ސަރުކާރުން ޓެރެރިޒަމްއަށް ދީފައިވާ ޒީރޯ ޓޮލެރެންސްގެ ސިޔާސަތުގެ ދަށުން ޓެރެރިޒަމްއާއި ދެކޮޅަށް ކުރިއަށް ގެންދާ އޮޕަރޭޝަންތަކަށް ހާއްސަ ސެންޓަރެއް ޖޮއިންޓް އިންޓަރ އޭޖެންސީ އޮޕަރޭޝަން ސެންޓަރ (ޖަޔޮކް) ގެ ނަމުގައި ހުޅުވައިފި އެވެ.
ބަންޑާރަކޮށީގައި މިއަދު ހެނދުނު ބޭއްވި ރަސްމިއްޔާތުގައި މި ސެންޓަރު ހުޅުވައިދެއްވީ ރައިސުލްޖުމްހޫރިއްޔާ އިބްރާހިމް މުހައްމަދު ސޯލިހު އެވެ.
ޑިފެންސް މިނިސްޓްރީން ބުނާގޮތުގައި މި ސެންޓަރުގެ މައިގަނޑު މަސައްކަތަކީ ޓެރަރިޒަމް ހުއްޓުވުމަށްޓަކައި ޕްލޭންތައް ފަރުމާކޮށް، އޮޕަރޭޝަންތައް ހިންގުމެވެ.
"ޓްރާންސްނޭޝަނަލް ސެކިއުރިޓީ ތުރެޓްތައް ނުވަތަ ގައުމެއްގެ ބޯޑަރު ފަހަނައަޅާ، މުޅި ސަރަހައްދަށް އޭގެ ބިރާއި ނާމާންކަން ފެތުރިފައިވާ ނުރައްކާތަކުގެ ތެރޭގައި ހިމެނޭ ކްރޮސްބޯޑަރ ޓެރަރިޒަމާއި ހަރުކަށި ފިކުރަކީ، ސަލާމަތީ ނަޒަރަކުން ބަލާއިރު ރާއްޖެއަށް ކުރިމަތިވެފައިވާ ބޮޑު ގޮންޖެހުމެއް" މި ސެންޓަރު ހުޅުވުމާއި ގުޅިގެން އެމްއެންޑީފުން ނެރުނު ނޫސްބަޔާނެއްގައި ބުންފައި ވެއެވެ.
ގައުމީ ދިފާއީ ބާރުން ބުނީ މި ގައުމުގައި ޓެރިރިޒަމާއި ހަރުކަށި ފިކުރުގެ މޫތައް އިތުރަށް ވަރުގަދަވެ، އެ ނެޓްވޯކްތައް ފުޅާވަމުންދާ ކަމަށެވެ. އަދި އެތައް ދިވެއްސެއް، މި ގައުމު ދޫކޮށް، ހަނގުރާމަތަކުގައި ބައިވެރިވުމަށްޓަކައި ގޮސްފައިވާކަންވެސް އެއިދާރާއިން ފާހަގަކުރި އެވެ.
އެގޮތުން މި ސަރުކާރުން ޓެރަރިޒަމް މަނާކުރުމުގެ ގާނޫނަށް އިސްހުތަކެއް ގެނެސް، އެ ގާނޫނު ތަންފީޒު ކުރުމަށްޓަކައި ޓެރަރިޒަމް ރެސްޕޮންސް ޕްލޭނެއް މިހާރު އެކުލަވާލާފައި ވާނެ ކަމަށް އެމްއެންޑީފުން ބުންޏެވެ. އަދި "ސްޓޭޓް އޮފް ދަ އާރޓް" އާއި "ނެޓްވޯކް ސެންޓްރިކް ކަނެކްޓިވިޓީ" ގުޅުވާލައިގެން އެކުލަވައިލި ޖެޔޮކް އަކީ ޓެރަރިޒަމްގެ ހަމަލާތައް ފަދަ ގައުމީ ސަލާމަތަށް ނުރައްކާވާ ހާލަތުތަކުގައި ގައުމީ ފެންވަރުގެ ހުރިހާ މުއައްސަސާއެއް ގުޅުވައިދޭ މައި އޮޕަރޭޝަނަލް ހަބަށް ވެގެންދާނޭ ކަމަށް ފާހަގަކުރި އެވެ.
މި ސެންޓަރު ވުޖޫދަށް އައީ ޑިފެންސް މިނިސްޓަރު މާރިޔާ ދީދީގެ ބުރަ މަސައްކަތުންކަން ފާހަގަކޮށް އެމްއެންޑީއެފުން ވަނީ އޭނާއަށް ޝުކުރު އަދާކޮށްފަ އެވެ. މިނިސްޓަރުގެ އިތުރުން މި ރަސްމިއްޔާތުގައި ޗީފް އޮފް ޑިފެންސް ފޯރސް މޭޖަރ ޖެނެރަލް ޢަބްދުﷲ ޝަމާލާއި، އެމްއެންޑީއެފްގެ ލީޑަރޝިޕުގެ ބޭފުޅުންނާއި ދައުލަތުގެ އެކި މުއައްސަސާތަކުގެ އިސްވެރިންވަނީ ބައިވެރިވެފައި ވެއެވެ.
