ފަސް ތަރީގެ ރިސޯޓަކުން މޫދަށް ޕްލާސްޓިކާއި ފަނާ ނުވާ ފަދަ ކުނި އުކަމުންދިޔަ މައްސަލައެއް ފެންމަތިވެފައި އޮއްވައި، ރާއްޖޭގައި ހިންގާ ރިސޯޓުތަކުން މޫދަށް ކުނި އެޅުމަށް ގަވާއިދަކުން ހުއްދަ ދީފައިވާ އޮތް މާއްދާ ޓުއަރިޒަމް މިނިސްޓްރީން މިއަދު ބާތިލްކޮށްފި އެވެ.
"ފަތުރުވެރިކަމުގެ ދާއިރާގައި ތިމާވެށި ހިމާޔަތްކޮށް ރައްކާތެރިކުރުމާ ބެހޭ ގަވާއިދު" އަށް މިއަދު ގެނެއި އިސްލާހުން އުވާލާފައި ވަނީ އެ ގަވާއިދުގެ 5.3.3 ވަނަ މާއްދާ އެވެ. މި އިސްލާހާއެކު ރިސޯޓުތަކުން މޫދަށް ކުނި އުކުމަށް 2006 ވަނަ އަހަރު އަމަލު ކުރަން ފެށި އެ ގަވާއިދުން ފަހި ކުރި މަގު ބަންދުވީ އެވެ.
އެ މާއްދާގައި ބުނެފައި ވަނީ "ކައިރި ހިސާބެއްގައި ކުނި އުކާލާނެ ތަނެއް ނެތް ހާލަތެއްގައި ކުނި ކަނޑަށް އަޅަން ޖެހިއްޖެ ނަމަ އުކާލެވޭނީ ހަމައެކަނި ކާބޯތަކެތީގެ ބާކީ ބަޔާއި ބެހެއްޓުމުން އަމިއްލައަށް ނެތިފަނާވެދާ ބަޔޯޑީގްރޭޑަބަލް ތަކެތި" ކަމަށެވެ. އަދި "މިގޮތުން އުކާލެވޭ އަމިއްލައަށް ފަނާވެނެތިދާ ކުނި އުކާލަންޖެހޭނީ އަތޮޅުން ބޭރަށް ވަޔާއި އޮޔަށް ބަލައި ރަށްރަށަށް ނުލައްގާ ގޮތަށް" ކަމަށް ވެސް އެ މާއްދާގައި ބުނެފައި އޮތެވެ.
ރިސޯޓުތަކުން މޫދަށް ކުނި އެޅުން މަނާކޮށްފައި މި ވަނީ ފަސް ތަރީގެ އެމެރަލްޑް މޯލްޑިވްސް ރިސޯޓް އެންޑް ސްޕާއިން މޫދަށް ކުނިއަޅާކަން އެ ރިސޯޓުގައި މަސައްކަތް ކުރި މީހަކު ފަޅާއަރުވާލާފައި އޮއްވަ އެވެ. ރ. އަތޮޅުގައި ހިންގާ 160 އެނދުގެ އެ ރިސޯޓުން މޫދަށް އެޅި ކުނި ތެރޭގައި ޕްލާސްޓިކާއި އަމިއްލައަށް ފަނާވެނުދާނެ ފަދަ ތަކެތި ވެސް ހިމެނެ އެވެ.
މޫދަށް ކުނި އެޅުން މިއަދު މަނާކޮށްފައި މި ވަނީ އެމަރަލްޑުގެ މައްސަލައިގައި ބަލަމުންދާ ކަމަށް އީޕީއޭއިން ބުނެފައި އޮއްވަ އެވެ. ނަމަވެސް މިހާތަނަށް އެ މައްސަލައިގައި ރިސޯޓާމެދު ފިޔަވަޅު އެޅިކަން އެނގިފައެއް ނެތެވެ.
