ޖޮހަނެސްބާގް، ދެކުނު އެފްރިކާ (ނޮވެމްބަރު 27) - ކޮވިޑް ފަތުރާ ވައިރަހުގެ އާ ވޭރިއެންޓެއް ދެކުނު އެފްރިކާ އިން ފެނުމުން އެކި ގައުމުތަކުން އަޅަމުންދާ ފިޔަވަޅުތަކާ މެދު ދެކުނު އެފްރިކާ ސަރުކާރުން ހިތްހަމަނުޖެހިއްޖެ އެވެ.
ޔޫރަޕާއި އެމެރިކާ އަދި ކެނެޑާގެ އިތުރުން އެހެން ބައެއް ގައުމުތަކުން ވަނީ ދެކުނު އެފްރިކާ އަށް ދަތުރު ކުރުން މަނާކޮށްފަ އެވެ. ދެކުނު އެފްރިކާ ސަރުކާރުން އެކަން ސިފަކުރީ އެއްވެސް ސައިންޓިފިކް ހެއްކެއް ނެތި ދުނިޔޭގެ ސިއްހަތު ޖަމިއްޔާ (ޑަބްލިއުއެޗްއޯ) ގެ ލަފަޔާ ހިލާފަށް ކުރާ ކަމެއްގެ ގޮތުގަ އެވެ.
އަލަށް ފެނުނު ވޭރިއެންޓަށް އޮމިކްރޯންގެ ނަން ދީފައިވާއިރު، ދެކުނު އެފްރިކާގައި ކުއްލިއަކަށް ކޮވިޑް ކޭސްތައް އިތުރުވެގެން އުޅެނީ އެ ވޭރިއެންޓާ ހެދި ކަމަށް ބެލެވެ އެވެ. ހޮންގް ކޮންގް އާއި ބެލްޖިއަމް، އިޒްރޭލް އަދި ބޮޓްސްވާނާ އިން ވެސް މި ވޭރިއެންޓް ވަނީ ފެނިފަ އެވެ.
"އަޅުގަނޑުމެންނަށް ގަބޫލުކުރެވެނީ ބައެއް ފިޔަވަޅުތަކަކީ އެއްވެސް ހަމައެއް ނެތި އަޅަމުންދާ ފިޔަވަޅުތަކެއް ކަމަށް،" ދެކުނު އެފްރިކާގެ ހެލްތު މިނިސްޓަރު ޖޯ ފާހްލާ ނޫސްވެރިންނަށް ވިދާޅުވި އެވެ.
ދެކުނު އެފްރިކާ އާއި އެފްރިކާ ބައްރުގެ ދެކުނުގައިވާ ގައުމުތަކަށް ދަތުރު ކުރުން އެންމެ ފުރަތަމަ މަނާކުރީ އިނގިރޭސިވިލާތުންނެވެ. މިހާރު އޮސްޓްރިއާ، ކެނެޑާ، ފްރާންސް، ޖަރުމަނުވިލާތް، އިޓަލީ، ނެދަލޭންޑްސް އަދި އެމެރިކާ އިން ވެސް ވަނީ އެ ފިޔަވަޅު އަޅާފަ އެވެ.
ޔޫރަޕިއަން ޔޫނިއަން (އީޔޫ) އިން ގައުމުތަކަށް ލަފާދިނީ ނުރައްކަލާ ގުޅޭ މައުލޫމާތު ސާފުވަންދެން އެފްރިކާ ބައްރުގެ ދެކުނަށް ކުރާ ހުރިހާ ދަތުރުތަކެއް ހުއްޓާލުމަށެވެ. ނަމަވެސް ޑަބްލިއުއެޗްއޯ އިން ހުކުރު ދުވަހު ގައުމުތަކަށް ބާރު އެޅީ ދަތުރުކުރުން ހުއްޓާ ނުލުމަށެވެ.
ޑަބްލިއުއެޗްއޯ އިން ބުނީ ފިޔަވަޅު އަޅަން އަދި މާ އަވަސް ކަމަށާއި ވޭރިއެންޓާ ގުޅޭ މައުލޫމާތު ދެނެގަންނަން ހަފްތާތަކެއް ނަގާނެ ކަމަށެވެ. ޑަބްލިއުއެޗްއޯ އިން ބުނީ އެފަދަ ފިޔަވަޅު އެޅުމުގައި ގައުމުތަކުން ވިސްނަންވީ ނުރައްކާ ދެނެގަނެ، ސައިންޓިފިކް ހެކީގެ އަލީގައި ނިންމުން ނިންމަން ކަމަށެވެ.
"މިހާތަނަށް ކުރި ދިރާސާތަކުން ފެންނަ ގޮތުގައި މި ވޭރިއެންޓުގައި ގިނަ މިއުޓޭޝަންތައް އެކުލެވޭ. އެހެންވެ، އިތުރު ދިރާސާތައް ކުރަން ޖެހޭ. މިއުޓޭޝަންތަކާ ގުޅޭ އިތުރު މައުލޫމާތު ހޯދައި، އޭގެ ސަބަބުން ބަލި ފެތުރޭ ހަލުވި މިނަށް އަދި ބަލީގައި ސީރިއަސްވާ މިންވަރަށް ބަދަލު އާދޭތޯ ބަލަމުން ދާނެ،" އެ އިދާރާ އިން ބުންޏެވެ.
"މި ހާލަތުގައި އަޅުގަނޑުމެން އަނެއްކާ ވެސް ތަކުރާރުކޮށް ބުނަން މި ޖެހެނީ، ދަތުރު ކުރުމާ ދެކޮޅަށް ފިޔަވަޅު އެޅުން އެދެވިގެން ނުވޭ."
ޑަބްލިއުއެޗްއޯ އިން ކަންބޮޑުވާ ވޭރިއެންޓުތަކުގެ ލިސްޓުގައި މިހާރު ހިމެނެނީ ހަތަރު ވޭރިއެންޓެކެވެ. އެއީ އަލްފާ، ބޭޓާ، ގަމާ އަދި ޑެލްޓާ އެވެ. އޭގެ ތެރެއިން އެންމެ ބޮޑަށް ފެތުރިފައި ވަނީ ޑެލްޓާ ވޭރިއެންޓެވެ.
އޭގެ އިތުރުން ސަމާލުކަންދީގެން މޮނީޓާ ކުރަމުންދާ ދެ ވޭރިއެންޓެއް ވެ އެވެ. އެއީ ލަމްބްޑާ އާއި މޫ އެވެ.
