މަގާމުގައި ހުންނަވައިގެން ރަސްމީ ހައިސިއްޔަތު ނަހަމަ ގޮތުގައި ބޭނުންކޮށް ކޮރަޕްޝަންގެ އަމަލެއް ހިންގި ކަމަށް ކުރީގެ ހޯމް މިނިސްޓަރު އުމަރު ނަސީރުގެ މައްޗަށް ކޮށްފައިވާ ތުހުމަތު އޭނާ ދޮގު ކުރައްވައިފި އެވެ.
ކުށްވެރިން މޮނިޓަކުރުމަށްޓަކައި ފައިގައި އަޅުވާ ޓެގް ހޯދަން ކުންފުންޏަކާ ހަވާލުކުރީ މާލިއްޔަތު ގަވާއިދާ އެއްގޮތަށް ކަމަށާއި، ހަވާލުކުރީ އެންމެ ދަށް އަގު ހުށަހެޅި ކުންފުންޏާ ކަމަށް އުމަރު ވިދާޅުވި އެވެ.
އުމަރުގެ ހޯމް މިނިސްޓަރުކަމުގައި ޓެގާއި އެއާ ގުޅޭ އެހެން ސާމާނު ހޯދައި ހިދުމަތް ހޯދަން ހަވާލުކުރީ އޭނާގެ މަސްލަހަތު ފުށޫއަރާ ކުންފުންޏަކާ ކަމަށާއި އެ މުއާމަލާތް ކުރިއަށް ގެންދިޔައީ ބިޑުކުރުމުގެ އިޖުރާއަތްތަކާ ހިލާފަށް ކަމަށް އޭސީސީން ބުނެ އެވެ.
އެ މައްސަލައިގައި ކޮރަޕްޝަންގެ ދައުވާކޮށް ދިނުމަށް އެދި ޕްރޮސިކިއުޓަ ޖެނެރަލްގެ އޮފީހަށް މައްސަލަ ވަނީ ފޮނުވައިފަ އެވެ.
އެ ތުހުމަތުތައް ދޮގުކުރައްވައި، އުމަރު ނަސީރު އޭނާގެ ފޭސްބުކްގައި ވިދާޅުވެފައި ވަނީ އޭނާގެ މައްޗަށް ދައުވާކުރަން ފޮނުވިކަން އޭސީސީން މިއަދު އަންގާފައިވާ ކަމަށެވެ.
"މި މައްސަލައާ ގުޅޭ އިލެކްޓްރޯނިކް-ޓެގްގެ ޕްރޮޖެކްޓް މިނިސްޓްރީން ހަވާލު ކޮށްފައިވަނީ ދައުލަތުގެ މާލިއްޔަތުގެ ގަވާއިދާ އެއްގޮތްވާ ގޮތުގެ މަތިން، އާންމުކޮށް އިއުލާން ކޮށްގެން، ހުޅުވާލެވިފައިވާ ބިޑެއްގައި އެންމެ ކުޑަ އަގުހުށަހެޅި ފަރާތަށެވެ،" އުމަރު ވިދާޅުވި އެވެ.
ރިޔާސީ އިންތިހާބުގައި ވާދަކުރެއްވުމަށް ޝައުގުވެރިކަން ފާޅުކުރައްވާފައިވާ އުމަރު ވިދާޅުވީ އޭސީސީގެ ތުހުމަތުތަކާ ގުޅިގެން, އޭނާގެ ކެމްޕެއިން 90 ދުވަހުގެ މުއްދަތަށް މެދުކަނޑާލާފައިވާ ކަމަށެވެ.
"ދިވެހި ދައުލަތުގެ މަތީ މަގާމުތަކަށް އަންނަ މީހުންނަކީ ފަސްބައިގައި އެއްވެސް ކިލަނބު ކަމެއް ނެތް މީހުންނަށް ވާން ޖެހޭނެ ކަމަށް އަޅުގަނޑު އަބަދުވެސް ދެކެން،" އޭނާ ވިދާޅުވި އެވެ.
އުމަރު މިހެން ވިދާޅުވި ނަމަވެސް ކެމްޕެއިނާ ގުޅޭ ހަރަކާތްތަކެއް ފެނިގެނެއް ނުދެ އެވެ.
އޭސީސީން ނެރެފައިވާ ބަޔާނުގައި ބުނެފައިވާ ގޮތުގައި އެ ކޮމިޝަންގެ ތަހުގީގަށް ފާހަގަކުރެވުނު ކަންތައްތަކަށް ބަލާއިރު، އިލެކްޓްރޯނިކް ޓެގް ބޭނުންކޮށްގެން ކުށްވެރިން ބެލެހެއްޓުމުގެ ހިދުމަތްދޭނެ ފަރާތެއް ހޯދަން ހޯމް މިނިސްޓްރީން އޭރު ކޮށްފައިވާ އިއުލާނާ ގުޅޭ ކަންކަން ކުރިއަށް ގެންގޮސްފައި ވަނީ އާންމުކޮށް އަމަލުކުރަމުންދާ އުސޫލުގެ ބޭރުން، އުމަރު ނަސީރުގެ ބެލުމުގެ ދަށުން އަދި އޭނާގެ އިރުޝާދުގެ ދަށުންނެވެ.
އެ ކަންކަމަކީ ރަސްމީ ހައިސިއްޔަތު ނަހަމަ ގޮތުގައި ބޭނުންކޮށް ސްޓެލެވާޓް އަށް ނާޖާއިޒު ފައިދާއެއް ހޯދައިދިނުމަށްކަން އޭސީސީން ބުނެ އެވެ. އަދި މަސައްކަތް ހަވާލުކުރުން ކުރިޔަށް ގެންގޮސްފައި ވަނީ އުމަރު ނަސީރަށް ލިބިގެން ނުވާ ބާރެއް ބޭނުންކޮށް މަގާމުގެ ނުފޫޒު ނަހަމަގޮތުގައި ބޭނުންކޮށް ފައިދާ ހޯދާ ދިނުމަށް ވެސް އެ ކޮމިޝަނުން ބުނެ އެވެ.
