އިރާނުގެ ނިޔުކްލިއާ މަޝްރޫއާ ބެހޭ އެއްބަސްވުމުގެ މަޝްވަރާ ފަސް މަހުގެ މެދުކެނޑުމަކަށް ފަހު އޮސްޓްރިއާގެ ވިއެނާގައި އަލުން ފަށަން ތައްޔާރުވެއްޖެ އެވެ.
މަޝްވަރާ ކުރާނެ އެންމެ މުހިއްމު އެއް ކަމަކީ 2015 ވަނަ އަހަރު އެކުލަވާލި އެއްބަސްވުމުގައި އެމެރިކާގެ ބައިވެރިވުން އަލުން ހިމެނުމާ މެދު ގޮތެއް ނިންމުމެވެ.
އެއްބަސްވުމުގެ ދަށުން އިރާނުގެ ނިޔުކްލިއާ ހަރަކާތްތައް މަޑުޖައްސާލުމުން ދަތިކުރުމުގެ ފިޔަވަޅުތައް އުވާލަން ނިންމި އެވެ. ނަމަވެސް 2018 ވަނަ އަހަރު އެމެރިކާ އިން އެއްބަސްވުމުން ވަކިވުމުން، އިރާނުން ވެސް އެއްބަސްވުމަށް އަމަލު ކުރުން ހުއްޓާލި އެވެ.
ނަމަވެސް އެމެރިކާގެ މިހާރުގެ ރައީސް ޖޯ ބައިޑެން ބޭނުންވެވަޑައިގަންނަވަނީ އިރާނުން ވެސް އެއްބަސްވުމަށް އަމަލު ކުރާ ނަމަ، އަލުން އެއްބަސްވުމުގައި ބައިވެރިވުމަށެވެ.
އިރާނުގެ ޔުރޭނިއަމް މުއްސަނދި ކުރުމުގެ ޕްރޮގްރާމުގައި މިހާރު ހޯދާފައިވާ ކުރިއެރުމަށް ބަލާއިރު، މިފަދަ އެއްބަސްވުމެއް ތަންފީޒު ކުރަން ވަގުތު ކުޑަތަންވަމުންދާ ކަމަށް ތަޖުރިބާކާރުން ބުނެ އެވެ.
ޔުރޭނިއަމް މުއްސަނދި ކުރުމަކީ ނިޔުކްލިއާ ބޮމަކަށް ވާސިލްވުމުގެ މަގެވެ. ނަމަވެސް އިރާނުން ބުނާ ގޮތުގައި ޔުރޭނިއަމް މުއްސަނދި ކުރަނީ ނިޔުކްލިއާގެ އެހީގައި ހަކަތަ އުފެއްދުމަށެވެ.
އިރާނާއި ފަސް ގައުމު ހިމެނޭ މަޝްވަރާތަކުގެ ރަސްމީ ނަމަކީ ޖޮއިންޓް ކޮމްޕްރިހެންސިވް ޕްލޭން އޮފް އެކްޝަން (ޖޭސީޕީއޯއޭ) އެވެ. މަޝްވަރާގައި ބައިވެރިވަނީ ޗައިނާ، ފްރާންސް، ޖަރުމަނުވިލާތް، ރަޝިއާ އަދި އިނގިރޭސިވިލާތެވެ.
އެ މަޝްވަރާތައް ފެށީ ވިއެނާގައި މިދިޔަ އޭޕްރިލް މަހު އެވެ. އެމެރިކާގެ މަންދޫބުން ދިޔައީ ނުސީދާކޮށް ބައިވެރިވަމުންނެވެ. ނަމަވެސް އޭގެ ފަހުން ބައްދަލުވުންތައް އޮތީ މެދުކެނޑިފަ އެވެ.
އެމެރިކާގެ އިސް އޮފިޝަލަކު ބުނެފައި ވަނީ މިދިޔަ ޖޫން މަހު އިރާނުގެ ރިޔާސީ އިންތިހާބުގެ ކުރިން އެއްބަސްވުމުގެ ބޮޑު ބައި އޮތީ ނިމިފައި ކަމަށެވެ. އިބްރާހިމް ރައިސީ އިންތިހާބުވެވަޑައިގެންނެވި ފަހުން އަދި މަޝްވަރާކޮށްފައެއް ނުވެ އެވެ.
