މިލާން (ޑިސެމްބަރު 1) - އިޓަލީގެ ކޮންސިއުމާ ރައިޓްސް ގްރޫޕް، ކޮޑަކޯންސް އިން ހުށަހަޅައިގެން ޔުވެންޓަސްއާ ގުޅޭ ކޮރަޕްޝަންގެ ސީރިއަސް މައްސަލައެއް އިޓަލީގެ ތަހުގީގީ އިދާރާތަކުން ބަލަން ފަށައިފި އެވެ.
ދާދި ފަހުން ތަހުގީގު ފެށި މި މައްސަލައިގައި ބަލަމުން އަންނަނީ 2019 އިން 2021 އާ ހަމައަށް ޔުވެންޓަސް އިން ކުރި ޓްރާންސްފާތަކާއި ލިބުނު ފައިދާގެ އިތުރުން ކުޅުންތެރިން ގަންނަން ދެއްކި އެޖެންޓް ފީތަކުގެ ފުރިހަމަ މައުލޫމާތު ކްލަބްގެ އެކައުންޓްސްގެ ލިޔެކިޔުންތަކުގައި ހިމަނާފައިނުވާތީ އެވެ.
ކޮޑަކޯންސްގެ ރައީސް މާކޯ ޑޮންޒޭލީ ވިދާޅުވީ ޔުވެންޓަސްގެ މާލީ ހަބަރުތަކުން ފެންނަ ކަންކަމާއި ކްލަބްގެ އެކައުންޓްސްގެ ލިޔެކިޔުންތައް ބަލާއިރު، ބޮޑެތި ފަރަގުތަކެއް އެބަހުރި ކަމަށެވެ. ޔުވެންޓަސް އިން ކުރި ހަރަދުތަކުގެ ތެރެއިން އެ ކްލަބްގެ އޮފިޝަލުން ނާޖާއިދު ފައިދާތަކެއް ޔުވެންޓަސް އިން ނަގާފައިވާ ކަމަށް ޑޮންޒޭލީ ތުހުމަތުކުރެއްވި އެވެ.
ޔުވެންޓަސްއާ ގުޅޭ މި މައްސަލައިގައި އެ ކްލަބްގެ ސީނިއާ ހަ އޮފިޝަލުންގެ އަމިއްލަ ބެންކް އެކައުންޓްތައް ވެސް ބަލާނެ އެވެ. އޭގެ ތެރޭގައި ޔުވެންޓަސްގެ ރައީސް އަންދްރެއާ އަގްނެއްލީ އާއި ވައިސް ޗެއާމަން ޕަވެލް ނެޑްވެޑް އަދި މިދިޔަ ސީޒަނަށް ފަހު ޔުވެންޓަސްގެ ސްޕޯޓިން ޑިރެކްޓަރުގެ މަގާމު ދޫކޮށް މިހާރު ޓޮޓެންހަމް ހޮޓްސްޕާސްއާ ހަވާލުވެހުރި ފަބިއޯ ޕަރަޓިޗީ ހިމެނެ އެވެ.
ޓިއުރިންގެ އިކޮނޮމިކް ފައިނޭންޝިއަލް ޕޮލިސް ޔުނިޓާ ވެސް ގުޅިގެން ބަލަމުން އަންނަ މި މައްސަލައިގައި އެންމެ ބޮޑަށް ފާހަގަކޮށްފައިވަނީ ދެ އަހަރުގެ މުއްދަތެއްގެ ތެރޭގައި ޔުވެންޓަސް އިން 56 މިލިއަން ޑޮލަރުގެ ފައިދާއެއް ލިބުނު ކަމަށް އިއުލާނުކޮށްފައިވީ ނަމަވެސް އޭގެ ތަފްސީލެއް ކްލަބްގެ އެކައުންޓްތަކުން ފެންނަން ނެތް ކަމެވެ.
ޔުވެންޓަސްގެ މި މައްސަލައިގައި އެ ކްލަބުން ހިންގި 42 ޓްރާންސްފާއެއްގައި ވެސް ގޯސްތަކެއް ހަދާފައިވާކަން ފާހަގަކުރެވިފައިވާ ކަމަށް އިޓަލީގެ މީޑިއާތަކުން ރިޕޯޓް ކުރެ އެވެ. އޭގެ ތެރޭގައި ޔުވެންޓަސް އިން ޔޮއާއޯ ކަންސޭލޯ، އާތޫރް މެލޯ، މިރަލެމް ޕިޔަނިޗް އަދި ޑަނީލޯގެ ޓްރާންސްފާގެ ކަންކަން ހިމެނެ އެވެ. މީގެ ތެރެއިން އާތޫރާއި ޕިޔަނިޗްގެ ޓްރާންސްފާ ކަންތައްތައް ކުރިއަށް ދިޔަ ގޮތް ރަނގަޅު ނޫންކަން ބާސެލޯނާގެ އޯޑިޓުން ވެސް ފާހަގަކޮށްފައިވެ އެވެ. އާތޫރް ޔުވެންޓަސް އަށް ދިޔައީ 85 މިލިއަން ޑޮލަރަށް ކަމަށް ރިޕޯޓްކޮށްފައިވީ ނަމަވެސް ދެ ކްލަބްގެ މާލީ ލިޔެކިޔުންތަކުން ފެންނަން ހުރީ 45 މިލިއަން ޑޮލަރެވެ.
މި މައްސަލައިގައި ތަހުގީގު ނިމޭއިރު، ޔުވެންޓަސްގެ މައްޗަށް ކުރާ ތުހުމަތުތައް ސާބިތުވެއްޖެނަމަ އެ ޓީމު އިޓަލީގެ ދެ ވަނަ ޑިވިޝަނަށް ރެލިގޭޓްކޮށް، 2020 ވަނަ އަހަރުގެ އިޓާލިއަން ލީގު ތަށި އަތުލާނެ އެވެ.
މީގެ ކުރިން ވެސް ޔުވެންޓަސް އަށް ވަނީ މެޗު ފިކްސިން (މެޗު ގަތުމާއި ވިއްކުން) އާއި މާލީ އިތުރު މައްސަލަތަކެއްގެ ސަބަބުން އަދަބުދީފަ އެވެ. އެ ގޮތުން އެ ފަހަރު ޔުވެންޓަސް ދެ ވަނަ ޑިވިޝަނަށް ރެލިގޭޓްކޮށްލިއިރު، 2005 އާއި 2006 ވަނަ އަހަރު ޔުވެންޓަސް އިން ހޯދި އިޓާލިއަން ލީގު ތަށި ވަނީ އަތުލައިފަ އެވެ..
އިޓާލިއަން ލީގުގައި ރޭ ޔުވެންޓަސް ވަނީ އެންމެ ފުލުގައި އޮތް ސަލެނިޓާނާ އަތުން 2-0 އިން މޮޅުވެފަ އެވެ. ޔުވެންޓަސްގެ ގޯލުތައް ޖެހީ ޕައޮލޯ ޑިބާލާ އާއި އަލްވާރޯ މޮރާޓާ އެވެ.
