ޑުބާއީ، ޔޫއޭއީ (ޑިސެމްބަރު 1) - ސައުދީ އަރަބިއްޔާގައި އޮންނަ ފޯމިއުލާ ވަން ގްރޯން ޕްރީ ފެށުމުގެ ރަސްމިއްޔާތުގައި ކެނެޑާގެ ޕޮޕް ލަވަކިޔުންތެރިޔާ ޖަސްޓިން ބީބާ ލަވަ ހުށަހަޅަން އެއްބަސްވުމުން ޕްރެޝަރު ކުރިމަތިވެއްޖެ އެވެ.
އުމުރުން 27 އަހަރުގެ ބީބާ އެތައް ހާސް ބަޔެއްގެ ކުރިމަތީގައި ލަވަ ހުށަހަޅަން ހަމަޖެހިފައި ވަނީ އަންނަ އާދީއްތަ ދުވަހު ޖިއްދާގަ އެވެ. އޭނާގެ އިތުރުން ފްރާންސްގެ ސުޕަސްޓާ ޑީޖޭ ޑޭވިޑް ގެޓާ އާއި އެމެރިކާގެ ލަވަކިޔުންތެރިޔާ ޖޭށަން ޑެރުލޯގެ ހުށަހެޅުންތައް ވެސް އޮންނާނެ އެވެ.
މީގެ ކުރިން ސައުދީ އަރަބިއްޔާގައި ބާއްވާފައިވާ ބޮޑެތި އިވެންޓުތަކާ ގުޅިގެން އެހެން ތަރިންނަށް ވެސް ފާޑުކިޔުން އަމާޒުވެފައި ވެ އެވެ. އެފަދަ އިވެންޓުތައް ގިނަކޮށް، ސައުދީ އަރަބިއްޔާ އިން މަސައްކަތް ކުރަނީ ގައުމުގެ މޫނުމަތި ބަދަލުކޮށްލުމަށެވެ.
ބީބާގެ ނިންމުން ބަދަލުކޮށް، ސައުދީ އަރަބިއްޔާގައި ހުށަހެޅުން ނުދޭން ޕްރެޝަރު ކުރުމުގައި އެންމެ އިސްކޮށް އުޅެނީ މަރާލާފައިވާ ނޫސްވެރިޔާ ޖަމާލް ހަޝޮގްޖީގެ ލޯބިވެރިޔާ ހަތީސޭ ސެންގިޒް އެވެ. ދެހާސް އަށާރަ ވަނަ އަހަރު ހަޝޮގްޖީ މަރާލީ ތުރުކީގައި ހުންނަ ސައުދީ ކޮންޒިއުލޭޓް ތެރޭގަ އެވެ.
"މިއީ ދުނިޔެ އަށް ވަރުގަދަ މެސެޖެއް ދޭން ރަނގަޅު ފުރުސަތެއް. މިއީ ފާޑުކިޔާ ފަރާތްތައް މަރާ ސަރުކާރެއްގެ މޫނުމަތި ބަދަލުކުރަން ބީބާގެ ނަމާއި ހުނަރު ބޭނުން ނުކުރެވޭނެކަން އަންގައިދޭން ލިބޭ ފުރުސަތެއް،" ވޮޝިންޓަން ޕޯސްޓުގައި ލިޔުނު އޮޕީނިއަން އެއްގައި ސެންގިޒް ބުންޏެވެ.
ބީބާ އަށް ޕްރެޝަރު ކުރުމަށް ހިންގާ ކެމްޕެއިން ސޯޝަލް މީޑިއާގައި ވެސް ވަނީ ވައިގައި ހިފާފަ އެވެ. އެގޮތުން WTFJustin# ހޭޝްޓެގް ދަނީ ޓްވިޓާގައި ދައުރުވަމުންނެވެ.
މިދިޔަ މަހު ލޮސް އެންޖެލިސްގައި އޮތް އެމެރިކަން މިޔުޒިކް އެވޯޑްސް ހަފްލާ ބޭއްވި މަރުކަޒު ކައިރީގައި ވެސް "ވައި އިޒް ބީބާ ސިންގިން ފޯ ސައުދީ ކިލާޒް؟" ޖަހާފައިވާ ބޮޑު ބެނާއެއް ކުޑަ މަތިންދާބޯޓެއްގެ އެހީގައި ދުއްވާފައި ވެ އެވެ.
އެ ކެމްޕެއިނާ ގުޅޭ ގޮތުން ބީބާ އަދި އެއްޗެއް ނުބުނެ އެވެ.
