ފެމިލީ ކޯޓުގެ ގާޒީ އަބްދުﷲ އަދީބުގެ މައްޗަށް ހުށަހެޅުނު ސުލޫކީ މައްސަލަ ސާބިތުވާ ކަމަށް ކަނޑައަޅައި، ސުލޫކީ ފިޔަވަޅު އަޅަން ޖުޑީޝަލް ސާވިސް ކޮމިޝަން (ޖޭއެސްސީ)އިން ނިންމައިފި އެވެ.
ޖޭއެސްސީން މިއަދު ނެރުނު ބަޔާނެއްގައި ބުނީ ފެމިލީ ކޯޓަށް ހުށަހުޅުނު މައްސަލައެއް ބަލައި ހުކުމްކުރުމުގައި، މައްސަލަ ބެއްލެވި ގާޒީ އަދީބު ފަރުވާކުޑަކޮށްފައިވާކަން ސާބިތުވެފައިވާ ކަމަށެވެ.
މި އަމަލަކީ ފަނޑިޔާރުންގެ ސުލޫކީ މިންގަނޑާ ހިލާފަށް ކޮށްފައިވާ ކަމަކަށްވާތީ، ނަސޭހަތް ދިނުމާއެކު ކޮމިޝަނުން ކަނޑައަޅާ ތަމްރީނު ޕްރޮގްރާމެއް ފުރިހަމަ ކުރުމަށް ގާޒީ އަދީބަށް އެންގުމަށް ނިންމާފައިވާކަމަށް އެ ބަޔާނުގައި އިތުރަށް ބުންޏެވެ.
ޖޭއެސްސީން އަންނަނީ ފަނޑިޔާރުންނާ ދެކޮޅަށް ހުށަހެޅޭ ސުލޫކީ މައްސަލަތައް ބަލައި ފިޔަވަޅުތައް އަޅަމުންނެވެ.
މިގޮތުން، ބައެއް ފަނޑިޔާރުން މަގާމޫން ވަކި ކުރަން ވެސް ޖޭއެސްސީން މީގެ ކުރިން ނިންމާފައި ވެއެވެ.
