މެޑްރިޑް (ނޮވެމްބަރު 21) - ސްޕެނިޝް ލީގުގައި ރޭ ގްރަނާޑާ އަތުން 4-1 އިން މޮޅުވެ، ރެއާލް މެޑްރިޑް ލީގުގެ އެއް ވަނަ އަށް ޖެހިލައިފި އެވެ.
ރެއާލް އެއް ވަނައިގައި އޮތީ ކުޅުނު 13 މެޗުން 30 ޕޮއިންޓާ އެކު އެވެ. ދެ ވަނައިގައި އޮތް ރެއާލް ސޮސިއެޑާޑް ރޭ ވަނީ ވެލެންސިއާއާ ލަނޑެއް ނުޖެހި އެއްވަރުވެފަ އެވެ. ސޮސިއެޑާޑް މޮޅުވި ނަމަ އެއް ވަނަ އަށް އަލުން އެރޭނެ އެވެ. އެކަމަކު، މޮޅުނުވެވުމުން ސޮސިއެޑާޑް ދެ ވަނައިގައި އޮތީ 14 މެޗުން 29 ޕޮއިންޓް ހޯދައިގެންނެވެ.
ގްރަނާޑާ ދަނޑުގައި ރޭގެ މެޗު ފަށައިގެން 19 ވަނަ މިނިޓްގައި ޓޯނީ ކްރޫސް ދިން ބޯޅައެއް ހިފައިގެން އޭރިއާތެރެއަށް ވަދެ މާކޯ އަސެންސިއޯ ވަނީ ގޯލުގެ ތެރެއަށް ބޯޅަ ފޮނުވާލައި ރެއާލަށް ލީޑުނަގައިދީފަ އެވެ. ކޯނަރެއްްގައި ލޫކަ މޮޑްރިޗާއި ކްރޫސް ގުޅިގެން ތަނަވަސްކުރި ފުރުސަތެއްގައި ރެއާލަށް ލީޑުފުޅާކޮށްދިނީ މެޗުގެ 24 ވަނަ މިނިޓްގައި ނަޗޯ ފެނާންޑޭޒް އެވެ.
މެޗުގެ 34 ވަނަ މިނިޓްގައި ގްރަނާޑާގެ ލުއިސް ސުއަރޭޒް އޭރިއާބޭރުން ޖެހި ބޯޅައެއް ރެއާލް ކުޅުންތެރިއަކު ގައިގައި ޖެހިފައި ވަނީ ގޯލަށެވެ. މި ގޯލާ އެކު ގްރަނާޑާ އަށް އުއްމީދެއް ލިބުނެވެ.
ކައުންޓަ އެޓޭކެއްގައި މެޗުގެ 56 ވަނަ މިނިޓްގައި މޮޑްރިޗް ހުސްކޮށްލާފައި ދިން ބޯޅަައަކުން ރެއާލްގެ ތިން ވަނަ ގޯލު ޖެހީ މި ވަގުތު ތަފާތު ފޯމެއްގައި ހުރި ވިނީޝިއުސް ޖޫނިއާ އެވެ.
މެޗުގެ 68 ވަަނަ މިނިޓްގައި ވިނީޝިއުސް އަށް ކުރި ނުރައްކާތެރި ފައުލަކަށް ގްރަނާޑާގެ ރޮޑްރީގޭޒް ހިމޭނޭޒަށް ވަނީ ރަތް ކާޑެއް ދައްކައިފަ އެވެ. އެ ނިންމުމާ މެދު ގްރަނާޑާގެ ކޯޗު ރޮބާޓޯ މޮރޭނޯ ހިތްހަަަމަ ނުޖެހުން ފާޅުކުރި ގޮތުން އޭނާ އަށް ވެސް ވަނީ ރަތް ކާޑެއް ދައްކައިފަ އެވެ.
ގްރަނާޑާގެ އެއް ކުޅުންތެރިއަކު މަދުވި ފަހުން ރެއާލްގެ ހަތަރު ވަނަ ގޯލު ޖެހީ ކަސެމީރޯ ހުސްކޮށްލާފައި ދިން ބޯޅައަކުން ވާތުބެކް ފާލަންޑް މެންޑީ އެވެ. މެންޑީ މި ގޯލު ޖެހީ އޭރިއާތެރެއިންނެވެ.
ސްޕެނިޝް ލީގުގެ ފުލުގައި އޮތް ގެޓަފޭ އިން ވަނީ 4-0 އިން ކަޑިޒް ބަލިކޮށް ފިޔަވަޅެއް ކުރިއަށް ޖެހިލައިފަ އެވެ. ފަސް ވަނައިގައި އޮތް ރެއާލް ބެޓިސް ވަނީ 3-0 އިން އެލްޗޭ ދަނޑުގައި ކުޅުނު މެޗު ކާމިޔާބު ކޮށްފަ އެވެ.
