އަންނަ އަހަރު ރާއްޖޭގައި ބޭއްވުމަށް ނިންމާފައިވާ ބޯހިމެނުމުގައި ބޭނުން ކުރުމަށް 100 ޓެބްލެޓް ޔުސިސެފުން، ސްޓެޓިސްޓިކްސް ބިއުރޯއަށް ހަދިޔާ ކޮށްފި އެވެ.
ރާއްޖޭގައި ކޮންމެ 10 އަހަރަކުން އެއް އަހަރު ކުރިޔަށް ގެންދާ ބޯހިމެނުން ބާއްވަން ފެށުމަށް ނިންމާފައި ވަނީ އަންނަ އަހަރުގެ ސެޕްޓެމްބަރު މަހުގެ 17 ވަނަ ދުވަހު އެވެ.
ސްޓެޓިސްޓިކްސް ބިއުރޯގެ ޗީފް ސްޓެޓިސްޓިޝަން އައިޝަތު "އަދަދު" އަށް ވިދާޅުވީ އަންނަ އަހަރު ބޭއްވުމަށް ނިންމާފައިވާ ބޯހިމެނުމުގައި މައުލޫމާތު ރައްކާކުރުމަށް ޖުމްލަ 1876 ޓެބްލެޓް ބޭނުންވާ ކަމަށެވެ.
"މިހާތަނަށް ލިބިފައި ވަނީ އެހެން ސާވޭ ތަކަށް ބޭނުން ކުރުމަށް ގަނެފައިވާ 187 ޓެބްލެޓާއި ޔުނިސެފުން ހަދިޔާކުރި ޓެބްލެޓްސް،" އައިޝަތު ވިދާޅުވި އެވެ.
ބާކީ ނުލިބި ހުރި ޓެބްލެޓްތައް ސަރުކާރު ބަޖެޓުންނާއި ބޯހިމެނުމުގައި ބައިވެރިވާ މީހުން ބޭނުން ކުރާ ޓެބްލެޓްތައް ބޭނުންކޮށްގެން ހަމަކުރުމަށް މަސައްކަތް ކުރަމުންދާ ކަމަށް އޭނާ ވިދާޅުވި އެވެ.
"ބޭނުން ވެއްޖާ އެ ބޭފުޅުންގެ އަމިއްލަ ޑިވައިސް ބޭނުން ކޮށްގެން ޑޭޓާ ކަލެޓް ކުރެވޭނެ. އެކަމަކު އެ މުއްދަތުގަ ޓެބްލެޓްތައް ހުންނަން ޖެހޭނީ އަޅުގަނޑުމެން އަތުގައި،" އައިޝަތު ވިދާޅުވި އެވެ.
އަންނަ އަހަރުގެ ބޯހިމެނުމަށް މިހާރުން ފަށައިގެންވެސް ތައްޔާރުުވުމުގެ މަސައްކަތްތައް ކުރިޔަށްދާއިރު، ބޯހިމެނުމަށް 4،300 އެއްހާ މަސައްކަތްތެރިން ބޭނުންވާނެ ކަމަށް ސްޓެޓިސްޓިކްސް ބިއުރޯއިން ލަފާ ކުރެ އެވެ.
އަދި އެއް ފަހަރާ ރާއްޖޭގެ ހުރިހާ ސަރަހައްދެއްގައި ބޯހިމެނުން ކުރިޔަށްގެންދާއިރު، އެއީ އުނދަގޫ މަސައްކަތެއް ކަމަށާއި އެހެންކަމުން އެއީ ގައުމީ ކަމެއްގެ ގޮތުގައި ދެކުމަށް އެންމެންގެ އެއްބާރުލުން ދިނުމަށް ޗީފް ސްޓެޓިސްޓިޝަން އައިޝަތު އެދިލެއްވި އެވެ.
