ސާބިތު ދަރަންޏެއް އޮތުމުގެ ސަބަބުން ފަނޑިޔާރު ކަމަށް ޝަރުތު ހަމަނުވާތީ ދ. ކުޑަހުވަދޫ މެޖިސްޓްރޭޓް ކޯޓުގެ މެޖިސްޓްރޭޓް އުއްމުކުލްޘޫމް އަބޫބަކުރު މަގާމުން ދުރުކޮށްފި އެވެ.
ޖުޑިޝަލް ސާވިސް ކޮމިޝަން (ޖޭއެސްސީ)އިން މިރޭ ނެރުނު ބަޔާނެއްގައި ބުނީ މެޖިސްޓްރޭޓް އުއްމުކުލްޘޫމްގެ ސާބިތު ދަރަންޏެއް އޮތް ކަމަށް ކޮށްފައިވާ ހުކުމާ އެއްގޮތަށް އެ ދަރަނި މެޖިސްޓްރޭޓް އުއްމުކުލްޘޫމް އަދާކޮށްފައިނުވާ ކަމަށެވެ.
އެހެންކަމުން ފަނޑިޔާރުންގެ ގާނޫނުގެ 15 ވަނަ މާއްދާގައިވާ ގޮތުން އަދާކުރަންޖެހޭ ސާބިތު ދަރަންޏެއް އޮތް ނަމަ، ހުކުމާ އެއްގޮތަށް އެ ދަރަނި އަދާނުކުރުމަކީ ފަނޑިޔާރުންގެ ކިބައިގައި ހުރުން ލާޒިމްކުރާ ޝަރުތުތަކުގެ ތެރެއިން ޝަރުތެއް އުނިވާނެ ކަމެއް ކަމަށް ޖޭއެސްސީގެ ބަޔާނުގައި ބުނެ އެވެ.
އަދި އެއިން ޝަރުތެއް ފަނޑިޔާރެއްގެ ކިބައިން އުނިވެއްޖެ ނަމަ އެ ފަނޑިޔާރަކު ހުރި މަގާމެއް ހުސްވީ ކަމުގައި ފަނޑިޔާރުންގެ ގާނޫނުގައި ބަޔާންކުރާކަމަށް ވެސް ޖޭއެސްސީން ބުނެ އެވެ.
އެހެންކަމުން މެޖިސްޓްރޭޓް އުއްމުކުލްޘޫމް އަދާކުރައްވަމުންދިޔަ ދ. ކުޑަހުވަދޫ މެޖިސްޓްރޭޓް ކޯޓުގެ މެޖިސްޓްރޭޓްކަމުގެ މަގާމު ހުސްވެފައިވާ ކަމަށް ޖޭއެސްސީން މިއަދު ބޭއްވި ބައްދަލުވުމެއްގައި ނިންމާފައިވާ ކަމަށް އެ ކޮމިޝަނުން ބުންޏެވެ.
