ޔޫތު މިނިސްޓަރުގެ މަގާމުގައި ހުންނަވައި ހަމައެކަނި ކުރާ ކަމަކީ ފުޓްބޯޅަ ކުރިއެރުވުމޭ ބަޔަކު ބުނި ކަމުގައި ވިޔަސް އެއީ ހަގީގަތެއް ނޫން ކަމަށް ކުޅިވަރާބެހޭ ވަޒީރު އަހުމަދު މަހުލޫފް ވިދާޅުވެއްޖެ އެވެ.
މިނިސްޓަރު މިހެން ވިދާޅުވީ ގައުމީ ރާޅާއެޅުމުގެ މުބާރާތުގެ ނިންމުމުގެ ރަސްމިއްޔާތުގައި އިއްޔެ ހަވީރު ވާހަކަ ދައްކަވަމުންނެވެ. ރައީސް އިބްރާހިމް މުހައްމަދު ސޯލިހު ވެސް އިންނެވި މި އިވެންޓްގައި ވާހަކަދައްކަވަމުން މަހުލޫފް ވިދާޅުވީ ކުޅިވަރުގެ ތަރައްގީ އަށް ސަރުކާރުން ވަރަށް ބައިވަރު ކަންތައްތަކެއް އެބަކުރެވޭ ކަމަށެެވެ.
"ވަރަށް ގިނައިން އަޅުގަނޑަށް ހާއްސަކޮށް ސޯޝަލް މީޑިއާ ތެރެއިން އަމާޒުވެގެން އަންނާނެ މަހުލޫފް، ހަމައެކަނި ކުރާ ކަމަކީ ފުޓްބޯޅަ ކުރިއެރުވުން ހެއްޔޭ. އަޅުގަނޑު، ވަރަށް ކެރިހުރެ، މިތާ ހުރެ، ބުނަން ކެރޭ އަޅުގަނޑުމެން ކުރިއަރުވަނީ ހަމައެކަނި ފުޓްބޯޅައެއް ނޫން،" މަހުލޫފް ވިދާޅުވި އެވެ.
މިނިސްޓަރު މަހުލޫފް ވިދާޅުވީ އިއްޔެ ހަވީރު އޮތް ރާޅާއެޅުމުގެ މުބާރާތުގެ ނިންމުމުގެ ރަސްމިއްޔާތަށް އައުމުގެ ކުރިން ވޭތުވެދިޔަ ތަނުގައި ސާފިން އަށް ސަރުކާރުތަކުން ކޮށްފައިވާ ހޭދަ ބަލާލި ކަމަށެވެ.
ފާހަގަވި ކަމަކީ 2019 ވަނަ އަހަރުގެ ކުރިން ޔޫތު މިނިސްޓްރީން ސާފިން އެސޯސިއޭޝަނަށް ދީފައިވަނީ އެންމެ 20،000 ރުފިޔާ ކަމަށް މަހުލޫފް ވިދާޅުވި އެވެ. އަދި މި ފަހަރުގެ ގައުމީ ސާފިން މުބާރާތަށް އެކަނި ވެސް ޔޫތު މިނިސްޓްރީ މޯލްޑިވްސް ސާފިން އެސޯސިއޭޝަން (އެމްއެސްއޭ) އަށް ހަތަރު ލައްކަ ރުފިޔާ ދީފައިވާނެ ކަމަށް މިނިސްޓަރު ވިދާޅުވި އެވެ.
އިއްޔެ ބޭއްވި އިވެންޓްގެ ތެރެއިން ރައީސް ސޯލިހު (ކ) އާއި ޔޫތު މިނިސްޓަރު މަހުލޫފް (މ) އަދި ފިނޭންސް މިނިސްޓަރު އަމީރް
ކުޅިވަރުގެ ކޮންމެ އުމްރާނީ ވަސީލަތެއް ތަރައްގީ ކުރަން ބެލިޔަސް އެއީ ވަރަށް ގިނަ ހަރަދުތަކެއް ހިންގާ ކަންތައްތަކެއްކަން މިނިސްޓަރު ވަނީ ފާހަގަކުރައްވައިފަ އެވެ.
"ދެންމެ އެތާ އަޑުއަހަން އިންއިރު (އިއްޔެގެ އިވެންޓްގައި އިންއިރު) އަހުސަން ގޮވާ އަޑުއިވޭ މިއީ މާ ބޮޑު ހަރަދެއް ހިނގާ ކަމެއް ނޫނޭ (ކުޅިވަރުގެ) ފެސިލިޓީސް ޑިވެލޮޕްކޮށް ހަދަން. ދެންމެ އަޅުގަނޑު އަމީރު (ފިނޭންސް މިނިސްޓަރު) ކައިރީގައި އިނދެފައި މި ބުނީ ގދ. ގައްދޫގައި އަޅާ ސާފް ޓްރެކްގެ އަގު 3.4 މިލިއަން ރުފިޔާއޭ އެއީ،" މަހުލޫފް ވިދާޅުވި އެވެ.
"އަޅުގަނޑު މިއީ ރާޅާ އަޅާ މީހެއް ނޫން. ސާފިން އެސޯސިއޭޝަނުން އަޅުގަނޑު ކައިރިއަށް އައިސްފައި ހަމަގައިމުވެސް ހުސްއަތާ ދާން ނުޖެހޭނެކަން ސާފިން އެސޯސިއޭޝަނަށް އެނގޭނެ،"
މިނިސްޓަރު ވިދާޅުވީ ސާފިން އެސޯސިއޭޝަނާއި ރާއްޖޭގެ ރާޅާ އެޅުންތެރިންނަށް ވެސް ދޭން އޮތް ޔަގީންކަމަކީ ކުޅިވަރު ތަފާތު ނުކުރާނެކަން ކަމަށެެވެ. އަދި ސަރުކާރުގެ ހަރަދުގައި އަޅަމުން މިދާ ސާފް ޓްރެކްތަކާ އެކީގައި ތަމްރީން ޕްރޮގްރާމްތަކާއި މުބާރާތްތައް ބޭއްވުމަށް މަހުލޫފް ގޮވާލެއްވި އެވެ.
އަދި މި އަންނަ އަހަރު ރާއްޖޭގައި ބާއްވަން މަސައްކަތް ކުރާ އޭޝިއަން ސާފިން ޗެމްޕިއަންޝިޕްގެ ކަންކަން ކުރިއަށްގެންދިއުމަށް އެދޭ ކަމަށް މިނިސްޓަރު ވިދާޅުވި އެވެ.
މިނިސްޓަރު މަހުލޫފް ވިދާޅުވީ "ކުޅިވަރުގައި ހުރި ތަފާތުތައް ނައްތާލުމަށް" އެންމެ ބޮޑު އެއްބާރުލުމެއް ދެއްވަނީ ރައީސް އިބްރާހިމް މުހައްމަދު ސޯލިހު ކަމަށެވެ.
އިއްޔެގެ، އިވެންޓަކީ ޕްރޮސިކިއުޓާ ޖެނަރަލްގެ އޮފީހުން މިނިސްޓަރު މަހުލޫފްގެ މައްޗަށް ރިޝްވަތު ހިފުމުގެ ދައުވާ އުފުލި ފަހުން ރައީސް ސޯލިހާއި މިނިސްޓަރު މަހުލޫފް އެކުގައި ބައިވެެރިވެވަޑައިގެންނެވި ފުރަތަމަ އިވެންޓެވެ،
