ޖެނީވާ، ސްވިޓްޒަލޭންޑް (ނޮވެމްބަރު 22) - ޗައިނާގެ ޓެނިސް ތަރި ޕެންގް ޝުއާއީ ވީޑިއޯ މެދުވެރިކޮށް އިންޓަނޭޝަނަލް އޮލިމްޕިކް ކޮމިޓީގެ ވެރިޔާއާ ވާހަކަދެއްކުމަށް ފަހު، ހާލު ރަނގަޅު ކަމަށް ބުނެފި އެވެ.
ނޮވެމްބަރު މަހުގެ ކުރީކޮޅު ޗައިނާގެ އިސް އޮފިޝަލަކާ ދެކޮޅަށް ޖިންސީ ގޯނާގެ ތުހުމަތު ކުރި ފަހުން ޕެންގްގެ ހަބަރެއް ނުވާތީ އޭނާ ދިރިހުރިކަމުގެ ހެކި ދައްކަން ޗައިނާ އަށް ޕްރެޝަރާ ކުރިމަތިވި އެވެ.
އައިއޯސީގެ ރައީސް ތޯމަސް ބެކްއާ އެކު ބޭއްވި 30 މިނެޓުގެ ވީޑިއޯ ކޯލްގައި ޕެންގް ވަނީ އޭނާގެ ހާލާ މެދު އެކި ފަރާތްތަކުން ކަންބޮޑުވުން ފާޅުކޮށްފައި ވާތީ ޝުކުރު އަދާކޮށްފަ އެވެ.
އައިއޯސީން ނެރުނު ބަޔާނެއްގައި ބުނީ ޕެންގްގެ ހާލު ރަނގަޅު ކަމަށާއި ބެއިޖިންގައި ހުންނަ ގޭގައި މި ވަގުތު އުޅެމުން ދާއިރު ޒާތީ ދިރިއުޅުމަށް އިހްތިރާމް ކުރުމަށް އޭނާ އެދުނު ކަމަށެވެ.
"ޕެންގް މި ވަގުތު ބޭނުން ވަނީ އެކުވެރިންނާއި އާއިލާއާ އެކު އުޅެން. ނަމަވެސް، ޓެނިސްގެ އެކި ކަންކަމުގައި ބައިވެރިވާނެ ކަމަށް ބުނި."
ރަސްމީ އިވެންޓެއްގައި ޕެންގް ބައިވެރިވާ މަންޒަރު ފެންނަ ފޮޓޯތަކެއް އާދީއްތަ ދުވަހު އާއްމުވި އެވެ. އެއީ ތުހުމަތުތައް ކުރި ފަހުން އާއްމު ތަނަކުން އޭނާ ފެނުނު ފުރަތަމަ ފަހަރެވެ.
އޭގެ ކުރިން ޕެންގްގެ އީމެއިލެއް ކަމަށް ބުނާ އީމެއިލެއް ޗައިނާގެ މީޑިއާ އިން އާއްމުކުރި އެވެ. އެއީ ހާލު ރަނގަޅު ކަމަށް ބުނެ ވޯލްޑް ޓެނިސް އެސޯސިއޭޝަން (ޑަބްލިއުޓީއޭ) ގެ ރައީސަށް ފޮނުވި އީމެއިލެކެވެ.
ނޮވެމްބަރު މަހުގެ ކުރީކޮޅުން ފެށިގެން ޕެންގް ގެއްލުނީ ޗައިނާގެ ކުރީގެ ވައިސް ޕްރިމިއާ ޒަންގް ގައޮލީއާ ގުޅޭ ތުހުމަތުތަކެއް ޗައިނާގެ ސޯޝަލް މީޑިއާ ވެއިބޯގައި ޕޯސްޓު ކުރި ފަހުންނެވެ.
ޕެންގް ބުނީ 2013 އިން 2018 އަށް ވައިސް ޕްރިމިއާކަން ކުރެއްވި ޒާންގްއާ އެކު ޖިންސީ ގުޅުމެއް ބާއްވަން އޭނާ އަށް މަޖުބޫރު ކުރުވި ކަމަށެވެ. ފަހުން އެ ޕޯސްޓު ވަނީ ރިމޫވްކޮށްފަ އެވެ. އަދި އޭގެ ފަހުން ޕެންގްގެ ހަބަރެއް ނުވެ އެވެ.
ކުރީގެ ވައިސް ޕްރިމިއާ ޒާންގް އަކީ ޗައިނާގެ ރައީސް ޝީ ޖިންޕިން އާ ގާތް ގުޅުމެއް އޮންނަ ބޭފުޅެކެވެ.
