ޕެރިސް (ނޮވެމްބަރު 28) - ސާޖިއޯ ރާމޯސް ޕީއެސްޖީ ޖޯޒީގައި ކުޅުނު ފުރަތަމަ މެޗުގައި ލިއޮނަލް މެސީގެ މޮޅު ކުޅުމާ އެކު އެ ޓީމު 3-1 އިން ފްރެންޗް ލީގުގައި ސެއިންޓް-އެޓިއެން ބަލިކޮށްފި އެވެ.
މި މެޗުގެ ދެ ވަނަ ހާފުގައި ޕީއެސްޖީގެ ތަރި ނޭމާގެ ކުޑަހުޅަށް ލިބުނު ސީރިއަސް އަނިޔާގެ ސަބަބުން ބާލަން ޖެހުނީ އަށިގަނޑުގަ އެވެ. އަނިޔާގެ ސަބަބުން މިދިޔަ އަހަރުތަކުގައި ޕީއެސްޖީގެ ގިނަ މެޗުތަކެއް ނޭމާ އަށް ގެއްލުނުއިރު، މި ފަހަރު ކުޑަހުޅަށް މި ލިބުނު އަނިޔާގެ ސަބަބުން ވެސް ދިގު މުއްދަތަކަށް ކުޅުމާ ދުރަށް ދާން ޖެހުމުގެ ބިރު އެބައޮތެވެ.
ހިލޭ ޓްރާންސްފާއެއްގެ ދަށުން މި ސީޒަން ފެށުމުގެ ކުރިން ރެއާލް މެޑްރިޑް ދޫކޮށް ޕީއެސްޖީ އަށް ބަދަލުވި ރާމޯސް މިރޭ ވަނީ ފުރަތަމަ ފަހަރަށް ޕީއެސްޖީ އަށް މެޗެއް ކުޅެދީފަ އެވެ. އޭނާ އަށް އަނިޔާގެ ސަބަބުން ސީޒަނުގެ ކުރީކޮޅުގައި ޕީއެސްޖީ ކުޅުނު މެޗުތަކުގައި ނުކުޅެވުނެވެ.
ސެއިންޓް-އެޓިއެންއާ ދެކޮޅަށް މިރޭ ކުޅުނު މެޗުގެ ތެރެއިން ރާމޯސް.-- ފޮޓޯ: އޭއެފްޕީ
ސެއިންޓް-އެޓިއެން ދަނޑުގައި މިރޭ ކުޅުނު މެޗުގައި ފުރަތަަމަ ގޯލެއް ޖެހީ ވެސް ނޭމާ އެވެ. އެކަމަކު، ވީޑިއޯ އެސިސްޓަންޓް ރެފްރީ (ވީއޭއާރް) އިން ބެލުމަށް ފަހު ނިންމީ ގޯލު ބަލައިނުގަންނާށެވެ. ޕީއެސްޖީ ހާސްކޮށްލުމަށް ފަހު ފުރަތަމަ ގޯލު ޖެހީ ސެއިންޓް-އެޓިއެން އިންނެވެ. މެޗުގެ 23 ވަނަ މިނިޓްގައި އެ ޓީމުގެ ގޯލު ޖެހީ ޑެނިސް ބޮއަންގާ އެވެ. ޕީއެސްޖީން އޮފްސައިޑް ކަމަށް ބަލައިގެން ހުރި ނަމަވެސް ރެފްރީ ނިންމީ ގޯލެއް ކަަމަށެވެ. އެއީ ވީއޭއާރް އިން ބެލުމަށް ފަހު އެވެ.
ލީޑުހިފެހެއްޓުމުގައި ސެއިންޓް-އެޓިއެން އަށް ދިމާވި އެންމެ ބޮޑު ގޮންޖެހުމަކީ މެޗުގެ 45 ވަނަ މިނިޓްގައި އެ ޓީމުގެ ޓިމޮތީ ކޮލޮޑްޒޮއިޒެޗަށް ރަތް ކާޑެއް ދެއްކުމުންނެވެ. އޭނާ އަށް ސީދާ ރަތް ކާޑެއް ދެއްކީ ޕީއެސްޖީގެ ކީލިއަން އެމްބާޕޭ އަށް ނުރައްކާތެރި ފައުލެއް ކުރުމުންނެވެ.
ސެއިންޓް-އެޓިއެންގެ ކުޅުންތެރިއަކު މަދުވިތާ މިނިޓެއްހާއިރު ފަހުން ޕީއެސްޖީ އަށް އެއްވަރުކޮށްދިނީ މެސީ ހިލޭ ޖެހުމަކުން ނެގި ބޯޅައަކުން ކެޕްޓަން މާކުއީނިއޯސް އެވެ. މާކުއީނިއޯސް މި ގޯލު ޖެހީ ބޮލުންނެވެ. އެއް ކުޅުންތެރިއަކު މަދުކޮށް ސެއިންޓް-އެޓިއެން އިން ޑިފެންސް ކުރަމުންދަނިކޮށް ޕީއެސްޖީ އަށް ލީޑުނަގައިދިނީ މެޗުގެ 79 ވަނަ މިނިޓްގައި މެސީ ދިން ބޯޅައަކުން އެންހެލް ޑި މާރިއާ އެވެ.
ނޭމާ އަށް އަނިޔާވެގެން އަށިގަނޑަށް ލައިގެން ބާލަނީ.
އޭގެ ހަތަރު މިނިޓް ފަހުން ނޭމާގެ ކުޑަހުޅަށް ލިބުނު އަނިޔާއާ ގުޅިގެން އަށިގަނޑުގައި ބޭލި އެވެ. ދަނޑުން ފައިބައިގެން ދިޔައިރު، ނޭމާ އަށް ހުރީ ރޮވިފަ އެވެ.
މެޗުގެ އިތުރު ވަގުތުގައި މެސީ ނެގި ހުރަހަކުން މާކުއީނިއޯސް ބޮލުން ޖެހި ގޯލާ އެކު ޕީއެސްޖީން ވަނީ މެޗުގެ ތިން ޕޮއިންޓް ކަށަވަރުކޮށްފަ އެވެ. މިއީ މި ފަހަރު ލީގުގައި މާކުއީނިއޯސް ޖެހި ފުރަތަމަ ގޯލުތަކެވެ.
މި މޮޅާ އެކު ފްރެންޗް ލީގުގެ އެއް ވަނައިގައި ޕީއެސްޖީ އޮތީ 14 ޕޮއިންޓުގެ ލީޑަކާ އެކު އެވެ. އެއީ 15 މެޗުން 40 ޕޮއިންޓާ އެކު އެވެ. ތިން ވަނައިގައި އޮތް ރެނެސް އިން ލޮރިއެންޓް ބަލިކޮށްފިނަމަ ޕީއެސްޖީގެ ލީޑު 12 ޕޮއިންޓަށް ކުޑަވާނެ އެވެ.
