ރިޔާދް، ސައުދީ އަރަބިއްޔާ (ޑިސެމްބަރު 7) - ސައުދީ އަރަބިއްޔާގެ ވަލީ އަހުދު މުހައްމަދު ބިން ސަލްމާން ގަލްފު އަރަބި ގައުމުތަކަށް މިހާރު ކުރައްވަމުން ގެންދަވާ ދަތުރުފުޅުގެ ތެރެއިން 30 ބިލިއަން ޑޮލަރުގެ އެއްބަސްވުންތަކުގައި އޮމާންއާ އެކު ސޮއިކުރައްވައިފި އެވެ.
ސައުދީ ޕްރެސް އެޖެންސީ (އެސްޕީއޭ) އިން ރިޕޯޓުކުރި ގޮތުގައި ސައުދީ އާއި އޮމާންގެ ކުންފުނިތަކުން ވަނީ 30 ބިލިއަން ޑޮލަރުގެ އަގުހުރި 13 މެމޮރަންޑާ އޮފް އަންޑަސްޓޭންޑިންގައި ސޮއިކޮށްފަ އެވެ.
ދެ ގައުމުގެ މެދުގައި ސޮއިކުރި އެމްއޯޔޫތަކަކީ އިގްތިސާދީ ކުރިއެރުމަށް ތެލަށް ބަރޯސާވުން ކުޑަކޮށް، ހަކަތަ އާއި ފަތުރުވެރިކަން އަދި ފައިނޭންސް އާއި ޓެކްނޮލޮޖީގެ ދާއިރާތައް ކުރިއެރުވުމާ ގުޅޭ އެއްބަސްވުންތަކެވެ.
އަމީރު މުހައްމަދު އޮމާންގެ މަސްކެޓް އަށް ވަޑައިގެންނެވީ ޑިސެމްބަރު މަހުގެ މެދު ތެރޭގައި އޮންނަ ގަލްފު އަރަބި ސަމިޓުގެ ކުރިން ކުރައްވާ ސަރަހައްދީ ދަތުރުފުޅުގެ ފުރަތަމަ މަންޒިލެއްގެ ގޮތުން ހޯމަ ދުވަހުގެ ރެޔެވެ.
އެސްޕީއޭ އިން ރިޕޯޓުކުރި ގޮތުގައި އޮމާންގެ އިތުރުން ޔޫއޭއީ، ބަހްރެއިން، ކުވެއިތު އަދި ގަތަރަށް ވެސް އެމަނިކުފާނު ވަޑައިގަންނަވާނެ އެވެ. ގަތަރުގެ ދޯހާ އަށް ކުރައްވާ ދަތުރުފުޅު ވާނީ މީގެ ހަތަރު އަހަރު ކުރިން ދެ ގައުމުން ގުޅުން ކަނޑާލި ފަހުން އަމީރު މުހައްމަދު ގަރަތަށް ކުރައްވާ ފުރަތަމަ ދަތުރުފުޅަށެވެ.
ސައުދީ އަރަބިއްޔާ އާއި ޔޫއޭއީ އަދި ބަހްރެއިން އިން ޖޫން 2017 ވަނަ އަހަރު ގަތަރާ އެކު ގުޅުން ކަނޑާލީ ސައުދީއާ ވާދަވެރި އިރާނުގެ ހަރުކަށި ގްރޫޕުތަކާ މާ ގާތްވާކަމުގެ ތުހުމަތުގަ އެވެ. ނަމަވެސް ގަތަރު އެ ތުހުމަތު ދޮގުކުރި އެވެ.
އެ ގައުމުތަކުން ގަތަރާ އެކު އަލުން ގުޅުން ގާއިމްކުރީ މިދިޔަ ޖެނުއަރީ މަހު ބޭއްވި ސަމިޓަކަށް ފަހު އެވެ.
އިރާނާއި ސައުދީގެ ގުޅުން ރަނގަޅުވެދާނެކަމުގެ ނިޝާންތަކެއް ފަހަކަށް އައިސް ވަނީ ފެންނަން ފަށާފަ އެވެ. އެގޮތުން މިދިޔަ އޭޕްރިލް މަހުން ފެށިގެން ދެ ގައުމުގެ މެދުގައި މަޝްވަރާތައް ވެސް ދަނީ ކުރަމުންނެވެ.
