އަރަބިއްޔާ ސުކޫލް ހިންގަމުން އަންނަ އިމާރާތުގައި ބޮޑެތި ރެނދުތަކެއް ލާފައިވާއިރު، އެތަނުގެ ސްޓްރަކްޗަރަލް އެސެސްމަންޓެއް ހަދަމުން އަންނަ ކަމަށާއި ނަމަވެސް މިވަގުތު އެ ސްކޫލްގެ ދަރިވަރުންނަށް ނުރައްކަލެއް ނެތް ކަމަށް އެޑިޔުކޭޝަން މިނިސްޓަރު ޑރ. އައިޝަތު އަލީ މިއަދު ވިދާޅުވެއްޖެ އެވެ.
އެ އިމާރާތުގެ ތަނބުތަކުން ބައިބައި ވެއްޓެމުން އަންނަ ކަމަށާއި ދަރިވަރުންގެ ފުރާނައަށް ނުރައްކާވުމުގެ ފުރުސަތު ބޮޑު ކަމަށް ބުނެ ގިނަ ބެލެނިވެރިން ދަނީ ކަންބޮޑުވުން ފާޅުކުރަމުންނެވެ.
ރ. މަޑުއްވަރީ ސްކޫލަށް ޕްރިންސިޕަލެއް ހޯދުން ލަސްވާތީ އެ ދާއިރާގެ މެމްބަރު އާދަމް ޝަރީފް ކުރެއްވި ސުވާލަށް ޖަވާބު ދެއްވަން މަޖިލީހުގެ މިއަދުގެ ޖަލްސާއަށް މިނިސްޓަރު ހާޒިރުވެވަޑައިގެންފައިވާއިރު، އަރަބިއްޔާ ސްކޫލް ހިންގާ އިމާރާތުގެ ހާލަތާ ގުޅޭގޮތުން މެމްބަރަކު ވަނީ ސުވާލު ކުރައްވައިފަ އެވެ.
އެ ސުވާލަށް ޖަވާބު ދެއްވަމުން، މިނިސްޓަރު ވިދާޅުވީ އެ ސްކޫލާ ގުޅޭގޮތުން ސަރުކާރުގެ ވެސް ކަންބޮޑުވުން ހުރި ކަމަށެވެ.
މިގޮތުން، އައިޝަތު އަލީ ވިދާޅުވީ 2013 ވަނަ އަހަރު ހުޅުވި ސްކޫލްގައި ބޮޑެތި ރެނދުތަކެއް ހުރި ކަން އެންމެ ފުރަތަމަ ފާހަގަކުރެވުނީ މިދިޔަ އަހަރުގެ ޑިސެމްބަރު މަހު ކަމަށެވެ.
އެކަން ފާހަގަވުމާ ގުޅިގެން ޕްލޭނިން މިނިސްޓްރީއާ ގުޅިގެން އެ އިމާރާތުގެ ވިޝުއަލް އިންސްޕެކްޝަނެއް ހެދި ކަމަށާއި އޭގެ ރިޕޯޓެއް އެޑިޔުކޭޝަނާ ހިއްސާ ކުރި ކަމަށެވެ.
މިނިސްޓަރު ވިދާޅުވި ގޮތުގައި އެ ރިޕޯޓުގައި މައިގަނޑު ގޮތެއްގައި ލަފާދީފައިވަނީ ވިޝުއަލް އިންސްޕެކްޝަނަކުން އިމާރާތުގެ ހާލަތު ދެނެގަންނަން ދަތިވާނެތީ ސްޓްރަކްޗަރަލް އެސެސްމަންޓެއްގެ ހެދުމަށެވެ.
އެޑިޔުކޭޝަން މިނިސްޓަރު ޑރ. އައިޝަތު އަލީ މަޖިލީހުގެ މިއަދުގެ ޖަލްސާގައި މެމްބަރުންގެ ސުވާލުތަކަށް ޖަވާބު ދެއްވަނީ. -ފޮޓޯ: މަޖިލިސް
އެފަދަ އެސެސްމަންޓެއް ހަދަން ބަޔަކު ހޯދަން ދަތިވި ނަމަވެސް، މިހާރު ބަޔަކު ލިބި އެ މަސައްކަތް ފެށިފައިވާ ކަމަށް އޭނާ ވިދާޅުވި އެވެ.
"އެ ރިޕޯޓުގައި ފާހަގަކުރާ ގޮތުގައި ދަރިވަރުންނަށް އަދި ގެއްލުމެއް ނެތް. އަޅުގަނޑުމެން ވަރަށް ކްލޯޒްލީ މޮނީޓާ ކުރަމުން މިދަނީ،" އައިޝަތު އަލީ ވިދާޅުވި އެވެ.
އަދި ދަރިވަރުންނަށް ނުރައްކާވާކަން އެނގޭ ހިސާބުން އެތަނުން ކުދިން ނެރުމުގެ މަސައްކަތް ކުރިއަށް ގެންދާނެކަމުގެ ޔަގީންކަން ވެސް މިނިސްޓަރު މިއަދު ވަނީ ދެއްވައިފަ އެވެ.
އަރަބިއްޔާ ސްކޫލު އެންމެ ފުރަތަމަ ހިންގީ އީޕީއެސް ކުރިން ހުރި އިމާރާތުގަ އެވެ. އޭގެ ފަހުން މަޖީދީ މަގުގައި ޓާޓާ ފްލެޓުތައް އަޅާފައި ހުރި ތަނާއި މަންދު ކޮލެޖު ހިންގި އެމްއީއެސް އިމާރާތުގައި ވެސް އަރަބިއްޔާ ސްކޫލު ހިންގި އެވެ.
މިހާރު އެ ސްކޫލު ހިންގާ އާ އިމާރާތް އެއްކޮށް ނިމުމުން އެ ތަނަށް ބަދަލުވީ ޖެނުއަރީ، 2013 ގަ އެވެ.
