ހަމަނުޖެހުން ބޮޑުވި ސޮލޮމޮން އައިލެންޑްސްގެ ބޮޑު ވަޒީރު މަނާސޭ ސޮގަވަރޭ އަށް އިތުބާރު އޮތް ކަމަށް އެ ގައުމުގެ ގާނޫނު ހަދާ މަޖިލީހުން ނިންމައިފި އެވެ.
މީގެ ހަފުތާއެއްހާ ދުވަސް ކުރިން ޕެސިފިކް ކަނޑުގައި އޮންނަ ޖަޒީރާ ގައުމުގައި ތިން ދުވަސް ވަންދެން މެދުކެނޑުމެއް ނެތި ބޮޑެތި ހަމަނުޖެހުން ހިނގި އެވެ.
އާއްމުން ހިތްހަމަނުޖެހުނީ ޓައިވާނާ އެކު އޮތް ގުޅުން ކުޑަކޮށް 2019 ވަނަ އަހަރުން ފެށިގެން ޗައިނާއާ ގާތް ގުޅުމެއް ސޮގަވަރޭގެ ސަރުކާރުން ގާއިމްކުރުމުންނެވެ.
ސިޔާސީ މައްސަލަތަކާ މެދު ރައްޔިތުން ނުރުހުން ފާޅުކޮށްފައި ވާތީ ބޮޑު ވަޒީރުގެ އިތުބާރު ނެތް ކަމަށް މަޖިލީހަށް ހުށަހެޅުއްވީ އިދިކޮޅު ލީޑަރު މެތިއު ވޭލް އެވެ.
ހޯމަ ދުވަހު މަޖިލީހުގެ ބަހުސްގައި ވޭލް ތުހުމަތު ކުރެއްވީ ސޮގަވަރޭގެ ސަރުކާރުން ޗައިނާގެ ފައިސާގައި ޖެހިފައިވާ ކަމަށާއި "ހިދުމަތް ކުރަނީ ބޭރުގެ ބާރަކަށް" ކަމަށެވެ.
ނަމަވެސް ސޮގަވަރޭ ވިދާޅުވީ ޑިޕްލޮމެޓިކް ގުޅުން ބަދަލު ކުރީ ޗައިނާ އަކީ އިގްތިސާދީ ގޮތުން ބާރުގަދަ ގައުމަކަށް ވާތީ ކަމަށެވެ.
ދެ ގަޑިއިރު ވަންދެން މަޖިލީހުގައި ދެއްކެވި ވާހަކައިގައި ސޮގަވަރޭ ވިދާޅުވީ އެމަނިކުފާނުގެ އިސްތިއުފާ އަށް ގޮވަނީ ބަގާވާތެއް ހިންގަން އުޅެ ނާކާމިޔާބުވުމުން ކަމަށެވެ.
ވާހަކައިގެ ވަކި ހިސާބަކުން ތެދުވެވަޑައިގެން، ގޮނޑިކޮޅު އެއްލާލެއްވުމަށް ފަހު އިދިކޮޅު ލީޑަރު ވޭލް އަށް ވަރަށް ބޮޑަށް ފާޑުވިދާޅުވި ކަމަށް ރިޕޯޓުތައް ބުނެ އެވެ.
އިތުބާރު ނެތް ކަމުގެ މައްސަލަ ފެއިލްވީ 32 މެމްބަރުން ސޮގަވަރޭ އަށް އިތުބާރު އޮތް ކަމަށް ވޯޓު ދެއްވުމުންނެވެ. އެމަނިކުފާނާ ދެކޮޅަށް 15 މެމްބަރުން ވޯޓު ދެއްވިއިރު، ވަކިކޮޅަކަށް ޖެހިވަޑައިނުގަންނަވާ ދެ މެމްބަރުން ތިއްބެވި އެވެ.
