ބެއިޖިން، ޗައިނާ (ނޮވެމްބަރު 28) - ފިލައިގެން އުޅޭތާ 40 ދުވަސް ވީ ފަހުން އުތުރު ކޮރެއާގެ ކުށްވެރިޔަކު ޗައިނާ ފުލުހުން ހައްޔަރުކޮށްފި އެވެ.
މިދިޔަ އޮކްޓޯބަރު މަހު ޖަލުން ފިލި އުމުރުން 39 އަހަރުގެ ޒޫ ޒިއަންޖިއާން އަލުން ހައްޔަރު ކުރަން އެހީވާ ފަރާތަކަށް 23،000 އެމެރިކާ ޑޮލަރު ހުށަހެޅި އެވެ.
އޭނާ ޗައިނާގައި ހައްޔަރުކޮށް ޖަލަށް ލީ، ވަގަށް ޗައިނާއަށް އެތެރެވެ، ގިނަ ކުށްތަކެއް ކުރި ކަމަށް ސާބިތުވުމުންނެވެ.
އޭނާ ފިލައިގެން އުޅެނިކޮށް ހައްޔަރުކޮށްފައި ހުރިކަން ފިޔަވައި އިތުރު މައުލޫމާތެއް ފުލުހުން ނުދެ އެވެ. ދައުރުވާ ވީޑިއޯ އާއި ފޮޓޯތަކުން ފެންނަނީ ހިކި އަނަރޫފަވެފައި ހުރި މީހަކު ގެންދާ މަންޒަރެވެ.
ގަވާއިދާ ހިލާފަށް ޗައިނާ އަށް އެތެރެވެ، ފޭރުމާއި ވައްކަމުގެ މައްސަލަ އާއި އަންހެނަކަށް ވަޅިން ހަމަލާ ދިން ކަމަށް ސާބިތުވެ ޖަލުގައި ބަންދުކޮށްފައި ހުރި ޒޫ 2023 ވަނަ އަހަރު މިނިވަންކޮށް، އުތުރު ކޮރެއާ އަށް ޑީޕޯޓު ކުރަން އޮތީ ހަމަޖެހިފަ އެވެ.
އެހެންވެ، އޭނާ ޖަލުން ފިލީ އަލުން އުތުރު ކޮރެއާ އަށް ދާން ބޭނުން ނުވާތީ ކަމަށް ބުނާ އަޑުތައް ވަނީ ފެތުރިފަ އެވެ. ޗައިނާ އާއި އުތުރު ކޮރެއާއާ ދެމެދުގައިވާ ކޯރެއް ހުރަސްކޮށް އުތުރު ކޮރެއާ އިން އޭނާ ފިލީ 2013 ވަނަ އަހަރު އެވެ.
ހިޔުމަން ރައިޓްސް ވޮޗް އިން ބުނާ ގޮތުގައި ޗައިނާގެ ޖަލުތަކުގައި އުތުރު ކޮރެއާގެ 1،100 އަށް ވުރެ ގިނަ މީހުން އެބަ ތިއްބެވެ. އޭގެ ތެރެއިން ގިނަ މީހުން ޖަލުން ދޫކޮށް، ޑީޕޯޓް ކުރުމުން އުތުރު ކޮރެއާގައި ބޮޑެތި އަނިޔާ ތަހައްމަލު ކުރަން ޖެހެ އެވެ.
