މެންޗެސްޓާ (ޑިސެމްބަރު 3) - އިނގިރޭސި ޕްރިމިއާ ލީގުގައި މިރޭ އާސެނަލް އަތުން 3-2 އިން މެންޗެސްޓާ ޔުނައިޓެޑް މޮޅުވި މެޗަށް ފަހު އެ ޓީމުގެ ވަގުތީ ކޯޗުގެ މަގާމު އަދާކުރި މައިކަލް ކެރިކް ޓީމު ދޫކޮށްލައިފި އެވެ.
ޔުނައިޓެޑްގެ ކޯޗުކަމުގައި އޮލެ ގުނަ ސޯލްޝެއާ ހުރިއިރު، ޓީމުގެ އެސިސްޓަންޓް ކޯޗަކަށް ހުރި ކެރިކް ވަގުތީ ގޮތުން ހެޑް ކޯޗެއްގެ ޒިންމާ ނަގަން ފެށީ ސޯލްޝެއާ މަގާމުން ވަކިކުރުމުންނެވެ. ކެރިކްގެ ކޯޗުކަމުގައި ޔުނައިޓެޑުން ފުރަތަމަ ކުުޅުނު މެޗުގައި ވަނީ ޗެމްޕިއަންސް ލީގުގައި 2-0 އިން ވިޔަރެއާލް ބަލިކޮށްފަ އެވެ. ދެ ވަނަ މެޗުން މިދިޔަ އާދިއްތަ ދުވަހު އިނގިރޭސި ޕްރިމިއާ ލީގުގެ އެއް ވަނައިގައި އޮތް ޗެލްސީއާ 1-1 އިން އެއްވަރުކުރިއިރު، ތިން ވަނަ މެޗުން މިރޭ މި ވަނީ އަމިއްލަ ދަނޑުގައި އާސެނަލް ބަލިކޮށްފަ އެވެ.
މިއީ އެންމެ ފަހުން އާސެނަލާ ދެކޮޅަށް ލީގުގައި ކުޅުނު ހަތް މެޗުގެ ތެރެއިން ޔުނައިޓެޑަށް ލިބުނު ފުރަތަމަ މޮޅެވެ. އަދި ލީގުގައި އެންމެ ފަހުން ކުޅުނު ނުވަ މެޗުގެ ތެރެއިން މޮޅުވި ދެ ވަނަ މެޗެވެ. މެޗަށް ފަހު ޔުނައިޓެޑުން ވަނީ ކެރިކް ކްލަބް ދޫކޮށްލިކަން ރަސްމީކޮށް އިއުލާނުކޮށްފަ އެވެ.
"ފަނަރަ އަހަރު ކުރިން މި ކްލަބަށް ކުޅުންތެރިއެއްގެ ގޮތުގައި ސޮއިކޮށް އަހަރެން ވަރަށް ގިނަ ތަށިތަކެއް ހޯދިން. އެއީ ވަރަށް ހަނދާން ހުންނާނެ ކަންތައްތަކެއް. ކުޅުންތެރިއެއްގެ ގޮތުގައި ތަޖުރިބާ ކުރި ކަންތައްތަކާއި ކޯޗެއްގެ ގޮތުގައި މި ކުރެވުނު މަސައްކަތް އަބަދުވެސް ހަނދާން ހުންނާނެ. މިއީ އަހަރެން އެހެން މިސްރާބަކަށް ދާން ޖެހޭ ވަގުތެއް، އަބަދުވެސް ހުންނާނީ ޔުނައިޓެޑްގެ ސަޕޯޓަރެއްގެ ގޮތުގައި،" ކެރިކް ބުންޏެވެ.
ޔުނައިޓެޑްގެ ކޯޗުކަމާ ދެން ހަވާލުވާ ޖަރުމަނުގެ ކޯޗު ރަލްފް ރަންގްނިކްގެ ވޯކްވިސާ ހަމަޖެހިފައިވާއިރު، އޭނާ ޓީމާ ރަސްމީކޮށް ހަވާލުވެ ނުކުންނާނެ ފުރަތަމަ މެޗަކީ އާދިއްތަ ދުވަހު ކްރިސްޓަލް ޕެލަސްއާ ދެކޮޅަށް ކުޅޭ މެޗެވެ.
އާސެނަލްގެ ޓޮމިޔާސޫ (ކ) އާއި ބެން ވައިޓް ކައިރިން ރޮނާލްޑޯ ބޯޅަހިފައިގެން.-- ފޮޓޯ: އޭއެފްޕީ
ޔުނައިޓެޑްގެ އޯލްޑް ޓްރެފޯޑް ސްޓޭޑިއަމްގައި މިރޭ ކުޅުނު މެޗުގައި އެ ޓީމުން ފަށަން ޖެހުނީ ގޯލެއް ފަހަތުންނެވެ. މެޗުގެ 13 ވަނަ މިނިޓްގައި އާސެނަލުން ލީޑުނެގީ އެމިލް ސްމިތު-ރޯވް ޖެހި ގޯލުންނެވެ. ކޯނަރަކުން އޭރިއާތެރެއަށް ހުރަސްވި ބޯޅައެއްގައި ދިފާއުކުރަން އުޅުމުގެ ތެރޭގައި ޔުނައިޓެޑްގެ މިޑްފީލްޑަރު ފްރެޑްގެ ފައިން އެ ޓީމުގެ ކީޕަރު ޑޭވިޑް ޑެހެއާ ފައިމައްޗަށް އެރުނެވެ. އެ ވަގުތު ޑެހެއާ ވެއްޓިފައި އޮއްވައި ކުޅުމުގެ ތެެރެއިން ސްމިތު-ރޯވް ވަނީ ގޯލުގެ ތެރެއަށް ބޯޅަ ފޮނުވާލައިފަ އެވެ. މެޗުގެ ރެފްރީ މާޓިން އެޓްކިންސަން ފުރަތަމަ ފައުލަކަށް ދެއްކި ނަމަވެސް ވީޑިއޯ އެސިސްޓަންޓް ރެފްރީ (ވީއޭއާރް) އިން ބަލާފައި ދެއްކީ ގޯލެއް ކަމަށެވެ.
