ޖެނީވާ، ސްވިޓްޒަލޭންޑް (ނޮވެމްބަރު 26) - ކޮވިޑް ފަތުރާ ވައިރަހުގެ އާ ވޭރިއެންޓެއް ފެނުމާ ގުޅިގެން ދަތުރުކުރުމާ ދެކޮޅަށް ފިޔަވަޅު އަޅާތީ ދުނިޔޭގެ ސިއްހަތު ޖަމިއްޔާ (ޑަބްލިއުއެޗްއޯ) އިން ކަންބޮޑުވުން ފާޅުކޮށްފި އެވެ.
އަލަށް ފެނުނު ވޭރިއެންޓަކީ ބީ.529.1.1 އެވެ. ޑަބްލިއުއެޗްއޯ އިން ބުނީ ފިޔަވަޅު އަޅަން އަދި މާ އަވަސް ކަމަށާއި ވޭރިއެންޓާ ގުޅޭ މައުލޫމާތު ދެނެގަންނަން ހަފްތާތަކެއް ނަގާނެ ކަމަށެވެ. އެ ވޭރިއެންޓް އެންމެ ފުރަތަމަ ފެނުނީ ދެކުނު އެފްރިކާ އިންނެވެ.
ޔޫރަޕްގެ ގައުމުތަކުން މިހާރު ވެސް ވަނީ ދެކުނު އެފްރިކާ އަށް ދަތުރުކުރުން މަނާކުރަން ފަށާފަ އެވެ. ޑަބްލިއުއެޗްއޯ އިން ބުނީ އެފަދަ ފިޔަވަޅު އެޅުމުގައި ގައުމުތަކުން ވިސްނަންވީ ނުރައްކާ ދެނެގަނެ، ސައިންޓިފިކް ހެކީގެ އަލީގައި ނިންމުން ނިންމަން ކަމަށެވެ.
"ޑަބްލިއުއެޗްއޯ އިން ދަނީ ބީ.529.1.1 ކައިރިން މޮނީޓާ ކުރަމުން،" ތަރުޖަމާން ކްރިސްޓިއަން ލިންޑްމެޔޭ ވިދާޅުވި އެވެ.
"މިހާތަނަށް ކުރި ދިރާސާތަކުން ފެންނަ ގޮތުގައި މި ވޭރިއެންޓުގައި ގިނަ މިއުޓޭޝަންތައް އެކުލެވޭ. އެހެންވެ، އިތުރު ދިރާސާތައް ކުރަން ޖެހޭ. މިއުޓޭޝަންތަކާ ގުޅޭ އިތުރު މައުލޫމާތު ހޯދައި، އޭގެ ސަބަބުން ބަލި ފެތުރޭ ހަލުވި މިނަށް އަދި ބަލީގައި ސީރިއަސްވާ މިންވަރަށް ބަދަލު އާދޭތޯ ބަލަމުން ދާނެ."
ދެކުނު އެފްރިކާ އަށް ދަތުރުކުރުން މަނާކޮށްފައިވާ ގައުމުތަކަކީ ޖަރުމަނުވިލާތާއި، އިޓަލީ، އިނގިރޭސިވިލާތާއި ޔޫރަޕްގެ ބައެއް އެހެން ގައުމުތަކެވެ. ސިންގަޕޫރާއި މެލޭޝިއާ އިން ބުނީ އެފްރިކާގެ ހަތް ގައުމަކުން ދަތުރުކުރުން ލިމިޓު ކުރާނެ ކަމަށެވެ.
"މި ހާލަތުގައި އަޅުގަނޑުމެން އަނެއްކާ ވެސް ތަކުރާރުކޮށް ބުނަން މި ޖެހެނީ، ދަތުރު ކުރުމާ ދެކޮޅަށް ފިޔަވަޅު އެޅުން އެދެވިގެން ނުވޭ،" ލިންޑްމެޔޭ ވިދާޅުވި އެވެ.
ޑަބްލިއުއެޗްއޯ އިން ކަންބޮޑުވާ ވޭރިއެންޓުތަކުގެ ލިސްޓުގައި މިހާރު ހިމެނެނީ ހަތަރު ވޭރިއެންޓެކެވެ. އެއީ އަލްފާ، ބޭޓާ، ގަމާ އަދި ޑެލްޓާ އެވެ. އޭގެ ތެރެއިން އެންމެ ބޮޑަށް ފެތުރިފައި ވަނީ ޑެލްޓާ ވޭރިއެންޓެވެ.
އޭގެ އިތުރުން ސަމާލުކަންދީގެން މޮނީޓާ ކުރަމުންދާ ދެ ވޭރިއެންޓެއް ވެ އެވެ. އެއީ ލަމްބްޑާ އާއި މޫ އެވެ.
