ޓެނިސް ތަރި ޕެންގް ޝުއާއީގެ ހާލަތާ މެދު ކަންބޮޑުވުން ފާޅުކުރުމަށް ފަހު ޗައިނާގައި ބާއްވާ ޓެނިސް މުބާރާތްތައް ސަސްޕެންޑު ކުރަން ވިމެންސް ޓެނިސް އެސޯސިއޭޝަން (ޑަބްލިއުޓީއޭ) އިން ނިންމައިފި އެވެ.
އުމުރުން 35 އަހަރުގެ ޕެންގް އާއްމު ތަންތަނުން ފެނުން ހުއްޓުނީ މީގެ ތިން ހަފުތާ ކުރިން ޗައިނާގެ އިސް އޮފިޝަލަކަށް ޖިންސީ ގޯނާގެ ތުހުމަތު ކުރި ފަހުންނެވެ.
ޑަބްލިއުޓީއޭގެ ވެރިޔާ ސްޓީވް ސައިމަން ވިދާޅުވީ ޕެންގް "މިނިވަންކަމާ އެކު ބިރެއް ނެތި" އުޅޭ ކަމާ މެދު "ސީރިއަސް ޝައްކުތަކެއް" އެބަ ހުރި ކަމަށެވެ.
"މި ހާލަތުގައި އަޅުގަނޑުމެންގެ އެތުލީޓުން ޗައިނާގައި އޮންނަ މުބާރާތްތަކުގައި ވާދަކުރުމަށް އެދެވޭކަށް ނެތް،" އޭނާ ވިދާޅުވި އެވެ.
ޕެންގް އުފުލި ޖިންސީ ގޯނާގެ ތުހުމަތާ ގުޅޭ ފުރިހަމަ ތަހުގީގެއް ހިންގަން ޑަބްލިއުޓީއޭ އިން ތަކުރާރުކޮށް ގޮވާލާފައި ވެ އެވެ.
ޕެންގްގެ ހާލަތާ މެދު ކަންބޮޑުވުން އުފެދުނީ ކުރީގެ ވައިސް ޕްރިމިއާ ޒާންގް ގައޯލީ އަށް ޖިންސީ ގޯނާގެ ތުހުމަތު ކުރި ފަހުންނެވެ.
ނޮވެމްބަރު މަހު އިންޓަނޭޝަނަލް އޮލިމްޕިކް ކޮމިޓީގެ ރައީސް ތޯމަސް ބެކްއާ އެކު ބޭއްވި ވީޑިއޯ ކޯލެއްގައި ޕެންގް ބުނީ އޭނާ ހުރީ "ރައްކާތެރިކަމާ އެކު ހެޔޮ ހާލުގައި" ކަމަށެވެ.
ނަމަވެސް ޑަބްލިއުޓީއޭ އިން ބުނީ އެ ވީޑިއޯއަކީ ޕެންގްގެ ރައްކާތެރިކަން ކަށަވަރު ކުރަން އެންމެ އެކަށޭނަ މިންވަރުގެ ހެކި ނޫން ކަމަށެވެ.
ދިގު ބަޔާނެއްގައި ސައިމަން ވިދާޅުވީ 2022 ވަނަ އަހަރު ޗައިނާގައި މުބާރާތްތައް ބާއްވާ ނަމަ ކުޅުންތެރިންނާއި މުވައްޒަފުންނަށް ދިމާވެދާނެ ނުރައްކަލަކާ މެދު "ވަރަށް ކަންބޮޑުވާ" ކަމަށެވެ.
"މި ސީރިއަސް މައްސަލައާ ގުޅިގެން ޗައިނާގެ ލީޑާޝިޕުން އޮއްޓަރު ހުރި ގޮތަކަށް އަމަލުކޮށްފައެއް ނުވޭ،" އޭނާ ވިދާޅުވި އެވެ.
"ބާރު ހުރި މީހުންނަށް އަންހެނުންގެ އަޑު ކަނޑުވާލައި ޖިންސީ ގޯނާގެ ވާހަކަތައް ފަސް އަޅަން ފުރުސަތު ލިބޭ ނަމަ، ޑަބްލިއުޓީއޭ އުފެދުނު އަސާސް ކަމުގައިވާ އަންހެނުންނަށް ހަމަހަމަ ފުރުސަތު ދިނުމުގެ އަމާޒަށް ވާސިލްނުވާނެ."