އުމުރުން 21 އަހަރުގެ ސްމިތު-ރޯވް އަކީ ޔުނައިޓެޑް ދަނޑުގައި އާސެނަލަށް ގޯލެއް ޖަހައިދިން ދެ ވަނަ އަށް އެންމެ ހަގު ކުޅުންތެރިޔާ އެވެ.
ފްރެޑް ވަނީ ފުރަތަމަ ހާފުގައި އޭނާ އަށް ހެދުނު ގޯސް ރަނގަޅުކޮށް ޔުނައިޓެޑަށް އެއްވަރުކޮށްދޭން އެހީތެރިވެފަ އެވެ. މެޗުގެ 44 ވަނަ މިނިޓްގައި ބްރޫނޯ ފެނާންޑޭސް ޔުނައިޓެޑަށް އެއްވަރުކޮށްދިން ގޯލު ޖެހީ ފްރެޑް އޭރިއާތެރެއިން ދިން ބޯޅައަކުންނެވެ. މިއީ ފެނާންޑޭޒް ޔުނައިޓެޑަށް ކުޅެދިން 100 ވަނަ މެޗެވެ. ދެ ވަނަ ހާފްގެ ކުޅުން ފެށިގެން ހަތް މިނިޓް ތެރޭ މާކަސް ރެޝްފޯޑް ދިން ބޯޅައަކުން ކްރިސްޓިއާނޯ ރޮނާލްޑޯ ވަނީ ޔުނައިޓެޑަށް ލީޑުނަގަައިދީފަ އެވެ. އެންމެ ފަހުން ޗެލްސީ މެޗުގައި ބަދަލެއްގެ ގޮތުގައި ކުޅެން އެރި ރޮނާލްޑޯ މިރޭ ވަނީ ފުރަތަަމަ އެގާރައިގައި ކުޅެފަ އެވެ.
ޔުނައިޓެޑަށް ލީޑު ހިފަހައްޓައިލެވުނީ ދެ މިނިޓް އެވެ. އޭރިއާތެރެއިން ލިބުނު ފުރުސަތަކުން މެޗުގެ 54 ވަނަ މިނިޓްގައި މާޓިން އޮޑެގާޑް ވަނީ އާސެނަލަށް އެއްވަރުކޮށްދީފަ އެވެ. ޔުނައިޓެޑުން އަލުން ލީޑުނެގި ގޯލަކީ އޮޑެގާޑް ދިން ޕެނަލްޓީ އަކުން ރޮނާލްޑޯ ޖެހި ގޯލެކެވެ. އޭރިއާތެރެއިން ފްރެޑަށް އޮޑެގާޑް ކުރި ފައުލަށް ރެފްރީ އެޓްކިންސަން ޕެނަލްޓީ ދޭން ނިންމީ ވީއޭއާރް އިން ބަލައިފަ އެވެ. ރޮނާްލްޑޯ ޕެނަލްޓީ ފޮނުވާލީ ގޯލުގެ މެދަށެވެ.
މިރޭގެ ދެ ގޯލާ އެކު ރޮނާލްޑޯ ވަނީ ކެރިއަރުގައި 801 ގޯލު ހަމަކޮށްފަ އެވެ. ޔުނައިޓެޑަށް ދެ ފަހަރެއްގެ މަތިން ކުޅުނުއިރު އެ ޓީމަށް 130 ގޯލު ޖަހައިދިނެވެ. އެންމެ ފުރަތަމަ ކުޅުނު ސްޕޯޓިން ލިޒްބަން އަށް ފަސް ގޯލު ޖަހައިދިންއިރު، ރެއާލް މެޑްރިޑަށް 450 ގޯލާއި ޔުވެންޓަސް އަށް 101 ގޯލު ޖަހައިދިނެވެ. އަދި ޕޯޗުގަލް ގައުމީ ޓީމަށް 115 ގޯލު ޖެހި އެވެ.
އާސެނަލަށް މިރޭ މޮޅުވެގެން ހަތަރަކަށް އެރުމުގެ ފުރުސަތު އޮތްނަމަ ވެސް ބަލިވުމުން އެ ޓީމު އޮތީ ފަސް ވަނައިގައި 14 މެޗުން 23 ޕޮއިންޓާ އެކު އެވެ. ހަ ވަަނައިގައި އޮތީ މިރޭ ބްރެންޓްފޯޑް އަތުން 2-0 އިން މޮޅުވި އެންޓޯނިއޯ ކޮންޓޭ ކޯޗުކޮށްދޭ ޓޮޓެންހަމް އެވެ. ޓޮޓެންހަމަށް 13 މެޗުން ވަނީ 22 ޕޮއިންޓް ލިބިފަ އެވެ. ޔުނައިޓެޑް، ހަތް ވަނައިގައި އޮތީ 14 މެޗުން 21 ޕޮއިންޓް ހޯދައިގެންނެވެ. އެއީ ލީގުގެ އެއް ވަނައިގައި އޮތް ޗެލްސީ އަށް ވުރެ 12 ޕޮއިންޓް ފަހަތުގަ އެވެ.
