ކުރީގެ ރައީސް އަބްދުالله ޔާމީން އަބްދުލްގައްޔޫމް މިނިވަންވުމާއެކު އެމަނިކުފާނުގެ އިސް ވަކީލް ޑރ. މުހައްމަދު ޖަމީލު އަހުމަދު އިދިކޮޅުގެ އެހެން ވެރިންނަށް ދެއްވި "ހަމަލާ"އަށް ޑރ. މުހައްމަދު ޝަހީމް އަލީ ސައީދު ރައްދު ދެއްވައިފި އެވެ.
ޔާމީން މިނިވަންވުމުން އެމަނިކުފާނުގެ ގާނޫނީ ވަކީލުން ބޭއްވި ނޫސްވެރިންގެ ބައްދަލުވުމުގައި ޖަމީލު ވިދާޅުވި ގޮތުގައި ސުޕްރީމް ކޯޓުގެ ހުކުމާ ހަމައަށް ޔާމީނަށް އިންސާފު ލިބިގެން ދާނެ ކަމަށް އެންމެ ކައިރީގައި ތިބި މީހުން ވެސް ސުވާލު އުފެއްދި އެވެ.
"ތީ ނުވާނެ ކަމެއް ކަމުގައި ކައިރީގައި ތިބި ގިނަ ބަޔަކު ވެސް ގަބޫލުކޮށްގެން ތިބި ގޮތާއި، އަދި އެގޮތަށް މުޖްތަމައުގެ ގިނަ ބަޔަކު އެހެން ބުނަމުން ދިޔައިރު، އެގޮތާއި ހިލާފަށް ނިކުމެ، މި މަސައްކަތް ކާމިޔާބު ކުރެވުނީ،" ޖަމީލް ވިދާޅުވި އެވެ.
ޖަމީލު ވަނީ ޔާމީން މިނިވަންކުރަން އޭނާ އިސްކޮށް ހުންނަވައި ކުރި ބުރަ މަސައްކަތް ނޫސްވެރިންގެ ބައްދަލުވުމުގައި ވަރަށް ބޮޑަށް ފާހަގަކުރައްވާފަ އެވެ. އަދި ޔާމީން މިނިވަންވުމާއެކު ކުރެއްވި ޓްވީޓްގައި ވެސް އެމަނިކުފާނަށް ވަރަށް ބޮޑަށް ތައުރީފު ކުރައްވައި ރަނިންމޭޓު, ނައިބު ރައީސް އަދި ވަކީލެއްގެ ހައިސިއްޔަތުން ޔާމީންނާއެކު ހުންނެވިކަން އަންގައިދޭ ފޮޓޯތައް ހިއްސާ ކުރެއްވި އެވެ.
ޕީޕީއެމްގެ އިސް ސަފުގައި ތިއްބެވި އެހެން ބޭފުޅުންނަށް ޖަމީލު އަމާޒު ކުރެއްވި ހަމަލާއަށް ރައްދު ދެއްވީ އެންމެފަހުން ޔާމީންގެ ރަނިންމޭޓެއްގެ ގޮތުގައި ރިޔާސީ އިންތިހާބަށް ނުކުމެވަޑައިގެންނެވި ކުރީގެ އިސްލާމިކް މިނިސްޓަރު ޑރ. މުހައްމަދު ޝަހީމް އަލީ ސައީދެވެ.
އޭނާ ވިދާޅުވި ގޮތުގައި, އެންމެ ކައިރީގައި ތިއްބެވި ބޭފުޅުން ފެށުނީންސުރެ ވެސް ގަބޫލު ކުރަމުން ދިޔައީ ޔާމީން މިނިވަން ވާނެ ކަމަށް ކަމަށެވެ. އެންމެ ފުރަތަމަ ދުވަހުން ފެށިގެން ވެސް އެ ބޭފުޅުން ތިއްބެވީ އެގޮތުގައި ކަމަށެވެ.
"ދުޝްމަނުން ވަގަށް ގޮވިއިރު ވެސް އެ ބޭފުޅުން ވިދާޅުވަމުން ގެންދެވީ ވަގެއް ނޫނޭ ރައީސް ޔާމީނަކީ," ޝަހީމް ޓްވީޓް ކުރެއްވި އެވެ.
ޝަހީމްގެ މި ހަމަލާ ސީދާ އަމާޒުކުރައްވާފައިމިވަނީ ނައިބު ރައީސް ކަމުން ޖަމީލު ދުރުކުރުމުން އޭނާ ޔާމީނަށް ވިދާޅުވި ފާޑުކިޔުންތަކަށެވެ.
އޭރު އިނގިރޭސިވިލާތުގައި ހުންނަވައިގެން ކުރީގެ ރައީސް މުހައްމަދު ނަޝީދާއެކު ޔުނައިޓެޑް އޮޕޮޒިޝަން ހައްދަވައިގެން ޔާމީނަށް ވަރަށް ބޮޑަށް ފާޑުވިދާޅުވި އެވެ. ޔާމީނަކީ އެންމެ ބޮޑު ހިޔާނާތްތެރިޔާ އަދި ގައުމަށް ޣައްދާރެއްގެ ގޮތުގައި ވެސް ޖަމީލު އޭރު ވިދާޅުވެފައިވެ އެވެ.
ޔާމީނާއެކު ޝަހީމް ނުކުންނެވި އިންތިހާބުގެ ތެރޭގައި ވެސް ޖަމީލު ވަނީ ޔާމީނަށް ހަމަލާތައް އަމާޒު ކުރައްވައި, އެމަނިކުފާނަށް އެންޓި ކެމްޕެއިން ކުރައްވާފަ އެވެ. އޭގެފަހުން ރާއްޖެ ވަޑައިގެން ވެސް ޔާމީނަށް ފާޑުވިދާޅުވި އެވެ. ނަމަވެސް, ރައްޔިތުންގެ މަޖިލީހުގައި އަމިއްލަ ގޮތުން ވާދަ ކުރައްވައި ކުރިމަތިވި ނާކާމިޔާބަށްފަހު ޖަމީލު އަނެއްކާވެސް ޔާމީންގެ ކޮޅަށް އަރުއްވައި ޕީޕީއެމްއަށް ސޮއި ކުރެއްވި އެވެ.
އެފަހުން ޖަމީލު ގެންދެވީ ޔާމީންގެ އެންމެ އިސް ވަކީލެއްގެ ގޮތުން އެމަނިކުފާނާ ވަރަށް އަރިހުގައި މަސައްކަތް ކުރައްވަމުންނެވެ.
