މެންޗެސްޓާ (ނޮވެމްބަރު 24) - ހުސްވެފައިވާ މެންޗެސްޓާ ޔުނައިޓެޑްގެ ކޯޗުގެ މަގާމަށް ވަގުތީ ގޮތުން ބާސެލޯނާގެ ކުރީގެ ކޯޗު އާނެސްޓޯ ވަލްވޭޑޭ ހަމަޖައްސަން މަޝްވަރާ ކުރަމުން އަންނަ ކަމަށް މީޑިއާ ރިޕޯޓްތައް ބުނެފި އެވެ.
ޔުނައިޓެޑްގެ ކޯޗުގެ މަގާމު ހުސްވީ އިނގިރޭސި ޕްރިމިއާ ލީގުގައި އެންމެ ފަހުން ވަޓްފޯޑް އަތުން 4-1 އިން ބަލިވި މެޗަށް ފަހު އެ ޓީމުގެ ކޯޗަކަށް ހުރި އޮލެ ގުނަ ސޯލްޝެއާ މަގާމުން ދުރުކުރުމުންނެވެ.
ޔުނައިޓެޑްގެ ކެއާޓޭކާ ކޯޗުގެ ޒިންމާ ނަގައިގެން ހުރީ ސޯލްްޝެއާގެ އެސިސްޓަންޓް ކޯޗު މައިކަލް ކެރިކް އެވެ. ކެރިކްގެ ކޯޗުކަމުގައި ރޭ ޔުނައިޓެޑުން ވަނީ ޗެމްޕިއަންސް ލީގުގައި ވިޔަރެއާލް ދަނޑުގައި 2-0 އިން މޮޅުވެފަ އެވެ.
ޔުނައިޓެޑުން އެންމެ ގެންނަން ބޭނުންވާ ކޯޗުން ތިބީ އެހެން ޓީމުތަކުގެ ކޮންޓްރެކްޓްގަ އެވެ. އެއީ ޕީއެސްޖީގެ މައުރީސިއޯ ޕޮޗެޓީނޯ އާއި ލެސްޓާ ސިޓީގެ ބްރެންޑަން ރޮޖާސް އެވެ.
ސީޒަނުގެ މެދުތެރެއިން އެ ކޯޗުން ގެނައުން ވާނީ އުނދަގޫ ކަމަކަށް ކަން ޔުނައިޓެޑްގެ މެނޭޖްމަންޓަށް އެނގޭތީ އާ ކޯޗަކު ހޯދުމުގައި ޔުނައިޓެޑުން ވަނީ ތަފާތު މަގެއް އިހުތިޔާރުކުރަން ވަނީ ވިސްނައިފަ އެވެ. ޔުނައިޓެޑުން ގެންގުޅޭ އެއް ވިސްނުމަކީ މި ސީޒަނުގެ ނިޔަލަށް އިންޓަރިމް ކޯޗެއް (ވަގުތީ ކޯޗެއް) ގެންނާށެވެ. އެ މަގާމަށް ގެންނަން ވެސް ޔުނައިޓެޑުން ވަނީ ކޯޗުންތަކެއް ޝޯޓްލިސްޓްކޮށްފަ އެވެ. އޭގެ ތެރޭގައި ވަލްވޭޑޭގެ އިތުރުން އާރްބީ ލައިޕްޒިގުގެ ކުރީގެ ކޯޗު ރާލްފް ރަޖްނިކް ހިމެނެ އެވެ.
ދެހާސް އެއް ވަނަ އަހަރު އެތުލެޓިކް ބިލްބާއޯގެ އެސިސްޓަންޓް ކޯޗެއްގެ ގޮތުގައި ކޯޗިން ކެރިއަރު ފެށި ވަލްވޭޑޭ ހެޑް ކޯޗެއްގެ ގޮތުގައި އެންމެ ފުރަތަމަ މަސައްކަތް ކުރި ވެސް އެ ޓީމުގަ އެވެ. އޭގެ ފަހުން އޭނާ ވަނީ ސްޕެއިނުގެ ހަތަރު ޓީމަކާއި ގްރީސްގެ އޮލިމްޕިއާކޯސް އަށް ވެސް ކޯޗުކޮށްދީފަ އެވެ. ސްޕެއިނުގައި މަސައްކަތްކުރީ އެސްޕަންޔޯލް، ވެލެންސިއާ، ވިޔަރެއާލް އަދި ބާސެލޯނާގަ އެވެ. ބާސެލޯނާ ކޯޗުކަމުން މިދިޔަ އަހަރު ޖެނުއަރީ މަހު ވަކިކުރި ފަހުން ވަލްވޭޑޭ ހުރީ ޓީމަކާ ހަވާނުލުވެ އެވެ.
ވިއްސަކަށް އަހަރުވީ ކޯޗިން ކެރިއަރުގައި ވަލްވޭޑޭ ވަނީ 10 ޓްރޮފީ ހޯދައިފަ އެވެ. އޭގެ ތެރޭގައި އޮލިމްޕިއާކޯސްގައި ހުރެ ގްރީސްގެ ސުޕަ ލީގު ތިން ފަަހަރު ހޯދުމާއި ބާސެލޯނާ އަށް ދެ ފަހަރު ސްޕެނިޝް ލީގު ހޯދައިދިނުން ހިމެނެ އެވެ.
