ސިޑްނީ، އޮސްޓްރޭލިއާ (ނޮވެމްބަރު 28) - ކޮވިޑް ފަތުރާ ވައިރަހުގެ ގިނަ މިޔުޓޭޝަންތަކާ އެކު މާ ނުރައްކާ ކަމަށް ބެލެވޭ އާ ވޭރިއެންޓެއް ފެނުމުން ގައުމުތަކުން އަވަސް ފިޔަވަޅު އަޅައިފި އެވެ.
ބަލިމަޑުކަމާ ދެކޮޅަށް މިހާރު ހޯދާފައިވާ ކުރިއެރުންތައް ގެއްލިގެން ހިނގައިދާނެކަމުގެ ކަންބޮޑުވުން އުފެދިފައި ވަނީ ދެކުނު އެފްރިކާ އިން މުޅިން އަލަށް ފެނުނު އޮމިކްރޯން ވޭރިއެންޓާ ހެދި އެވެ.
ގިނަ މިޔުޓޭޝަންތައް ހިމެނޭކަން ޔަގީންކުރެވިފައިވާ އެ ވޭރިއެންޓުގެ ނުރައްކާ އޮތް މިންވަރު ދެނެގަންނަން ސައިންޓިސްޓުން ދަނީ މެދުނުކެނޑި މަސައްކަތް ކުރަމުންނެވެ. އެންމެ ބޮޑު އިސްކަމެއް ދީގެން ބަލަނީ ވެކްސިނުން އެ ވޭރިއެންޓާ ދެކޮޅަށް ރައްކާތެރިކަން ލިބޭނެތޯ އެވެ.
ގިނަ ގައުމުތަކުން ދެކުނު އެފްރިކާ އާއި އެފްރިކާ ބައްރުގެ ގައުމުތަކަށް ކުރާ ދަތުރު ހުއްޓާލާފައި ވާއިރު، މިހާތަނަށް އެންމެ ހަރުކަށި ފިޔަވަޅު އަޅާފައި ވަނީ އިޒްރޭލުންނެވެ. އެގޮތުން އިޒްރޭލުން ނިންމީ ބޯޑަރު އެއްކޮށް ބަންދުކޮށް، އެހެން ގައުމުތަކުގެ މީހުންނަށް އެތެރެވުމުގެ ހުއްދަ ނުދިނުމަށެވެ.
"އަޅުގަނޑުމެން މި ނަގަނީ ރަތް ދިދައެއް،" އިޒްރޭލުގެ ބޮޑު ވަޒީރު ނަފްތާލީ ބެނެޓް ވިދާޅުވި އެވެ. އޭނާ ވިދާޅުވީ "މި ނުރައްކާތެރި ވޭރިއެންޓާ" ދެކޮޅަށް މަސައްކަތް ކުރަން 10 މިލިއަން ޕީސީއާރް ޓެސްޓު ކިޓު ގަންނާނެ ކަމަށެވެ.
އޮމިކްރޯން ވޭރިއެންޓް އިޒްރޭލުން މިހާރު ވެސް ފެނިފައި ވާއިރު، އެހެން ގިނަ ގައުމުތަކުން ވެސް ދަނީ ފެންނަމުންނެވެ. ނެދަލޭންޑްސް އާއި އިނގިރޭސިވިލާތުގެ އިތުރުން ހޮންގް ކޮންގުން ނިމުނު ހަފުތާ ބަންދުގައި އެ ވޭރިއެންޓު ފެނުނެވެ.
އާދީއްތަ ދުވަހު އޮސްޓްރޭލިއާ އިން ބުނީ ދެކުނު އެފްރިކާ އިން ސިޑްނީ އަށް ދަތުރު ކުރި ފްލައިޓެއްގައި ތިބި ދެ މީހުން އެ ވޭރިއެންޓަށް ޕޮޒިޓިވް ކަމަށެވެ. އެ ދެ މީހުންނަކީ ވެސް ވެކްސިން ފުރިހަމަކޮށްގެން ތިބި މީހުންނެވެ.
އާ ވޭރިއެންޓް ފެނުމާ އެކު ގައުމުތަކުން ފިޔަވަޅު އެޅީ ވަރަށް ކުއްލި ގޮތަކަށެވެ. އެހެންކަމުން ދެކުނު އެފްރިކާގެ ޖޮހަނެސްބާގް އިންޓަނޭޝަނަލް އެއާޕޯޓުގައި ގިނަ ބަޔަކު ތޮއްޖެހެން މެދުވެރިވި އެވެ. އެންމެން ވެސް އުއްމީދުކޮށްގެން ތިބީ އެންމެ ފަހު ފްލައިޓުގައި ފުރައިގެން ދިޔުމަށެވެ.
ދެކުނު އެފްރިކާގެ ސައިންޓިސްޓުން މިދިޔަ ހަފުތާގައި ބުނީ ބީ.529.1.1 ވޭރިއެންޓު ފެނުނު އިރު އޭގައި މަދުވެގެން 10 މިޔުޓޭޝަން އެކުލެވޭ ކަމަށެވެ. އެއީ މީގެ ކުރިން އެންމެ ހަލުވިކޮށް ފެތުރުނު ބޭޓާ އާއި ޑެލްޓާ އަށް ވުރެ އެތައް ގުނައެއް އިތުރު އަދަދެކެވެ.
އެ ވޭރިއެންޓް ދެނެގަނެވުމާ އެކު ލަސްނުކޮށް ގައުމުތަކަށް އެންގުމުން އެމެރިކާ އިން ވަނީ ދެކުނު އެފްރިކާ އަށް ތައުރީފުކޮށްފަ އެވެ. ނަމަވެސް ދެކުނު އެފްރިކާ އިން ވަނީ ގައުމުތަކުން ދަތުރު ކުރުން ހުއްޓާލުމުން ހިތްހަމަނުޖެހުން ފާޅުކޮށްފަ އެވެ.
