ބްރަސެލްސް، ބެލްޖިއަމް (ޑިސެމްބަރު 1) - ޗައިނާގެ "ބެލްޓް އެންޑް ރޯޑް" ސްޓްރެޓެޖީއާ ވާދަކުރުމުގެ ގޮތުން ޔޫރަޕުން ދުނިޔޭގެ އެކި ކަންކޮޅުތަކުގައި ހިންގާ ޕަބްލިކް އަދި ޕްރައިވެޓް އިންފްރާސްޓްރަކްޗާ އިންވެސްޓްމަންޓުތަކަށް 340 ބިލިއަން ޑޮލަރު ނުވަތަ 300 ބިލިއަން ޔޫރޯ ކަނޑައަޅަން ޔޫރަޕިއަން ކޮމިޝަނުން ނިންމައިފި އެވެ.
"ގްލޯބަލް ގޭޓްވޭގެ އަމާޒަކަށް ވާނީ 2021 ވަނަ އަހަރާއި 2027 ވަނަ އަހަރާ ދެމެދު 300 ބިލިއަން ޔޫރޯގެ އިންވެސްޓްމަންޓު ފެށުން. އީޔޫ އާއި މެމްބަރު ދައުލަތްތަކާއި ޔޫރަޕްގެ މާލީ އިދާރާތަކާއި ވަކި ގައުމުތަކުގެ މާލީ އިދާރާތަކުގެ ވަސީލަތްތައް މިކަމަށް ބޭނުންކުރެވޭނެ،" އެ ކޮމިޝަނުން ތައްޔާރު ކުރި ލިޔުމެއްގައި ވެ އެވެ.
"ގްލޯބަލް ގޭޓްވޭ" ޕްލޭނުގައި ވާދަވެރި ޗައިނާގެ ވާހަކަ ހިމަނާފައެއް ނުވެ އެވެ. ޔޫރަޕިއަން ޔޫނިއަން (އީޔޫ) ގެ ވެރިޔާ އުރްސުލާ ވޮން ޑެ ލެޔެން ސިފަކުރެއްވި ގޮތުގައި އެ ޕްލޭނަކީ "ދުނިޔޭގެ އެކި ކަންކޮޅުގައި ބިޔަ އިންފްރާސްޓްރަކްޗާ ބިނާ ކުރުމަށް މަގު ޗާޓެކެވެ."
ޗައިނާގެ އިންވެސްޓްމަންޓް ސްޓްރެޓެޖީ "ބެލްޓް އެންޑް ރޯޑް" ފެށީ 2013 ވަނަ އަހަރު އެވެ. މިއީ ރައީސް ޝީ ޖިންޕިން ވަރަށް ބޮޑު ސަމާލުކަމެއް ދެއްވާ މަޝްރޫއެކެވެ. ޗައިނާ އިން ބުނީ 2020 ވަނަ އަހަރުގެ ނިޔަލަށް އެކި ގައުމުތަކުގައި 139.8 ބިލިއަން ޑޮލަރު އިންވެސްޓު ކުރި ކަމަށާއި އޭގެ ތެރެއިން 22.5 ބިލިއަން އިންވެސްޓު ކުރީ ހަމައެކަނި މިދިޔަ އަހަރުގެ ތެރޭގައި ކަމަށެވެ.
ޗައިނާގެ ބެލްޓް އެންޑް ރޯޑް އިނީޝިއޭޓިވްގެ ދަށުން ގާއިމްކުރަން ބޭނުންވާ ރޫޓުތައް.
ޗައިނާ އިން ބުނާ ގޮތުގައި އެ މަޝްރޫއުގެ ބޭނުމަކީ ޗައިނާ އާއި އޭޝިއާ، ޔޫރަޕް އަދި އެފްރިކާ ކަނޑާއި އެއްގަމު މަގުން މިހާރަށް ވުރެ ބޮޑަށް ގުޅާލުމެވެ. އޭގެ ބޭނުމަކީ ވިޔަފާރި އާއި ތަރައގީ ކުރިއެރުވުމެވެ. ގިނަ ގައުމުތަކުން ޗައިނާގެ މަޝްރޫއުގައި ބައިވެރިވެ އެވެ.
ނަމަވެސް ހުޅަނގުގެ ގައުމުތަކުން ދެކޭ ގޮތުގައި އެއީ ފަގީރު ގައުމުތަކުގެ މައްޗަށް ޗައިނާގެ ނުފޫޒު ހިންގުމުގެ ވަސީލަތެކެވެ. އެގޮތުން މަޝްރޫއުތައް ހަވާލުކުރުމުގައި ސިއްރުން ހިންގާ ޓެންޑާއިން ކޮރަޕްޝަނަށް މަގުފަހިވާނެ ކަމަށާއި މަޝްރޫއުތަކުން ގައުމުތައް ދަރަނީގެ ދަންތުރައެއްގައި ޖެހޭ ކަމަށް ތުހުމަތު ކުރެ އެވެ.
