ބެއިޖިން، ޗައިނާ (ނޮވެމްބަރު 21) - ޗައިނާގެ އިސް އޮފިޝަލަކަށް ޖިންސީ ގޯނާގެ ތުހުމަތު ކުރި ފަހުން ގެއްލިފައިވާ ކަމަށް ބެލެވޭ ޓެނިސް ތަރި ޕެންގް ޝުއާއީ އިވެންޓެއްގައި އުޅޭ ފޮޓޯތަކެއް އާއްމުކޮށްފި އެވެ.
ޕެންގްގެ ހަބަރެއް ނުވާތީ ބައިނަލްއަގްވާމީ މުޖުތަމައިން އަންނަނީ އޭނާ ދިރިހުރިކަމުގެ ހެކި ދައްކަން ޗައިނާ އަށް ޕްރެޝަރު ކުރަމުންނެވެ. ދުނިޔޭގެ ޓެނިސް ޗެމްޕިއަނުންނާއި ޓެނިސް ފެޑެރޭޝަނުން ވެސް އޭނާގެ ހަބަރެއް ނުވާތީ ކަންބޮޑުވުން ފާޅުކުރި އެވެ.
އާދީއްތަ ދުވަހު އާއްމު ކުރި ރަސްމީ ފޮޓޯތަކުން ޕެންގް ފެންނަނީ ކިޑްސް ޖޫނިއާ ޓެނިސް ޗެލެންޖާ ފައިނަލްސް ބަލައިލަން ގޮސް ހުއްޓަ އެވެ. ފޮޓޯތައް އާއްމު ކުރީ ޗައިނާ އޯޕަންގެ ރަސްމީ ވެއިބޯ ސޯޝަލް މީޑިއާ އެކައުންޓުންނެވެ.
ނޮވެމްބަރު މަހުގެ ކުރީކޮޅުން ފެށިގެން ޕެންގް ގެއްލުނީ ޗައިނާގެ ކުރީގެ ވައިސް ޕްރިމިއާ ޒަންގް ގައޮލީއާ ގުޅޭ ތުހުމަތުތަކެއް ޗައިނާގެ ސޯޝަލް މީޑިއާ ވެއިބޯގައި ޕޯސްޓު ކުރި ފަހުންނެވެ.
ޕެންގް ބުނީ 2013 އިން 2018 އަށް ވައިސް ޕްރިމިއާކަން ކުރެއްވި ޒާންގްއާ އެކު ޖިންސީ ގުޅުމެއް ބާއްވަން އޭނާ އަށް މަޖުބޫރު ކުރުވި ކަމަށެވެ. ފަހުން އެ ޕޯސްޓު ވަނީ ރިމޫވްކޮށްފަ އެވެ. އަދި އޭގެ ފަހުން ޕެންގްގެ ހަބަރެއް ނުވެ އެވެ.
ކުރީގެ ވައިސް ޕްރިމިއާ ޒާންގް އަކީ ޗައިނާގެ ރައީސް ޝީ ޖިންޕިން އާ ގާތް ގުޅުމެއް އޮންނަ ބޭފުޅެކެވެ.
ބޭރުގެ ޕްރެޝަރާ ހެދި އާދީއްތަ ދުވަހު އާއްމު ކުރި ފޮޓޯތަކުން ފެންނަނީ ޕެންގްގެ ހާލު ރަނގަޅު ކަމަށެވެ. ގްލޯބަލް ޓައިމްސް ނޫހުގެ އެޑިޓަން ހޫ ޝިޖިން ޓްވީޓު ކުރި އިވެންޓުގެ ވީޑިއޯއަކުން ވެސް ޕެންގް ފެނެ އެވެ.
އިވެންޓަށް ފަހު ޕެންގް ރެސްޓޯރެންޓަކަށް ދާ މަންޒަރު ފެންނަ ވީޑިއޯއަކާއި އެ ތަނުގެ ތެރޭގައި ނަގާފައިވާ ވީޑިއޯއެއް ވެސް ޓްވިޓާގައި ޕޯސްޓުކޮށްފައި ވެ އެވެ. ނަމަވެސް އެ ފޮޓޯތަކާއި ވީޑިއޯތަކުގެ ސައްހަކަން ކަށަވަރުކުރެވިފައި ނުވާ ކަމަށް އޭއެފްޕީން ބުނެ އެވެ.
