ޕެރިސް (ޑިސެމްބަރު 8) - ޔުއެފާ ޗެމްޕިއަންސް ލީގުގައި މިރޭ ކީލިއަން އެމްބާޕޭގެ ރެކޯޑް ގޯލާ އެކު ޕީއެސްޖީން 4-1 އިން ކްލަބް ބްރޫޖެސް އަތުން މޮޅުވިއިރު، އިންޓަ މިލާން 2-0 އިން ބަލިކޮށް ރެއާލް މެޑްރިޑް ޗެމްޕިއަންސް ލީގުގެ ގްރޫޕް ޑީގެ އެއް ވަނަ ޓީމުގެ ގޮތު އަނެއް ބުރުގެ ޖާގަ ހޯދައިފި އެވެ.
ބްރޫޖެސް ކޮޅަށް ޕީއެސްޖީގެ އެމްބާޕޭ ވަނީ މިރޭ ހަތް މިނިޓް ތެރޭ ދެ ގޯލު ޖަހައިފަ އެވެ. މި ދެ ގޯލާ އެކު އެމްބާޕޭ ވަނީ ޗެމްޕިއަންސް ލީގުގައި 31 ގޯލު ހަމަކޮށްފަ އެވެ. އެމްބާޕޭގެ އުމުރަކީ 22 އަހަރާއި 352 ދުވަހެވެ. ކުރިން އެ ރެކޯޑް އޮތީ 23 އަހަރާއި 131 ދުވަހުން 30 ގޯލު ހަމަކުރި ލިއޮނަލް މެސީ އަތުގަ އެވެ.
މިރޭ ބްރޫޖެސް ކޮޅަށް ޕީއެސްޖީގެ މެސީ ވަނީ ދެ ގޯލު ޖަހައިފަ އެވެ. ފުރަތަމަ ގޯލު އޭރިއާބޭރުން ޖެހިއިރު، ދެ ވަނަ ގޯލު ޖެހީ ޕެނަލްޓީ އަކުންނެވެ. ބްރޫޖެސް އިން ވެސް ވަނީ މެޗުގައި ގޯލެއް ޖަހައިފަ އެވެ. ޕީއެސްޖީގެ ކީޕަރު ޖިއަންލުއީޖީ ޑޮންނަރުންމާ ކައިރިން މި ގޯލު ޖެހީ މެޓް ރިޓްސް އެވެ.
ގްރޫޕް އޭގެ އެއް ވަނަ ހޯދި މެންޗެސްޓާ ސިޓީ ގްރޫޕް ސްޓޭޖުގެ މެޗުތައް ނިންމާލީ ބައްޔަކުންނެވެ. އާރްބީ ލައިޕްޒިގު އަތުން ސިޓީ މިރޭ ބަލިވީ 2-1 އިންނެވެ. ލައިޕްޒިގުން މި މެޗުގައި ވަނީ ދެ ގޯލުގެ ލީޑެއް ނަގައިފަ އެވެ. ޑޮމިނިކް ސޮބޯޒްލާއި އާއި އަންޑްރޭ ސިލްވާގެ ގޯލުން ލައިޕްޒިގު ދެ ގޯލުގެ ލީޑެއް ނެގިއިރު، ރިޔާދު މާރޭޒް ވަނީ ގޯލެއް ޖަހައި ސިޓީ އަށް އުއްމީދެއް ހޯދައިދީފަ އެވެ. އެކަމަކު، ސިޓީގެ ކައިލް ވޯކާ އަށް ރަތް ކާޑެއް ފަހުން ދެއްކިއިރު، ދެ ވަނަ ގޯލެއް ނުޖެހި އެ ޓީމު ބަލިވީ އެވެ.
ސިޓީ ގްރޫޕް އޭގެ އެއް ވަނަ ދިޔައީ 12 ޕޮއިންޓާ އެކު އެވެ. ދެ ވަނަ އަށް ދިޔަ ޕީއެސްޖީ އަށް 11 ޕޮއިންޓް ލިބުނުއިރު، ލައިޕްޒިގު ތިން ވަނަ ހޯދީ ހަތް ޕޮއިންޓާ އެކު އެވެ. ފުލަށް ދިޔަ ބްރޫޖެސް އަށް ހަތަރު ޕޮއިންޓް ލިބުނެވެ.
މިރޭގެ މެޗަށް ނުކުތްއިރު ވެސް އިންޓަ އާއި ރެއާލަށް އޮތީ ދެ ވަނަ ބުރު ޔަގީންވެފަ އެވެ. އެހެންވެ، މެޗުގެ ވާދަވެރިކަން ބޮޑުވެފައި އޮތީ އެއް ވަނަ މަގާމަށެވެ.
ރެއާލުން ޓޯނީ ކްރޫސް އާއި މާކޯ އަސެންސިއޯގެ ގޯލުތަކުން މޮޅުވި މި މެޗުގައި އިންޓަގެ ނިކޯލޯ ބަރޭލާ އަށް ވަނީ ރަތް ކާޑެއް ދައްކައިފަ އެވެ. މި ގްރޫޕްގެ އަނެއް މެޗުން މޮލްޑޯވާގެ ޝެރިފް ޓިރާސްޕޯލާއި ޔޫކްރެއިންގެ ޝަހުތަރު ޑޮނެސްކް ވަނީ 1-1 އިން އެއްވަރުވެފަ އެވެ.
ގްރޫޕް ޑީގެ އެއް ވަނަ ރެއާލުން ހޯދީ 15 ޕޮއިންޓާ އެކު އެވެ. ދެ ވަނަ އަށް ދިޔަ އިންޓަ އަށް 10 ޕޮއިންޓް ލިބުނުއިރު، ތިން ވަނަ ހޯދި ޝެރިފް އަށް ހަތް ޕޮއިންޓް ލިބުނެވެ. ފުލަށް ދިޔަ ޝަހުތަރު ނިންމާލީ ދެ ޕޮއިންޓާ އެކު އެވެ.