"ޑަބްލިއުޓީއޭ އާއި މި ތަނުގެ ކުޅުންތެރިންނަށް އެހެން ދިމާވާން ޖާގައެއް ނުދޭނަން."
ޑަބްލިއުޓީއޭ އިން ސަސްޕެންޑު ކުރި މުބާރާތްތަކުގެ ތެރޭގައި ޗައިނާގެ ހޮންކޮންގައި ބާއްވަން ހަމަޖެހިފައިވާ އިވެންޓުތައް ވެސް ހިމެނެ އެވެ.
ޕެންގްގެ ތުހުމަތު
ނޮވެމްބަރު މަހުގެ ކުރީކޮޅުން ފެށިގެން ޕެންގް ގެއްލުނީ ޗައިނާގެ ކުރީގެ ވައިސް ޕްރިމިއާ ޒާންގް ގައޯލީއާ ގުޅޭ ތުހުމަތުތަކެއް ޗައިނާގެ ސޯޝަލް މީޑިއާ ވެއިބޯގައި ޕޯސްޓު ކުރި ފަހުންނެވެ.
ޕެންގް ބުނީ 2013 އިން 2018 އަށް ވައިސް ޕްރިމިއާކަން ކުރެއްވި ޒާންގްއާ އެކު ޖިންސީ ގުޅުމެއް ބާއްވަން އޭނާ އަށް މަޖުބޫރު ކުރުވި ކަމަށެވެ.
މިހާރު އުމުރުން 70 ގެ އަހަރުތައް ގުނަމުންދާ ޒާންގްއާ އެކު އެތައް އަހަރެއް ވަންދެން ޖިންސީ ގުޅުމެއް ބާއްވަން އޭނާ އަށް މަޖުބޫރު ކުރި ކަމަށް ޕެންގްގެ ޕޯސްޓުގައި ލިޔެފައި ވެ އެވެ.
ޗައިނާގެ ކުރީގެ ވައިސް ޕްރިމިއާ ޒާންގް ގައޯލީ.
ފަހުން އެ ޕޯސްޓު ވަނީ ރިމޫވްކޮށްފަ އެވެ. އަދި އޭގެ ފަހުން ޕެންގްގެ ހަބަރެއް ނުވެ އެވެ. ކުރީގެ ވައިސް ޕްރިމިއާ ޒާންގް އަކީ ޗައިނާގެ ރައީސް ޝީ ޖިންޕިން އާ ގާތް ގުޅުމެއް އޮންނަ ބޭފުޅެކެވެ.
އެ ޕޯސްޓަށް ފަހު ޕެންގްގެ ހަބަރެއް ނުވުމުން ޑަބްލިއުޓީއޭ އިން ކަންބޮޑުވުން ފާޅުކުރަން ފެށި އެވެ. އޭގެ އިތުރުން މަޝްހޫރު ޓެނިސް ތަރިން ވެސް ޕެންގްއާ މެދު ކަންބޮޑުވުން ފާޅުކުރި އެވެ.
އޭގެ ފަހުން ޗައިނާގެ މީޑިއާ އިން ވަނީ ޕެންގްގެ އީމެއިލެއް ކަމަށް ބުނާ އީމެއިލެއް އާއްމުކޮށްފަ އެވެ. ޑަބްލިއުޓީއޭ އަށް ފޮނުވި އީމެއިލްގައި ވަނީ ޖިންސީ ގޯނާގެ ތުހުމަތަކީ ދޮގެއް ކަމަށް ބުނެފަ އެވެ.
އެ އީމެއިލްގެ ސައްހަ ކަމާ މެދު ޑަބްލިއުޓީއޭ އިން ސުވާލު އުފައްދަން ފެށުމުން، ދެން ޕެންގް ފެނުނީ ރަސްމީ ޓެނިސް އިވެންޓަކުންނެވެ.
އެއަށްފަހު އޮލިމްޕިކް ކޮމިޓީގެ ރައީސްއާ އެކު 30 މިނެޓުގެ ވީޑިއޯ ކޯލެއް ކޮށް، ޕެންގް އެދުނީ އޭނާގެ ޒާތީ މިނިވަންކަމަށް އިހްތިރާމް ކުރުމަށެވެ.
