މެންޗެސްޓާ (ޑިސެމްބަރު 2) - އިނގިރޭސި ޕްރިމިއާ ލީގުގައި މިރޭގެ މެޗަށް ނުކުންނައިރު، މެންޗެސްޓާ ޔުނައިޓެޑް ލީގު ތާވަލުގައި އޮތް މަގާމަށް ބަަލައި، އެ ޓީމަކީ ދަށް ޓީމެއްގެ ގޮތުގައި ނުދެކޭނެ ކަމަށް އާސެނަލްގެ ކޯޗު މިކޭލް އާޓެޓާ ބުނެފި އެވެ.
ލީގުގެ ފަސް ވަނައިގައި އާސެނަލް އޮތީ 13 މެޗުން 23 ޕޮއިންޓް ހޯދައިގެންނެވެ. ޔުނައިޓެޑް 10 ވަނައިގައި އޮތީ 13 މެޗުން 18 ޕޮއިންޓާ އެކު އެވެ. އާސެނަލަށް މިރޭގެ މެޗުން މޮޅުވެގެން ލީގުގެ ހަތަރަކަށް އެރޭނެ އެވެ.
މެޗުގެ ކުރިން އޮތް ނޫސްވެރިންގެ ބައްދަލުވުމުގައި ވާހަކަ ދައްކަމުން އާސެނަލްގެ ކޯޗު އާޓެޓާ ބުނީ ޔުނައިޓެޑް މި ވަގުތު ކޮންމެ ހާލަތެއްގައި އޮތް ކަމުގައި ވިޔަސް މެޗުތަކުގައި އެ ޓީމުން ކުރާ ރަނގަޅު މަސައްކަތް ފެންނަ ކަމަށެވެ. އަދި މި ވަގުތު އެ ޓީމުގެ ނަތީޖާތަކަށް ބަލައިގެން މުޅި ޓީމާ މެދު ގޮތެއް ނުނިންމޭނެ ކަމަށް އާޓެޓާ ގަބޫލުކުރެ އެވެ.
"އެ ޓީމަށް ބަލަންވީ. ނަތީޖާ ކޮންމެ ގޮތަކަށް ވެސް ނުކުމެދާނެ. އަހަންނަށް ޔުނައިޓެޑް އަދިވެސް ފެންނަނީ އެންމެ ވަރުގަދަ އެއް ޓީމުގެ ގޮތުގައި، އެ މީހުން މި ވަގުތު އޮތް މަގާމަށް ބަލައިގެން އެއީ ދަށް ޓީމެއްގެ ގޮތުގައި ދެކުމަކީ ގޯހެއް،" އާޓެޓާ ބުންޏެވެ.
"ޔުނައިޓެޑް އެ އޮތީ އަހަރެމެން (އާސެނަލް) ވެސް މި ސީޒަނުގައި އޮތް ހާލަތެއްގައި. މޮޅުތަކެއް ވުމާ އެކު ފޯމު ރަނގަޅުވާނެ"
އާސެނަލާއި ޔުނައިޓެޑްގެ ކުރިމަތިލުންތަކުގެ ތެރެއިން ލީގުގައި އެންމެ ފަހުން ކުޅުނު ހަ މެޗުގައި ވެސް ޔުނައިޓެޑަށް އާސެނަލް ބަލިނުކުރެވެ އެވެ. މިރޭގެ މެޗުން ވެސް ބަލިނުވެ، އާސެނަލުން ފަރުޖައްސާލައިފިނަމަ މިއީ ޔުނައިޓެޑް ތާރީހުގައި އާސެނަލް ބަލިނުކޮށް ލީގުގައި އެންމެ ދިގު މުއްދަތެއް ހޭދަވާ ފަހަރެވެ. އާސެނަލުން އެންމެ ފަހުން ޔުނައިޓެޑް ދަނޑުގައި ލީގުގައި ޖެހިޖެހިގެން ދެ މޮޅު ހޯދީ 1979 ވަނަ އަހަރު އެވެ.
