މެންޗެސްޓާ (ޑިސެމްބަރު 6) - އިނގިރޭސި ޕްރިމިއާ ލީގުގައި ރޭ ކްރިސްޓަ ޕެލަސް އަތުން މެންޗެސްޓާ ޔުނައިޓަޑް މޮޅުވިއިރު، އެ މެޗުގައި ހީކުރިވަރަށް ވުރެ ރަނގަޅަށް ޔުނައިޓަޑް ކުޅުނު ކަމަށް އެ ޓީމުގެ އިންޓަރިމް ހެޑް ކޯޗު ރަލްފް ރަންގްނިކް ބުނެފި އެވެ.
އަމިއްލަ ދަނޑުގައި ރޭ ޕެލަސް އަތުން ޔުނައިޓަޑް މޮޅުވީ މެޗުގެ ދެ ވަނަ ހާފުގައި ބްރެޒިލްގެ މިޑްފީލްޑަރު ފްރެޑް ކާމިޔާބުކުރި ލަނޑުންނެވެ. މިއީ މި ސީޒަންގެ ނިޔަލަށް ޔުނައިޓަޑްގެ ކޯޗުކަމާ ހަވާލުވި ޖަރުމަނުގެ ރަންގްނިކްގެ އިރުޝާދުގެ ދަށުން އެ ޓީމު ކުޅުނު ފުރަތަމަ މެޗެވެ.
"ޓީމުގެ ފަރާތުން ފެނުނު ކުޅުމާ މެދު ވަރަށް ހިތްހަމަޖެހޭ. ހާއްސަކޮށް މެޗުގެ ފުރަތަމަ 30 މިނިޓުގެ ތެރޭގައި ވަރަށް ރަނގަޅަށް ޕްރެސްކޮށް، ވަރަށް މޮޅު ކުޅުމެއް ދެއްކި،" މެޗަށް ފަހު ރަންގްނިކް ބުންޏެވެ.
"އެންމެ ޓްރެއިނިން ސެޝަނަކާ އެކު ނުކުމެ، މި މެޗުގައި ޔުނައިޓަޑުން ދެއްކީ އަހަރެން އުންމީދުކުރި ވަރަށް ވުރެ ރަނގަޅު ކުޅުމެއް. އެކަމަކު ރަނގަޅު ކުރަންޖެހޭ ބައިވަރު ކަންތައްތައް އެބަހުރި. އެކަންތައްތަކަށް ކުރިއަށް އޮތް ތަނުގައި މަސައްކަތް ކުރާނަން."
ރަންގްނިކް ބުނީ ޔުނައިޓަޑުން ރަނގަޅުކުރަންޖެހޭ ކަންތައްތަކެއް އެބަހުރި ކަމަށާއި އޭގެ ތެރެއިން އެންމެ މުހިންމު އެއް ކަމަކީ ކްލީން ޝީޓްތައް (ލަނޑު ނުވަދެ ފުރިހަމަކުރާ މެޗުތައް) ގިނަކުރުން ކަމަށެވެ.
"އަހަރެމެން އެބަޖެހޭ ކްލީން ޝީޓްތައް ގިނަކުރަން. އަދި އެޓޭކްގައި އުފައްދާ ފުރުސަތުތައް ވެސް ގިނަކުރަންޖެހޭ. މޮޅަކާއެކު، ރަނގަޅުކުރަން ހުރި ކަންތައްތަކަށް މަސައްކަތްކުރަން ތަންކޮޅެއް ފަސޭހަވާނެ،" ރަންގްނިކް ބުންޏެވެ.
ރަންގްނިކްގެ ކޯޗުކަމުގައި ޔުނައިޓެޑް ކުޅޭ ދެ ވަނަ މެޗުގައި އަންނަ ބުދަ ދުވަހުގެރޭ ޔުއެފާ ޗެމްޕިއަންސް ލީގުގައި ޔުނައިޓެޑް ކުޅޭނީ ސްވިޒަލެންޑްގެ ޔަންގް ބޯއީސްއާ އެވެ. ޔުނައިޓެޑް ވަނީ އެންމެ ފަހުން ކުޅުނު މެޗުގައި ވިޔަރެއާލް ބަލިކޮށް ދެ ވަނަ ބުރުގެ ޖާގަ ކަށަވަރުކޮށްފަ އެވެ-- ބީބީސީ
