ބެއިޖިން، ޗައިނާ (ނޮވެމްބަރު 22) - ދެކުނު ޗައިނާ ކަނޑުގައި ޗައިނާގެ ކޯސްޓުގާޑުން ފިލިޕީންސްގެ ބޯޓުތަކަށް ވޯޓާ ކެނަންގެ އެހީގައި ބާރު ސްޕީޑުގައި ފެން ޖެހި މައްސަލަ ފިލިޕީންސްގެ ރައީސް ރޮޑްރިގޯ ޑުޓާޓޭ ކުށްވެރި ކުރައްވައިފި އެވެ.
ޑުޓާޓޭ އެގޮތަށް ވިދާޅުވީ ޗައިނާގެ ރައީސް ޝީ ޖިންޕިން އިސް ބާއްވަވާ އޭޝިއާ ސަރަހައްދުގެ ސަމިޓެއްގައި ވާހަކަދައްކަވަމުންނެވެ. ޑުޓާޓޭ ވިދާޅުވީ ފިލިޕީންސް އިން "ކުދި ގައުމުތަކަށް ބުލީ ނުކުރާނެ" ކަމަށާއި އެހެން ގައުމުތަކުގެ މައްޗަށް ގަދަވާން ނޫޅޭނެ ކަމަށެވެ.
ޗައިނާ އިން ބުނާ ގޮތުގައި މުޅި ދެކުނު ޗައިނާ ކަނޑު އެއީ ޗައިނާގެ ބަޔެކެވެ. އެ ހިސާބަކީ ބައިނަލްއަގްވާމީ ވިޔަފާރި އަށް މުހިއްމު ހިސާބެކެވެ. ބްރޫނައި، މެލޭޝިއާ، ފިލިޕީންސް، ޓައިވާން އަދި ވިއެޓްނާމުން ވެސް ދެކުނު ޗައިނާ ސަރަހައްދުގެ އެކި ހިސާބުތަކަށް ދައުވާކުރެ އެވެ.
ނަމަވެސް ތާރީހީ ގޮތުން މުޅި އެ ހިސާބަކީ ޗައިނާގެ ދައުލަތުގެ ސަރަހައްދު ކަމަށް ޗައިނާ އިން ބުނެ އެވެ. އެކަމަކު އެ ވާހަކަ ސާބިތުކުރެވޭނެ އެއްވެސް ހެއްކެއް ނެތް ކަމަށް 2016 ވަނަ އަހަރު ދަ ހޭގްގައި ހުންނަ ޕާމަނަންޓް ކޯޓް އޮފް އާބިޓްރޭޝަނުން ނިންމި އެވެ.
އެކަމަކު އެ ނިންމުމަށް ޗައިނާ އިން އިހްތިރާމެއް ނުކުރެ އެވެ. ދެކުނު ޗައިނާ ކަނޑުގައި އޮންނަ ސްޕްރެޓްލީ އައިލެންޑްސްއާ މެދު ފިލިޕީންސް އާއި ޗައިނާ އިން ދެބަސްވެ އެވެ. އެ ހިސާބުގައި އުޅުނު ފިލިޕީންސްގެ ސިފައިންނަށް ސަޕްލައި ފޯރުކޮށްދޭން ދިޔަ ބޯޓުތަކަށް ޗައިނާ ކޯސްޓުގާޑުން ހަމަލާދިނީ މިދިޔަ ހަފުތާގަ އެވެ.
އެ މައްސަލައިގައި ފިލިޕީންސް އިން ނުރުހުން ފާޅުކުރުމުން ޗައިނާ އިން ބުނީ ގަވާއިދާ ހިލާފަށް ޗައިނާގެ ކަނޑުގެ ސަރަހައްދަށް ފިލިޕީންސްގެ ބޯޓުތައް އެތެރެވި ކަމަށެވެ. އެ ހިސާބުގައި ހަމަނުޖެހުން އިތުރުވެދާނީ ބައިނަލްއަގްވާމީ ކަންބޮޑުވުން އެބަ އޮތެވެ.
އެމެރިކާ އިން ހުކުރު ދުވަހު ބުނީ ހަތިޔާރާ އެކު ފިލިޕީންސްގެ އުޅަނދަކަށް ޗައިނާ އިން ހަމަލާ ދީފި ނަމަ އެމެރިކާ އާއި ފިލިޕީންސްއާ ދެމެދުގައިވާ އެއްބަސްވުންތަކުގެ ދަށުން އެމެރިކާ އިން ރައްދުގައި ފިޔަވަޅުތައް އަޅާނެ ކަމަށެވެ.
ޔޫރަޕިއަން ޔޫނިއަން (އީޔޫ) އިން ވެސް ވަނީ ދެކުނު ޗައިނާ ކަނޑުގައި މިނިވަންކަމާ އެކު ދަތުރުކުރުމުގެ ހައްގަށް އިހްތިރާމް ކުރުމަށް ގޮވާލާފަ އެވެ.
