކިޔައި ކޮލަމްތައް ދަ ވޮޝިންޓަން ޕޯސްޓު ނޫހުގައި ޝާއިއުކޮށްފަ އެވެ.
އޮކްޓޯބަރު 2، 2018 ގައި ހަޝޮގްޖީ ތުރުކީގައި ހުންނަ ސައުދީ ކޮންޒިއުލޭޓުގެ ތެރެއަށް ވަނީ ހަތީސޭ އާ ކައިވެނި ކުރަން ބޭނުންވާތީ އެކަމުގެ ލިޔެކިޔުންތައް ހުށަހެޅުމަށެވެ.
އެމެރިކާ އާއި ތުރުކީގެ އޮފިޝަލުން ބުނީ ކޮންޒިއުލޭޓު ތެރޭގައި އޭނާގެ އިންތިޒާރުގައި ތިބި ގްރޫޕަކުން، އޭނާގެ ކަރުގައި ހިފައި މަރާލުމަށް ފަހު، ހަށިގަނޑުގެ ގުނަވަންތައް ވަކިކުރި ކަމަށެވެ. އޭނާގެ ހަށިގަނޑުގެ ބައިތައް މިއަދާ ހަމައަށް ވެސް ފެނިފައެއް ނުވެ އެވެ.
