އިންޓަނޭޝަނަލް ފްލައިޓްތައް އޮޕަރޭޓް ކުރުމުގެ ހުއްދަ މިހާރު ރާއްޖޭގެ ތިން އެއާލައިނަކަށް ދީފައިވާ ކަމަށް ޓްރާންސްޕޯޓް މިނިސްޓްރީން ބުނެފި އެވެ.
ރާއްޖޭގައި ޖުމްލަ ހަތަރު އެއާލައިނެއް އޮޕަރޭޓް ކުރެ އެވެ. އެއީ މޯލްޑިވިއަން، ވިލާގެ ފްލައިމީ، މަންތާ އެއާގެ އިތުރުން ޓީއެމްއޭ އެވެ. މިހާރު ރާއްޖެއިން ބޭރަށް ދަތުރުތައް ކުރުމަށް ހުއްދަ ދީފައި ވަނީ މޯލްޑިވިއަން، ވިލާ އެއާ އަދި މަންތާ އެއާ އަށެވެ.
ބައިނަލްއަގްވާމީ މަދަނީ ވައިގެ ދަތުރުފަތުރުގެ ދުވަހާ ގުޅިގެން ޓްރާންސްޕޯޓް މިނިސްޓަރު އައިޝަތު ނަހުލާ ވިދާޅުވީ މިއަހަރުގެ މައިގަނޑު އަމާޒަކީ ކޮވިޑްގެ ކުރީގެ ހާލަތަށް ރުޖޫއަވުން ކަމަށެވެ. އަދި ރާއްޖޭގެ ވައިގެ ދަތުރު ފަތުރުގެ ދާއިރާ ފުޅާ ކުރުމަށާއި އިތުރަށް ތަރައްގީ ކުރުން ކަމަށެވެ.
"މިގޮތުން، ރާއްޖޭގެ އެއާލައިންތަކުގެ ހަރަކާތްތައް އިތުރު ކުރުމާއި އެއާޕޯޓްތައް ތަރައްގީ ކުރުމުގެ މަޝްރޫއުތައް ކުރިއަށް ގެންދިއުން ހިމެނޭ. އެގޮތުން އިންޓަނޭޝަނަލް ފްލައިޓްތައް އޮޕަރޭޓް ކުރުމުގެ ހުއްދަ މިހާރުވާނީ ރާއްޖޭގެ ތިން އެއާލައިނަކަށް ދެވިފައި،" މިނިސްޓަރު ވިދާޅުވި އެވެ.
ވެލާނާ އިންޓަނޭޝަނަލް އެއާޕޯޓް ތަރައްގީކުރުމުގެ މަސައްކަތް މިއަހަރުވެސް ކުރިއަށް ގެންގޮސްފައިވާނެ ކަމަށާއި އެގޮތުން، އޭޕްރަން އަށް މުޅިން އަލަށް ބައިތަކެއް އިތުރުކޮށް ބޭނުންކުރަން ފެށުމުގެ އިތުރުން، ކުރިން ބޭނުން ކުރަމުން އައި އޭޕްރަން އަޕްގްރޭޑް ކުރެވި މިހާރު ބޭނުން ކުރަންފަށާފައިވާކަން މިނިސްޓަރު ވަނީ ފާހަގަ ކުރައްވާފަ އެވެ.
"މަދަނީ ވައިގެ ދަތުރުފަތުގެ ދާއިރާ ކުރިއެރުވުމުގެ ބާބެއްގެ ގޮތުގައި ސިވިލް އޭވިއޭޝަންގެ ފަންނީ ގާބިލުކަން އިތުރު ކުރުމުގެ ހަރަކާތްތައް އެހެން އަހަރުތަކެކޭވެސް އެއްގޮތަށް މިއަހަރުވެސް ދަނީ ކުރެވެމުން،" މިނިސްޓަރު ހިތޯބުގައި ވިދާޅުވި އެވެ.
ހަމައެއާއެކު ހެލިކޮޕްޓަރު އޮޕަރޭޝަންތަކަށް ހުއްދަދިނުމަށް ތައްޔާރުވަމުން އަންނަކަމަށް ނަހުލާ ވިދާޅުވި އެވެ. އެގޮތުން އިނގިރޭސިވިލާތުގެ ސިވިލް އޭވިއޭޝަން އޮތޯރިޓީއާއެކު މިހާރު ކުރިއަށްދަނީ އެކަމަށް ހުއްދަ ދިނުމުގެ ޕްރޮގްރާމުގެ ދެވަނަ ފިޔަވަހީގެ މަސައްކަތްކަމަށް ވިދާޅުވި އެވެ.
ނަހުލާ ވިދާޅުވީ އިންޓަނޭޝަނަލް ސިވިލް އޭވިއޭޝަން އޯގަނައިޒޭޝަން (އައިކާއޯ) ފްރޭމްވްކޯކުގެ ތެރޭގައި ހިމެނޭ "ކޮސްކެޕް ސައުތް އޭޝިއާ"ގެ ދަށުން ކުރިއަށް ގެންދެވޭ ހަރަކާތްތަކަކީ ފާހަގަކޮށްލެވޭ ހަރަކާތްތަކެއް ކަމަށެވެ.
އެގޮތުން ކޮސްކެޕްގެ ހަރަކާތްތައް ކުރިއަށް ގެންދިއުމަށް، މެމްބަރު ގައުތަކުން ކަނޑައަޅާފައިވާ ގޮތަށް މި އަހަރު ރާއްޖޭގައި ކޮސްކެޕްގެ އޮފީސް ގާއިމްކޮށްފައިވާކަމަށް ނަހުލާ ވިދާޅުވި އެވެ.
އެއާއެކު ނަހުލާވަނީ މަދަނީ ވައިގެ ދަތުރުފަތުރުގެ ސިނާއަތް ތަރައްގީކޮށް ކުރިއެރުވުމަށް ބައިނަލްއަގުވާމީ އިދާރާތަކުން ދޭ އެހީތެރިކަން ފާހަގަކުރައްވައިފަ އެވެ. އަދި ރާއްޖެ ބައިވެރިވާ ސަރަހައްދީ ހަރަކާތްތަކުން ފޯރުކޮށްދޭ އެހީތެރިކަމަށް ވެސް ޝުކުރު އަދާކުރައްވައިފަ އެވެ.
