ޕެރިސް، ފްރާންސް (ނޮވެމްބަރު 27) - ޗައިނާގެ ނުފޫޒު ގަދަ ސިޔާސީ ވެރިޔަކަށް ޖިންސީ ގޯނާކުރި ފަހުން ޓެނިސް ތަރި ޕެންގް ޝުއާއީގެ ހާލަތާ މެދު އަދިވެސް ވަރަށް ކަންބޮޑުވާ ކަމަށް ވިމެންސް ޓެނިސް އެސޯސިއޭޝަން (ޑަބްލިއުޓީއޭ) އިން ބުނެފި އެވެ.
ނޮވެމްބަރު މަހުގެ ކުރީކޮޅު ސޯޝަލް މީޑިއާ ވެއިބޯގައި ތުހުމަތުތައް ކުރި ފަހުން އާއްމު ތަނަކުން ޕެންގް ނުފެނި ވަރަށް ގިނަ ދުވަސްވި އެވެ. އެހެންވެ، އޭނާގެ ހާލަތު ސާފުކޮށްދިނުމަށް ބޭރުގެ ފަރާތްތަކުން ޗައިނާ އަށް ޕްރެޝަރު ކުރި އެވެ.
ޑަބްލިއުޓީއޭގެ ޗެއާމަން ސްޓީވް ސައިމަން ޕެންގް އަށް ދެ އީމެއިލް ފޮނުވި އިރު، ޖަވާބުގައި ލިބުނު ދެ އީމެއިލަށް ވެސް ވަރަށް ބޮޑަށް ނުފޫޒު ފޯރުވާފައިވާ ކަމަށް ޑަބްލިއުޓީއޭ އިން ތުހުމަތު ކުރެ އެވެ. އެހެންވެ، މިނިވަންކަމާ އެކު މުއާސަލާތު ކުރުމުގެ ހައްގު ގެއްލިފައި ވާތީ ކަންބޮޑުވުން ފާޅުކުރި އެވެ.
އުމުރުން 35 އަހަރުގެ ޓެނިސް ޗެމްޕިއަން ޖިންސީ ގޯނާގެ ތުހުމަތު ކުރީ، ކުރީގެ ވައިސް ޕްރިމިއާ ޒާންގް ގައޯލީ އަށެވެ. އެގޮތުން މިހާރު އުމުރުން 70 ގެ އަހަރުތައް ގުނަމުންދާ ޒާންގް ވަނީ އެތައް އަހަރެއް ވަންދެން ގަދަކަމުން ޖިންސީ ގުޅުން ބާއްވަން ޕެންގް އަށް މަޖުބޫރުކޮށްފައި ކަމަށް ބުންޏެވެ.
ވެއިބޯގައި އެ ވާހަކަ ޕޯސްޓު ކުރުމަށް ފަހު ފަހުން ރިމޫވްކުރި އެވެ. އޭގެ ފަހުން އާއްމު ތަނަކުން ނުފެނުމުގެ އިތުރުން ޕެންގްގެ ހަބަރެއް ވީ ދެ ހަފުތާ ފަހުންނެވެ.
މިދިޔަ ހަފުތާގައި ރަސްމީ އިވެންޓެއްގައި ޕެންގް ބައިވެރިވި މަންޒަރު ފެންނަ ފޮޓޯ އާއި ވީޑިއޯ އާއްމުކުރި އެވެ. އަދި އިންޓަނޭޝަނަލް އޮލިމްޕިކްސް ކޮމިޓީގެ ރައީސް ތޯމަސް ބެކްއާ އެކު 30 މިނެޓުގެ ވީޑިއޯ ކޯލެއްގައި ވެސް ބައިވެރިވި އެވެ.