މިދިޔަ ސީޒަނުގައި ޔުނައިޓެޑް ދަނޑުގައި އާސެނަލުން ހޯދި މޮޅުން މިރޭގެ މެޗަށް ކުރާނެ އަސަރެއް އެބައޮތްތޯ ސުވާލުކުރުމުން އާޓެޓާ ބުނީ ކުރިން ވެފައި އޮތް ކަންކަމަށް ސަމާލުކަމެއް ނުދީ އޭނާ ވިސްނާނީ ކުރިއަށް އޮތް މެޗުން މޮޅުވެވޭނެ ގޮތްތަކަށް ސަމާލުކަން ދީގެން އެ އަށް މަސައްކަތް ކުރުމަށް ކަމަށެވެ.
ޔުނައިޓެޑް ބަލިކޮށްގެން މި ވަގުތު ގަދަ ހަތަރަކަށް ވަދެވެން އޮތް ކަމުގައި ވިޔަސް އެ އަށް ވުރެ ބޮޑަށް ބޭނުންވަނީ "ގަދަ ހަ ކްލަބް"ގެ ތެރެއިން ކޮންމެ ވެސް ޓީމެއްގެ ދަނޑެއްގައި މޮޅެއް ހޯދައި މުޅި ޓީމުގެ ކޮންފިޑެންސް ރަނގަޅު ކުރުމަށް ކަމަށް އާޓެޓާ ބުނެފައިވެ އެވެ.
ޔުނައިޓެޑްގެ ކޯޗުގެ މަގާމާ ހަވާލުވި ޖަރުމަނުގެ މަޝްހޫރު ކޯޗު ރަލްފް ރަންގްނިކްގެ ވޯކް ޕާމިޓް ކަންކަން ހަމަނުޖެހޭތީ މިރޭ އާސެނަލާ ދެކޮޅަށް ކުޅޭ މެޗުގައި ޓީމަށް އިރުޝާދު ދޭނީ އެންމެ ފަހުން ދެ މެޗުގައި ވެސް ފެނުނު ވަގުތީ ކޯޗު މައިކަލް ކެރިކް އެވެ.
ކެރިކް ބުނީ މިރޭގެ މެޗުގައި ޓީމު ނެގުމުގެ ހުރިހާ ކަމަކާއި ތައްޔާރީތަކުގެ ހުރިހާ ޒިންމާއެއް އޮތީ އޭނާ އަށް ކަމަށެވެ.
"އާ ކޯޗެއް ގެނައި ކަމުގައި ވިޔަސް މި މެޗުގައި މި ހުރީ އަހަރެން. އާ ކޯޗު (ރަންގްނިކް)ގެ ހުރިހާ ކަމެއް ހަަަމަނުޖެހޭތީ އޭނާ އަށް ޓީމު ރޭވުމުގައި ބައިވެރިވެވޭނެ ގޮތެއް އަދި ނޯންނާނެ،" ކެރިކް ބުންޏެވެ.
ޗެލްސީ އާއި ޔުނައިޓެޑް 1-1 އިން އެއްވަރުވި މެޗުގައި ޔުނައިޓެޑްގެ ބެންޗުގައި އިނދެ، ކޯޗިން ޓީމުގައި ހިމެނޭ ޑަރެން ފްލެޗާ ހެޑްފޯނު އަޅައިގެން ވާހަަކަ ދައްކަން އިނީ ރަންގްނިކްއާ ކަމަށް އިނގިރޭސި ބައެއް މީޑިއާތަކުން ރިޕޯޓްކުރި ނަމަވެސް ކެރިކް ވަނީ އެ ވާހަކަތައް ދޮގުކޮށްފަ އެވެ. މިރޭގެ އާސެނަލާއި ޔުނައިޓެޑް ކުޅޭ މެޗު ބަލަން ރަންގްނިކް ޔުނައިޓެޑްގެ ދަނޑަށް ދާނެ އެވެ.
ޕްރިމިއާ ލީގުގައި އެންމެ ފަހުން ކުޅުނު އަށް މެޗުގެ ތެރެއިން ޔުނައިޓެޑް މޮޅުވީ އެންމެ މެޗަކުންނެވެ. ޔުނައިޓެޑާއި އާސެނަލް ކުޅޭ މެޗު ފަށާނީ މިރޭ ރާއްޖެ ގަޑިން 1:15 ގަ އެވެ.
