ރައްޔިތުންގެ މަޖިލީހުގެ ކުރީގެ މެމްބަރު އަދި ގާނޫނީ ވަކީލު ކެލާ އަލީ އިބްރާހިމް މަނިކު (ކެލާ އަލިބެ) މިއަދު ހެނދުނުގެ ވަގުތެއްގައި އަވަހާރަވެއްޖެ އެވެ.
ކެލާ އަލިބެ އަވަހާރަވީ ގާތްގަނޑަކަށް ދެ އަހަރެއްހާ ދުވަހު އާލާސްކަންފުޅާ އުޅުއްވުމަށްފަހު ކަމަށްވެ އެވެ. އޭނާގެ މޫނު ބެލުމަށް ރައީސުލްޖުމްހޫރިއްޔާ އިބްރާހިމް މުހައްމަދު ސޯލިހު ވަނީ މިއަދު ސަހަރާއަށް ވަޑައިގަންނަވާފަ އެވެ.
ކެލާ އަލިބެއަކީ ދީލަތި ކަމަށް އުފަން ރަށް ކެލައަށް ވަރަށް މަޝްހޫރު ބޭފުޅެކެވެ. ސަރުކާރުގެ ކަރަންޓު ނެތް އިރު މުޅި ކެލައަށް ކަރަންޓުދީފައި ވަނީ އަލިބެ އެޅި އިންޖީނުގެއަކުންނެވެ. ރަށު ސްކޫލުގައި ހަމައެކަނި ދިވެހި މީޑިއަމަށް ކިޔަވައިދޭތީ އަލިބެ މުސާރަ ދޭ ގޮތަށް އިންޑިޔާއިން ދެ ޓީޗަރުން ގެނަ އެވެ.
އޭގެ އިތުރުން، ރަށުގައި ތިބެގެން ރަށު މީހުންނަށް އާމްދަނީ ލިބޭނެ ފުރުސަތުތައް މަގު ފަހިކޮށްދިނުމުގެ ގޮތުން ފަހާތަނެއް ހެދި އެވެ. އަދި ބަކަރި ގެނެސް، ދަނޑުވެރިކަން ކުރަން ބޭނުންވާ މީހުންނަށް އެ މަސައްކަތް ފަށައިދިނުމުގެ އިތުރުން ތެޔޮ ހާނާ ފެކްޓަރީއެއް ރަށުގައި އަޅައިދިނެވެ.
ކެލައަށް ފޯރުކޮށްދެމުންދިޔަ ކަރަންޓުގެ ފެންވަރު ރަނގަޅު ކުރުމަށް ވެސް އަލިބެ މަސައްކަތް ކުރަމުންދިޔަ އެވެ. އެގޮތުން އާ ދެ ޖަނަރޭޓަރު ގަނެގެން ރަށަށް ގެންދެވޭތޯ މަސައްކަތް ކުރި އެވެ. ނަމަވެސް އިންޖީނުތައް ހިފައިގެން ދަނިކޮށް ބޯޓު އަޑިއަށް ގޮސް މުދާ ގެއްލުނީ އެވެ.
އަލިބެއަކީ ދިވެހި ބަހާއި ސަގާފީ ކަންކަން ކުރިއެރުވުމަށް ވެސް މަސައްކަތް ކުރެއްވި ބޭފުޅެކެވެ. އެގޮތުން ޅެން ހައްދަވައި، ޑްރާމާ، ތަމްސީލު ޑައިރެކްޓުކޮށް، ތާރީހީ ލިޔުންތައް ލިޔުއްވި އެވެ. އެގޮތުން އަލިބެ ލިޔުއްވި "މިހެން ނޫންތޯ ކަން ހުރީ!" އަކީ މަޝްހޫރުވި ޅެމެކެވެ.
ކެލާ ކައުންސިލްގެ ރައީސް އަބްދުﷲ އިންފާޒް ވިދާޅުވީ އަލިބެ ނިޔާވުމަކީ ރަށަށް ލިބުނު ދެރައެއް އަދި ހިތާމައެއް ކަމަށެވެ.
"އަލިބެ ކުރެއްވި ހިދުމަތްތައް މިރަށުގެ މީހުން އަބަދުވެސް ހަނދާން ހުންނާނެ. އަލިބެ ނިޔާވުމަކީ މި ރަށަށް ލިބުނު ދެރައެއް އަދި ހިތާމައެއް،" އޭނާ ވިދާޅުވި އެވެ.
