ކުރީގެ ހޯމް މިނިސްޓަރު އުމަރު ނަސީރު އެ މަގާމުގައި ހުންނަވައިގެން ރަސްމީ ހައިސިއްޔަތު ނަހަމަ ގޮތުގައި ބޭނުންކޮށް ކޮރަޕްޝަންގެ އަމަލެއް ހިންގި ކަމުގެ ތުހުމަތުގައި އޭނާގެ މައްޗަށް ދައުވާ ކޮށްދިނުމަށް އެދި އެންޓި ކޮރަޕްޝަން ކޮމިޝަން (އޭސީސީ) އިން ޕްރޮސެކިއުޓާ ޖެނެރަލް އޮފީހުގައި އެދިއްޖެ އެވެ.
އޭސީސީ އިން ބުނީ 2015 ވަނަ އަހަރުގެ ތެރޭގައި ކުށްވެރިންގެ ފައިގައި ޓެގް އެޅުވުމުގެ މަސައްކަތް އުމަރު ހޯމް މިނިސްޓަރުގައި ހުންނަވައި ކުރީ އޭނާއާ ވިޔަފާރީގެ ގޮތުން ގުޅުން އޮންނަ ކުންފުންޏަކާ ކަމަށެވެ.
އޭސީސީން ނެރެފައިވާ ބަޔާނުގައި ބުނެފައިވާ ގޮތުގައި އެ ކޮމިޝަންގެ ތަހުގީގަށް ފާހަގަކުރެވުނު ކަންތައްތަކަށް ބަލާއިރު، އިލެކްޓްރޯނިކް ޓެގް ބޭނުންކޮށްގެން ކުށްވެރިން ބެލެހެއްޓުމުގެ ހިދުމަތްދޭނެ ފަރާތެއް ހޯދަން ހޯމް މިނިސްޓްރީން އޭރު ކޮށްފައިވާ އިއުލާނާ ގުޅޭ ކަންކަން ކުރިއަށް ގެންގޮސްފައި ވަނީ އާންމުކޮށް އަމަލުކުރަމުންދާ އުސޫލުގެ ބޭރުން، އުމަރު ނަސީރުގެ ބެލުމުގެ ދަށުން އަދި އޭނާގެ އިރުޝާދުގެ ދަށުންނެވެ.
އެ މަސައްކަތް ހަވާލުކުރި ސްޓެލްވާޓް މޯލްޑިވްސްގެ ހިއްސާދާރުންގެ ތެރޭގައި ހިމެނޭ ހަތަރު ފަރާތަކީ އުމަރުގެ ގާތްގުޅުން އޮންނަ ފަރާތްތަކެވެ. އަދި ދެ ހިއްސާދާރުންނަކީ އޭނާގެ ވިޔަފާރި ޕާޓްނަރުން ކަމަށްވާތީ އެއީ ދައުލަތުގެ މާލިއްޔަތު ގަވާއިދުގައި ބަޔާންކޮށްފައިވާ ގޮތުގައި އުމަރުގެ މަސްލަހަތު ފުށުއަރާ ފަރާތްތަކެއްގެ ކުންފުންޏެކެވެ.
"އެހެން ނަމަވެސް، ސްޓެލްވާޓުން ދެއްކި ޓެގް ޓްރައަލް އިވެލުއޭޓް ކުރުމަށް އުމަރު ނަސީރު އަމިއްލައަށް ޓެކްނިކަލް ކޮމެޓީއެއް ކަނޑައަޅައި އެ ކޮމެޓީގެ ޗެއާގެ ގޮތުގައި އުމަރު ނަސީރު ބައިވެރިވެފައިވެއެވެ." އޭސީސީގެ ބަޔާނުގައިވެ އެވެ.
ސްޓެލްވާޓުން ގެނައި ޓެގާއި އިލެކްޓްރޯނިކް ސާމާނަކީ އެކަށީގެންވާ ތަކެތި ކަމަށް އިވެލުއޭޝަން ކޮމެޓީން ނިންމި ނަމަވެސް، މަސައްކަތް އެ ކުންފުންޏާ ހަވާލުކުރުމަށް އެ ކޮމެޓީން ނިންމާފައި ނެތް ކަމަށާއި އަދި އެ މަސައްކަތް ބިޑު ކޮމެޓީއަށް ހުށަހަޅާފައި ނެތް ކަމަށް ވެސް އޭސީސީން ބުނެ އެވެ.
މަސައްކަތް ސްޓެލްވާޓާ ހަވާލުކުރުމުގެ ހުއްދައަށް އެދި، އެ ފަރާތަށް އެޑްވާންސް ފައިސާ ދިނުމުގެ ލަފައަށް އެދި އުމަރު ނަސީރު ސޮއިކުރައްވައި ފިނޭންސް މިނިސްޓްރީ އަށް ސިޓީއެއް ފޮނުއްވާފައިވާކަން ތަހުގީގުން ފާހަގަވެފައިވެ އެވެ.
ސްޓެލްވާޓުން ބިޑު ހުށަހެޅިއިރު އެޑްވާންސްގެ ގޮތުގައި ބޭނުންވާނެ ކަމަށް ބަޔާންކޮށްފައިވާ ފަސް ލައްކަ ރުފިޔާ އެ ކުންފުންޏަށް ދީފައިވަނީ، ކުންފުނީގެ ފަރާތުން ލޯނު ނެގުމުގެ ބަދަލުގައި އެ މަސައްކަތް ފެށުމަށް ފަސޭހަކޮށް ދިނުމަށް ކަމަށް ތަހުގީގުން އެނގިފައިވާ ކަމަށް އެ ކޮމިޝަނުން ބުނެ އެވެ.
މި ކަންކަމަކީ ރަސްމީ ހައިސިއްޔަތު ނަހަމަ ގޮތުގައި ބޭނުންކޮށް ސްޓެލެވާޓް އަށް ނާޖާއިޒު ފައިދާއެއް ހޯދައިދިނުމަށްކަން އޭސީސީން ބުނެ އެވެ. އަދި މަސައްކަތް ސްޓެލްވާޓާ ހަވާލުކުރުން ކުރިޔަށް ގެންގޮސްފައިވަނީ އުމަރު ނަސީރަށް ލިބިގެން ނުވާ ބާރެއް ބޭނުންކޮށް މަގާމުގެ ނުފޫޒު ނަހަމަގޮތުގައި ބޭނުންކޮށް އެ ކުންފުންޏަށް ފައިދާ ހޯދާ ދިނުމަށް ވެސް އެ ކޮމިޝަނުން ބުނެ އެވެ.
