ރ އަތޮޅު ދުވާފަރުގައި އެ އަތޮޅަށް ހާއްސަ ކޮށްގެން "ޑީ ލައިސަންސް" ފުޓްބޯޅަ ކޯޗިން ކޯހެއް ކުރިއަށް ގެންދަން ނިންމައިފި އެވެ.
ފުޓްބޯލް އެސޯސިއޭޝަން އޮފް މޯލްޑިވްސް (އެފްއޭއެމް)އާ ގުޅިގެން ދުވާފަރުގައި ކުރިއަށްގެންދާ، ޑީ ލައިސަންސް ކޯޗިން ކޯހުގައި ރ. އަތޮޅުގެ ކޮންމެ ރަށެއްގެ މީހަކަށް ވެސް ބައިވެރިވެވޭނެ އެވެ. މި ކޯސް ކުރިއަށް ގެންދަން ހަމަޖެހިފައިވަނީ އަންނަ މަހު 19-23 އަށް ދުވާފަރުގަ އެވެ.
"ޑީ ލައިސަންސް" ކޯސް ފުރިހަމަ ކުރަން ބޭނުންވާ ރ. އަތޮޅުގެ ކޮންމެ މީހަކަށް ވެސް އަންނަ ބުރާސްފަތި ދުވަހުގެ ކުރިން ކޯހުގައި ރަޖިސްޓްރީވެވޭނެ އެވެ.
ރަޖިސްޓްރޭޝަން ކަންކަން ފުރިހަމަކުރަން ފުރަން ޖެހޭ ފޯމް ދުވާފަރު ދާއިރާގެ މެމްބަރުގެ އިސްމާއިލް އަހުމަދުގެ އޮފީހުން ލިބިވަޑައިގަންނަވާނެ އެވެ. މި ކޯހަކީ މެމްބަރު އިސްމާއިލްގެ އިސްނެންގެވުމުގެ މަތިން އެފްއޭއެމާ ގުޅިގެން ކުރިއަށް ގެންދެވޭ ކޯހެކެވެ.
ކޯހުގައި ބައިވެރިވާން އެދޭ އެހެން ފަރާތްތަކުން މެމްބަރު އިސްމާއިލްގެ އޮފީސް ނަމްބަރު، 7544111 އަށް ގުޅުމުން ކޯހުގައި ބައިވެރިވުމުގެ ކަންކަން ހަމަޖެހިގެންދާނެ އެވެ.
އެފްއޭއެމުން އަންނަނީ ގިނަ ރަށްރަށުގައި ޑީ ލައިސަންސް ކޯސް ކުރިއަށް ގެންދަމުންނެވެ. މާޒިޔާ އިން ނ. ކެނދިކުޅުދޫގައިި މިހާރު ކުރިއަށްގެންދާ ކޭމްޕްގެ ތެރެއިން މާޒިޔާގެ އެހީއާ އެކު އެ ރަށުގައި ވެސް މިހާރު ޑީ ލައިސަންސް ކޯޗިން ކޯހެއް ކުރިއަށްދެ އެވެ. ދާދި ފަހުން ތ. ވިލުފުށީގައި ވެސް ވަނީ ޑީ ލައިސަންސް ކޯޗިން ކޯހެއް ބާއްވައިފަ އެވެ. އެ ކޯހުގައި ތ. އަތޮޅުގެ އެކި ރަށްރަށަށް ނިސްބަތްވާ ގިނަ ޒުވާނުންތަކެއް ވަނީ ބައިވެރިވެފަ އެވެ.
