ޓްރާންސްޕޯޓް އޮތޯރިޓީ އުވާލަން ރައްޔިތުންގެ މަޖިލީހުގެ ކޮމިޓީން ފާސްކޮށްފި އެވެ.
ޓްރާންސްޕޯޓް އޮތޯރިޓީ އުވާލުމަށް ސަރުކާރުގެ ފަރާތުން ވައިކަރަދޫ ދާއިރާގެ އެމްޑީޕީ މެންބަރު ހުސައިން ޒިޔާދު ހުށަހެޅުއްވި ބިލުގައި ވަނީ ޓްރާންސްޕޯޓް އޮތޯރިޓީގެ މުދަލާއި މަސައްކަތްތަކުގެ އިތުރުން މުވައްޒަަފުން ޓްރާންސްޕޯޓް މިނިސްޓްރީއަށް ބަދަލުކޮށް, އެ އޮތޯރިޓީ އުވާލުމަށެވެ.
ޓްރާންސްޕޯޓް އޮތޯރިޓީގެ ގާނޫނު އުވާލަން ހުށަހެޅީ އެ އޮތޯރިޓީގެ ހިދުމަތްތައް ލަސްވެ ރައްޔިތުންގެ ޝަކުވާ ބޮޑުވުމުންނެވެ.
ގައުމީ ތަރައްގީ އާއި ތަރިކައިގެ ކޮމިޓީ އާއި، ލާމަރުކަޒީ ކޮމިޓީގެ ޖޮއިންޓް ކޮމިޓީން ބިލް ދިރާސާކުރުމަށް ފަހު ރިޕޯޓް ފާސްކުރީ އިއްޔެ ބޭއްވި ބައްދަލުވުމުގަ އެވެ. ހާޒިރުވެ ތިއްބެވި 13 މެމްބަރުންގެ ތެރެއިން ބިލް ފާސްކުރަން ވޯޓު ދެއްވީ ނުވަ މެމްބަރުންނެވެ. އެމްޑީޕީގެ ދެ މެމްބަރަކު ބިލަށް ވޯޓު ނުދެއްވަ އެވެ.
އެ ބިލަށް މަޖިލީހުގެ ތަޅުމުގައި ބަހުސް ކުރިއަށް ދިޔައިރު ބައެއް މެމްބަރުން ވިދާޅުވެފައި ވަނީ ޓްރާންސްޕޯޓް އޮތޯރިޓީ އުވާލައި، މުވައްޒަފުން މިނިސްޓްރީގެ ދަށަށް ބަދަލުކުރުމަކީ ހަގީގީ މައްސަލައަށް ލިބޭނެ ހައްލެއް ނޫން ކަމަށެވެ.
އެ އޮތޯރިޓީގެ މެންޑޭޓް ލާމަރުކަޒުކޮށް، ކައުންސިލްތަކާ ހަވާލުކުރަން އެމްޑީޕީގެ މެމްބަރުން މަޖިލީހުގެ ވަކާލާތު ކުރެއްވެވި އެވެ.
ޓްރާންސްޕޯޓް އޮތޯރިޓީ އުވާލުމުގެ ބިލްގެ ދިރާސާ މަރުހަލާގައި ކޮމިޓީން ވަނީ ޓްރާންސްޕޯޓް އޮތޯރިޓީގެ އިތުރުން، ޓްރާންސްޕޯޓް މިނިސްޓްރީ އަދި އެޓާނީ ޖެނެރަލް އާއި ލޯކަލް ގަވާމެންޓް އޮތޯރިޓީ ބައްދަލުކޮށްފަ އެވެ.
